មេបញ្ជាការកងទ័ពអាមេរិកនៅអាហ្វហ្គានីស្ថានឧត្តមសេនីយ៍ JOHN CAMPBELL បានទទួលស្គាល់កាលពីថ្ងៃទី៦ តុលាថា ការវាយប្រហារតាមអាកាសរបស់អាមេរិកមួយបានត្រូវចំដោយច្រឡំ កាលពីថ្ងៃទី៣ តុលា លើមន្ទីរពេទ្យរបស់អង្គការគ្រូពេទ្យគ្មានព្រំដែន MSF នៅក្រុងគុនឌុស អាហ្វហ្គានីស្ថាន បណ្តាលឱ្យជនស៊ីវិលស្លាប់យ៉ាងតិច២២នាក់ ក្នុងនោះមាននិយោជិត MSF ១២នាក់ និងអ្នកជំងឺ១០នាក់ ។
លោក CAMPBELL ក្នុងឱកាសនៃសវនាការមួយរបស់សភានាទីក្រុងវ៉ាស៊ីនតោនថ្លែងថា មន្ទីរពេទ្យនោះរងការវាយប្រហារដោយច្រឡំ។ យើងពុំដែលមានចេតនាវាយប្រហារលើទីតាំងពេទ្យមួយឡើយ ។ មេបញ្ជាការរូបនេះទទួលស្គាល់ពីការវាយប្រហារច្រឡំពេលដែល MSF សម្តែងការក្តៅក្រហាយបន្ទាប់ពីយន្តហោះអាមេរិកទម្លាក់គ្រាប់បែកលើមន្ទីរពេទ្យខ្លួន ។
កាលពីថ្ងៃទី៥ តុលា ក្នុងសន្និសីទសារព័ត៌មានមួយនៅមន្ទីរប៉ង់តាហ្គោន លោក CAMPBELL បានចៀសវាងពុំទទួលស្គាល់ការទទួលខុសត្រូវរបស់សហរដ្ឋអាមេរិក ដោយគ្រាន់តែនិយាយថា ជនស៊ីវិលជាច្រើននាក់រងការវាយប្រហារដោយចៃដន្យ ។ ក្រោយការអះអាងបែបនេះបន្តិច MSF បានស្នើឱ្យមានការស៊ើបអង្កេតដោយឯករាជ្យមួយ ទោះបីមានការសន្យារបស់សេតវិមាន និងមន្ទីរប៉ង់តាហ្គោនថា នឹងធ្វើការស៊ើបអង្កេតដោយតម្លាភាពមួយក្តី ។
ទន្ទឹមនឹងនេះ លោក CAMPBELL ថ្លែងថា ការសម្រេចចិត្តជួយវាយប្រហារតាមអាកាសនេះធ្វើឡើងតាមសំណើរបស់កងទ័ពអាហ្វហ្គានីស្ថាន ដែលកំពុងប្រយុទ្ធជាមួយពួកតាលីបង់នៅក្រុងគុនឌុស ៕
ចែករំលែកព័តមាននេះ