ក្រុងបាងកក ៖ អ្នកនាំពាក្យប៉ូលិសជាតិបាននិយាយថា ប៉ូលិសប្រមាណជា១០០នាក់ រួមជាមួយទាហានបានបើកប្រតិបត្តិការឡោមព័ទ្ធ និងឆ្មក់ចូលផ្ទះល្វែងមួយកន្លែង នៅភាគខាងជើងទីក្រុងបាងកក កាលពីថ្ងៃសៅរ៍ ទី២៩ សីហា នេះ ដោយបានរកឃើញសមា្ភរដែលអាចបង្កើតជាគ្រាប់បែកបាន ។ ការប្រមាញ់របស់ប៉ូលិសថៃ ចំពោះជនល្មើសនៃការបំផ្ទុះគ្រាប់បែកសម្លាប់មនុស្ស២០នាក់ និងរងរបួសជាង១០០នាក់នៅទីក្រុងបាងកក ។
អ្នកនាំពាក្យប៉ូលិសជាតិបន្តថា ជនសង្ស័យរូបនេះ «មើលទៅដូចគ្នា ជាមួយរូបព្រៀងដែលយើងកំពុងតែស្វែងរក» ។ លោកបន្តទៀតថា ប៉ូលិសបានរកឃើញសមា្ភរមានច្រើនដែលអាចប្រើវា ដើម្បីធ្វើគ្រាប់បែក ។
ប៉ុន្តែស្នងការរងប៉ូលិសជាតិ លោកឧត្តមសេនីយ៍ Chaijinda បានប្រាប់អ្នកកាសែតកាលពីរសៀលថ្ងៃសៅរ៍នេះថា វានៅមិនទាន់ច្បាស់លាស់នៅឡើយទេ ថាតើបុរសម្នាក់ដែលចាប់ខ្លួនបាននោះ គឺដូចគ្នាជាមួយនឹងមនុស្សក្នុងរូបភាពកាមេរ៉ាសុវត្ថិភាព ។
គួររំលឹកថា គ្រាប់បែកមួយគ្រាប់បានផ្ទុះសម្លាប់មនុស្សនៅចេតិយ Erawan ទីក្រុងបាងកក កាលពីវេលាយប់ថ្ងៃទី១៧ សីហា កន្លងមក ដោយបានសម្លាប់មនុស្ស20នាក់ ភាគច្រើនជាភ្ញៀវទេសចរ ។
ចែករំលែកព័តមាននេះ