ខេត្តកំពង់ឆ្នាំង ៖ ដោយសារតែជីវភាពក្រីក្រ និងគ្មានការយកចិត្តទុកដាក់នោះ បុរសម្នាក់អាចនឹងត្រូវពិការ ជើងមួយចំហៀង ដោយសារតែឆ្កែខាំ បណ្តាលឱ្យក្លាយជាដំបៅរលួយ ព្រោះមិនបានព្យាបាលត្រឹមត្រូវ ដោយសារគ្មានប្រាក់ចូលមន្ទីរពេទ្យ ។ លុះពេលមកជួបលោកគ្រូពេទ្យអ៊ួន ឆេងលី ម្ចាស់គ្លីនិកឯកជន កាលពីវេលាព្រឹកថ្ងៃទី២១ ធ្នូ នេះ ត្រូវលោកគ្រូពេទ្យប្រាប់ថា ហួសពេលហើយ ជើងដែលត្រូវឆ្កែខាំនោះបានក្លាយជាដំបៅរលួយទៅហើយ រីឯវិធីព្យាបាលមានតែកាត់ជើងនោះចេញ ទើបជួយសង្គ្រោះបាន ។
ស្ថិតនៅគ្លីនិកឯកជនខាងលើក្នុងភូមិធម្មយុត្តិ សង្កាត់កំពង់ឆ្នាំង ក្រុងកំពង់ឆ្នាំងនោះ ត្រូវស្ត្រីជាប្រពន្ធឈ្មោះពន ចេង អាយុ៤៦ឆ្នាំ បានរៀបរាប់ថា ប្តីគាត់ (ជនរងគ្រោះ) ឈ្មោះខិត សុខ អាយុ៤៨ឆ្នាំ មានកូន៥នាក់ រស់នៅភូមិគុយ ឃុំដា ស្រុកកំពង់លែង ។ ប្រភពបន្តថា កាលពីជាង១ខែមុន ប្តីគាត់ត្រូវឆ្កែខាំខណៈដែលចូលទៅលេងផ្ទះដន្លងគាត់ ។ ពេលនោះដោយសារគ្មានប្រាក់ចាក់ថ្នាំ គាត់ក៏ចេះតែព្យាបាលប្តីគាត់ដោយថ្នាំបុរាណ ប៉ុន្តែជើងប្តីគាត់ចេះតែហើមធំទៅៗ គាត់ក៏យកប្តីគាត់ទៅមណ្ឌលសុខភាពឃុំ តែជើងប្តីគាត់ ក៏នៅតែមិនជា។ ដោយគាត់ចង់យកប្តីមកព្យាបាលនៅមន្ទីរពេទ្យខេត្តដែរ តែគ្មានលុយសោះ ណាមួយអាជ្ញាធរភូមិ-ឃុំ មិនបានឱ្យសំបុត្រអង្គការរ៉ាក់ដល់គ្រួសារគាត់ផង ទើបចេះតែទុកប្តីគាត់រហូតធ្ងន់ធ្ងរបែបនេះ ។
នៅព្រឹកថ្ងៃដដែលនោះ ត្រូវលោកគ្រូពេទ្យ អ៊ួន ឆេងលី បានបញ្ជូនអ្នកជំងឺទៅកាន់មន្ទីរពេទ្យខេត្ត ដើម្បីជួយសង្គ្រោះតាមជំនាញ និងបានទូរស័ព្ទហៅអ្នកសារព័ត៌មានឱ្យជួយចុះផ្សាយ ដើម្បីរកជំនួយ ដើម្បីជួយជនរងគ្រោះខាងលើ ដែលត្រូវការថវិកាសម្រាប់ព្យាបាល ៕
ចែករំលែកព័តមាននេះ