រាជធានីភ្នំពេញ ៖ តាមសេចក្តីរាយការណ៍ពីអ្នកឆ្លើយឆ្លងព័ត៌មានបានឱ្យដឹងថា ជនសង្ស័យម្នាក់ ក្នុងចំណោមបក្ខពួក២នាក់ ត្រូវបានប្រជាពលរដ្ឋព្រួតគ្នាវាយរហូតដល់ស្លាប់ ខណៈលួចកាច់សោ.កម៉ូតូ កាលពីវេលាម៉ោងជិត១២ថ្ងៃត្រង់ថ្ងៃទី១ វិច្ឆិកា ស្ថិតនៅភូមិស្ងួនពេជ្រ សង្កាត់កន្ទោក ខណ្ឌពោធិ៍សែនជ័យ ។
ប្រភពបន្តថា ជនសង្ស័យដែលស្លាប់ខាងលើ អាយុប្រហែល២០ឆ្នាំ ភេទប្រុស មិនស្គាល់អត្តសញ្ញាណ ។ ចំណែកម៉ូតូដែលជនសង្ស័យលួចកាច់សោ.កម៉ាកហុងដាឌ្រីម ស៊េរី២០០៨ បិទតែម២០១០ ពាក់ស្លាកលេខ1A-0559 មួយគ្រឿង ដែលមានម្ចាស់ឈ្មោះ ប៊ុន ធួន ភេទប្រុស អាយុ៣៧ឆ្នាំ មានស្រុកកំណើតនៅភូមិ៤ សង្កាត់ដងទង់ ក្រុងខេមរភូមិន្ទ ខេត្តកោះកុង ស្នាក់នៅភូមិព្រៃខ្លា ឃុំក្រាំងម្កាក់ ស្រុកអង្គស្នួល ខេត្តកណ្តាល ។
ប្រភពព័ត៌មានបានបន្តទៀតថា មុនពេលកើតហេតុ ស្ត្រីជាប្រពន្ធជិះម៉ូតូទៅដឹកខ្មៅគោដែលប្តីច្រូត ហើយក៏ទុកម៉ូតូនៅលើចិញ្ចើមផ្លូវ ស្រាប់តែមានជន២នាក់ជិះម៉ូតូម៉ាកវ៉េវមួយគ្រឿងមកធ្វើសកម្មភាពលួចកាច់សោ.កម៉ូតូរបស់គាត់ជិះចេញ ពេលនោះគាត់ក្រឡេកឃើញក៏រត់ដេញតាមនិងស្រែកថា «ចោរៗ» បង្កការភ្ញាក់ផ្អើលដល់ពលរដ្ឋជិតខាងជួយដេញតាមជនសង្ស័យ ហើយចាប់បានម្នាក់ទប់កំហឹងមិនបាននាំគ្នាព្រួតវាយរហូតដល់ស្លាប់ ។ ចំណែកជនសង្ស័យម្នាក់ទៀតបានជិះម៉ូតូរត់គេចខ្លួនបាត់ស្រមោល ៕
ព័ត៌មានលម្អិតមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ