មនុស្ស៥នាក់បានត្រូវស្លាប់ ហើយ៦នាក់ទៀតរងរបួសដោយសារការផ្ទុះឆេះមួយដែលកើតមានកាលពីថ្ងៃទី៣១ សីហា ក្នុងរោងចក្រផលិតកាំជ្រួចភ្លើងមួយស្ថិតនៅជិតទីក្រុង SARAGOSSE ភាគឦសានអេស្ប៉ាញ ។
ផ្នែកសង្គ្រោះបន្ទាន់និយាយថា ជនរងគ្រោះ៤នាក់ស្លាប់នៅនឹងកន្លែង ហើយមនុស្សម្នាក់ទៀតស្លាប់នៅមន្ទីរពេទ្យ ។ ការផ្ទុះកើតមាននាវេលាម៉ោង១៤និង១៥នាទី ម៉ោងក្នុងស្រុក ហើយពួកអ្នកពន្លត់ភ្លើងនិយាយថា នៅមានការផ្ទុះតូចៗទៀត រួចតំបន់រោងចក្រនេះនៅតែមានគ្រោះថ្នាក់ ព្រោះនៅសល់សារធាតុនានាដែលអាចផ្ទុះ ។
តាមរូបភាពនានារបស់កាកបាទក្រហមអេស្ប៉ាញ គេអាចឃើញពពកផ្សែងហុយចេញពីលើបណ្តាឃ្លាំងរបស់សហគ្រាស PIROTECNIA ZARAGOZANASA ដែលមានទីតាំងទំហំ១២ហិកតា ។ សហគ្រាសនេះស្ថិតនៅចម្ងាយមិនដល់១០គីឡូម៉ែត្រពីព្រលានយន្តហោះក្រុង SARAGOSSE ។ រោងចក្រនេះប្រើមនុស្សជិត៤០នាក់ផលិតកាំជ្រួចភ្លើង ។ សម្រាប់ពេលនេះគេនៅពុំទាន់ដឹងថា តើការផ្ទុះបណ្តាលមកពីអ្វីនៅឡើយ ៕
ចែករំលែកព័តមាននេះ