ផ្តន្ទាទោសជនជាតិបារាំងប្លន់ប្រាក់ធនាគារកម្ពុជាអាស៊ីដាក់ពន្ធនាគារ៦ឆ្នាំ
ដោយ ៖ អប្សរា
ថ្ងៃពុធ ទី៨ ខែកញ្ញា ឆ្នាំ២០១០ ម៉ោង ១៧:៥៨
ប៊ុនណាក់
បុរសជនជាតិបារាំងរូបនេះត្រូវបានប្រកាសផ្តន្ទាទោសពីបទប្លន់ និងប្រើប្រាស់អាវុធខុសច្បាប់
រាជធានីភ្នំពេញ ៖ នៅព្រឹកថ្ងៃទី៨ កញ្ញា សាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសជនជាតិបារាំងម្នាក់ដាក់ពន្ធនាគាររយៈពេល៦ឆ្នាំ និងបង់ប្រាក់ចំនួន២លាន១សែនរៀលចូលថវិការដ្ឋ ។ ជនត្រូវចោទឈ្មោះចាតូ ហ្វ្រង់ស្វ័រចច ភេទប្រុស អាយុ៤៨ឆ្នាំ ជាអ្នករត់តាក់ស៊ី និងបើកយានដ្ឋានជួសជុលរថយន្ត ទីកន្លែងកំណើតនៅទីក្រុងប៉ារីស ប្រទេសបារាំង ចូលមកកម្ពុជា ស្នាក់នៅផ្ទះលេខ៥៣ ផ្លូវលេខ៥៧ ភូមិ៩ សង្កាត់បឹងកេងកងទី១ ខណ្ឌចំការមន ។ បុរសជនជាតិបារាំងរូបនេះត្រូវបានប្រកាសផ្តន្ទាទោសពីបទប្លន់ និងប្រើប្រាស់អាវុធខុសច្បាប់ តាមមាត្រា៦ និងមាត្រា២០នៃច្បាប់ស្តីអំពីស្ថានទំងន់ទោសនៃបទឧក្រិដ្ឋ និងច្បាប់ស្តីពីការគ្រប់គ្រងអាវុធជាតិផ្ទុះ និងគ្រាប់រំសេវ ។
គួរបញ្ជាក់ថា ជនឈ្មោះចាតូហ្វ្រង់ស្វ័រចច បានត្រូវសមត្ថកិច្ចនគរបាលខណ្ឌចំការមនចាប់ខ្លួនកាលពីថ្ងៃទី៨ កុម្ភៈ ២០១០ វេលាម៉ោង៨ និង៣០នាទីយប់ នៅចំណុចមុខធនាគារកម្ពុជាអាស៊ីដែលមានអាសយដ្ឋានលេខ១៣១ មហាវិថីម៉ៅសេទុង សង្កាត់បឹងកេងកងទី៣ ខណ្ឌចំការមន ខណៈដែលជនជាតិបារាំងរូបនេះធ្វើសកម្មភាពប្លន់ប្រាក់ធនាគារដោយប្រើប្រាស់អាវុធ ។ នៅវេលាម៉ោងជាង៨យប់នោះ ជនឈ្មោះចាតូហ្វ្រង់ស្វ័រចច ចូលទៅក្នុងធនាគារកម្ពុជាអាស៊ីតែម្នាក់ឯងរួចបានដកកាំភ្លើងខ្លីម៉ាកឡុក ពណ៌ខ្មៅភ្ជង់សន្តិសុខយាមនៅទីនោះឱ្យក្រាបគ្រប់គ្នា ហើយដើរចូលទៅក្នុងធនាគារភ្ជង់បុគ្គលិក និងបញ្ជាឱ្យប្រមូលលុយឱ្យខ្លួន ។ ពេលហេតុការណ៍កើតឡើងម្នាក់ៗភ័យស្លន់ស្លោគ្រប់គ្នាពិសេសក្រុមបុគ្គលិកប្រមូលបានប្រាក់ចំនួន១.១១៨.០០០រៀលយកមកដាក់លើតុដើម្បីប្រគល់ឱ្យចោរប្លន់ម្នាក់នោះ ។
នៅពេលបុគ្គលិកយកប្រាក់ដាក់លើតុហើយជនជាតិបារាំងឈ្មោះចាតូហ្វ្រង់ ស្វ័រចច នេះបានដាក់កាំភ្លើងលើតុ រួចប្រមូលប្រាក់ញាត់ចូលក្នុងអាវដើម្បីគេចខ្លួន ។ ជាឱកាសល្អនៅពេលចោរទុកកាំភ្លើងលើតុ សន្តិសុខធនាគារម្នាក់បានស្ទុះទៅយកកាំភ្លើងនោះភ្ជង់ចោរប្លន់វិញ និងបានស្រែកឆោឡោឡើងទើបជនល្មើសភ័យរត់ចេញក្រៅធនាគារបំណងគេចខ្លួន តែត្រូវសមត្ថកិច្ចចាប់ខ្លួនបាន ។ បន្ទាប់ពីត្រូវចាប់ខ្លួន ជនជាតិបារាំងរូបនេះត្រូវបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញដោយចោទប្រកាន់ពីបទប្លន់ និងប្រើប្រាស់អាវុធខុសច្បាប់ហើយក៏បានឃុំខ្លួនក្នុងពន្ធនាគារជាបណ្តោះអាសន្នតាំងពីពេលនោះមក ។ លុះមកដល់ថ្ងៃទី១០ សីហា ២០១០ កន្លងទៅនេះសាលាដំបូងរាជធានីភ្នំពេញបានលើកយករឿងក្តីខាងលើនេះមកបើកសវនាការជំនុំជំរះទោស ប៉ុន្តែសវនាការត្រូវបានលើកពេលប្រកាសសាលក្រមរហូតមកដល់ព្រឹកថ្ងៃទី៨ កញ្ញា ។ ពេលនេះសាលក្រមបានប្រកាសហើយគឺផ្តន្ទាទោសដាក់ពន្ធនាគាររយៈពេល៦ឆ្នាំ និងបង់ប្រាក់ចូលរដ្ឋចំនួន២លាន១សែនរៀល ៕
