រាជធានីភ្នំពេញ ៖ ជនសង្ស័យជាចោរឆក់កាបូបម្នាក់ត្រូវបានប្រជាពលរដ្ឋដេញតាមចាប់បានវ៉ៃស្ទើរក្ស័យទើបប្រគល់ឲ្យសមត្ថកិច្ច បន្ទាប់ពីឆក់កាបូបពីស្ត្រីជនជាតិខ្មែរឥស្លាមម្នាក់ ខណៈកំពុងជិះម៉ូតូជាមួយបុរសម្នាក់តាមបណ្ដោយមហាវិថីព្រះមុនីវង្ស
រាជធានីភ្នំពេញ ៖ ជនសង្ស័យជាចោរឆក់កាបូបម្នាក់ត្រូវបានប្រជាពលរដ្ឋដេញតាមចាប់បានវ៉ៃស្ទើរក្ស័យទើបប្រគល់ឲ្យសមត្ថកិច្ច បន្ទាប់ពីឆក់កាបូបពីស្ត្រីជនជាតិខ្មែរឥស្លាមម្នាក់ ខណៈកំពុងជិះម៉ូតូជាមួយបុរសម្នាក់តាមបណ្ដោយមហាវិថីព្រះមុនីវង្ស ចំណុចស្តុបសណ្ឋាគារស ស្ថិតក្នុងសង្កាត់មនោរម្យ ខណ្ឌ៧មករា កាលពីវេលាម៉ោង១០ និង២០នាទីយប់ ថ្ងៃទី១៧ វិច្ឆិកា ២០១៥ ។ ប៉ុន្តែអ្វីដែលគួរភ្ញាក់ផ្អើលនោះគឺខណៈសមត្ថកិច្ចនាំជនសង្ស័យទៅដល់ប៉ុស្តិ៍នគរបាលរដ្ឋបាលផ្សារថ្មី២ បែរជាហាមអ្នកសារព័ត៌មានមិនធ្វើការសាកសួរជនសង្ស័យ ដោយគ្រាន់តែប្រាប់ថា ករណីនេះមិនមែនជាករណីចោរឆក់កាបូបទេ គឺជាករណីគ្រោះថ្នាក់ចរាចរណ៍ប៉ុណ្ណោះ ទោះបីជានៅទីនោះមានទាំងជនរងគ្រោះដោយការឆក់កាបូបទៅដាក់ពាក្យបណ្ដឹង និងពលរដ្ឋដែលចាប់បានជនសង្ស័យជាច្រើននាក់បានធ្វើការអះអាងថាជាករណីឆក់កាបូបក៏ដោយ ។
ប្រភពពីកន្លែងកើតហេតុបានឲ្យដឹងថា មុនពេលកើតហេតុស្ត្រីរងគ្រោះជាជនជាតិខ្មែរឥស្លាមកំពុងជិះម៉ូតូជាមួយបុរសម្នាក់តាមបណ្ដោយមហាវិថីព្រះមុនីវង្ស ស្រាប់តែមានជនសង្ស័យ២នាក់ជិះម៉ូតូ១គ្រឿងមកឆក់កាបូបរបស់គាត់យកទៅបាត់ ជនរងគ្រោះក៏បានជិះម៉ូតូដេញតាម និងស្រែកចោរៗ ខណៈមកដល់ចំណុចស្តុបសណ្ឋាគារស ប្រហែលជាភ្លាត់ស្នៀត ឬមកពីភ័យពេកមិនដឹង ស្រាប់តែជនសង្ស័យដែលជិះខាងក្រោយក៏ធ្លាក់ពីលើម៉ូតូ ហើយព្យាយាមរត់ទៅខាងផ្សារថ្មី តែត្រូវបានប្រជាពលរដ្ឋ និងអ្នកដំណើរដេញចាប់បានវ៉ៃស្ទើរក្ស័យ ។ ភ្លាមៗនោះក៏មានការភ្ញាក់ផ្អើលដល់សមត្ថកិច្ចចុះមកអន្តរាគមន៍ និងនាំជនសង្ស័យមកកាន់ប៉ុស្តិ៍នគរបាលរដ្ឋបាលផ្សារថ្មី២ដើម្បីធ្វើការសាកសួរ ដែលស្ត្រីរងគ្រោះដោយសារការឆក់កាបូបនេះក៏ទៅតាមដាក់ពាក្យបណ្ដឹងនៅទីនោះដែរ ។
អ្វីដែលធ្វើឲ្យប្រជាពលរដ្ឋប្រមាណ៥០នាក់ដែលបានចាប់ជនសង្ស័យចងស្លាបសេកនៅកន្លែងកើតហេតុ និងស្ត្រីរងគ្រោះមានការមិនអស់ចិត្តនោះគឺ ខណៈសមត្ថកិច្ចនាំជនសង្ស័យដល់ប៉ុស្តិ៍នគរបាលរដ្ឋបាលផ្សារថ្មី២ សមត្ថកិច្ចបានហាមឃាត់មិនឲ្យអ្នកសារព័ត៌មានថតរូប និងសាកសួរជនសង្ស័យទេ ដោយគ្រាន់តែនិយាយប្រាប់ថា ករណីនេះមិនមែនជាករណីឆក់កាបូបនោះទេ គឺជាករណីគ្រោះថ្នាក់ចរាចរណ៍ ហើយកាបូបដែលបាត់នោះគេនឹងយកមកឲ្យវិញមិនខាន ។
ប្រភពពីប្រជាពលរដ្ឋជាច្រើននាក់ដែលបានតាមដល់ប៉ុស្តិ៍ ព្រមទាំងជនរងគ្រោះមានការសង្ស័យជាខ្លាំង ហេតុអ្វីបានទៅជាយ៉ាងដូច្នេះទៅវិញ? ជនសង្ស័យត្រូវបានប្រជាពលរដ្ឋដេញចាប់បានជាក់ស្តែង មានទាំងជនរងគ្រោះធ្វើការអះអាង និងរង់ចាំដាក់ពាក្យបណ្ដឹងទៀត តែសមត្ថកិច្ចបែរជាថាជាករណីគ្រោះថ្នាក់ចរាចរណ៍ទៅវិញ ចំណែកកាបូបដែលបាត់នោះចាំគេយកមកឲ្យវិញ ។ តើឲ្យប្រជាពលរដ្ឋជឿទុកចិត្តសមត្ថកិច្ចតទៅទៀតបានដែរឬទេ?
ប្រភពបានបន្តទៀតថា បើជាករណីគ្រោះថ្នាក់ចរាចរណ៍មែន ហេតុអ្វីជនរងគ្រោះបាត់កាបូប (ដែលតាមការអះអាងរបស់ស្ត្រីរងគ្រោះនៅក្នុងកាបូបមានទូរស័ព្ទ iPhone 6 plus មួយគ្រឿង និងលុយ២០ដុល្លារ) ហើយបែរជាសមត្ថកិច្ចនិយាយថា ចាំគេយកកាបូបមកឲ្យជនរងគ្រោះវិញ ទៅវិញ ៕
ចែករំលែកព័តមាននេះ