ខេត្តព្រះសីហនុ ៖ កំណើនភ្ញៀវទេសចរតាមនាវាមកកាន់ខេត្តព្រះសីហនុក្នុងរយៈពេល៧ខែឆ្នាំ២០១៥នេះ កើនឡើងជាង២០ភាគរយ បើធៀបនឹងរយៈពេលដូចគ្នាកាលពីឆ្នាំ២០១៤ ។ នេះបើយោងតាមទិន្នន័យពីមន្ទីរទេសចរណ៍ខេត្តព្រះសីហនុ ។
លោក នូ សុផល ប្រធានមន្ទីរទេសចរណ៍ខេត្តបានប្រាប់កោះសន្តិភាព កាលពីសប្តាហ៍មុន ថា ក្នុងកំឡុង៧ខែឆ្នាំ២០១៥នេះ មានកប៉ាល់ទេសចរណ៍បរទេសចំនួន២៦បានសំចតនៅកំពង់ផែក្រុងព្រះសីហនុ និងមានផ្ទុកភ្ញៀវទេសចរសរុបចំនួន២៣.៣០៩នាក់ បើធៀបនឹងឆ្នាំមុន មានប្រមាណតែ១៨.១៣៣នាក់ប៉ុណ្ណោះ គឺកើនឡើង២៣ភាគរយ។
លោក នូ សុផល មានប្រសាសន៍ទៀតថា ក្នុងចំណោមភ្ញៀវទេសចរដែលមកទស្សនាក្នុងខេត្តព្រះសីហនុ តាមនាវាភាគច្រើនមកពីអាមេរិក អូសេអានី អង់គេ្លស អូស្ត្រាលី កាណាដា នូវែលសេឡង់ ស្វ៊ីស អាល្លឺម៉ង់ និងបារាំង ហើយពួកគេបានចំណាយពេលតែមួយថ្ងៃប៉ុណ្ណោះក្នុងការលំហែកាយក្នុងខេត្តព្រះសីហនុ និងរាជធានីភ្នំពេញ មុននឹងបន្តដំណើរទៅកាន់ប្រទេសថៃ និងវៀតណាម ។
លោកប្រធានមន្ទីរទេសចរណ៍ខេត្តបន្តថាជាមធ្យមមានកប៉ាលដឹកភ្ញៀវទេសចរចំនួន៣គ្រឿងក្នុង១ខែបានចូលសំចតនៅកំពង់ផែ ហើយកំណើនភ្ញៀវទេសចរតាមនាវានេះ លោកយល់ឃើញថា ដោយសារតែខេត្តព្រះសីហនុជាគោលដៅថ្មីសម្រាប់អ្នកទេសចរតាមនាវា ។
លោកនូ សុផល បន្ដថា ៖ «ក្រុមភ្ញៀវទេសចរតាមនាវាទាំងអស់នោះចាប់អារម្មណ៍លើវប្បធម៌ប្រពៃណីខ្មែរ ឆ្នេរសមុទ្រ ភាពរស់រាយរាក់ទាក់របស់ប្រជាជនខ្មែរ ហេដ្ឋារចនាសម្ព័ន្ធផ្លូវថ្នល់ រួមជាមួយនឹងសេវាកម្មផ្សេងៗទៀត ហើយអ្វីដែលពិសេសនោះគឺសន្តិសុខ សុវត្ថិភាពរបស់ភ្ញៀវទេសចរត្រូវបានការពារយ៉ាងហ្មត់ចត់ » ។
លោក អាង គឹមអៀង ប្រធានសមាគមភ្នាក់ងារទេសចរណ៍កម្ពុជា បានប្រាប់កោះសន្តិភាពថា កំណើននៃភ្ញៀវទេសចរពីអឺរ៉ុបតាមនាវាមកកម្ពុជា គឺដោយសារតែពួកគេស្គាល់ពីកំពង់ផែរបស់ខេត្តព្រះសីហនុ និយាយជារួមកំពង់ផែខេត្តព្រះសីហនុ ជាគោលដៅទាក់ទាញ ដែលនាវាទេសចរណ៍មិនអាចរំលងបាន ។
លោក គឹមអៀង បន្ដថា ៖ « ខ្ញុំយល់ថា វាមានការកើនឡើង ប៉ុន្តែ[ក្រសួងទេសចរណ៍] ក៏ដូចជាផ្នែកពាក់ព័ន្ធផ្សេងៗទៀតត្រូវចូលរួមឃោសនាដើម្បីទាក់ទាញភ្ញៀវទេសចរតាមនាវាមកបន្ថែមទៀត ។ មួយវិញទៀតខាងមន្ទីរទេសចរណ៍ ត្រូវចូលរួមសម្រួលដល់ការចូលចតរបស់នាវាទេសចរណ៍ទាំងអស់នោះផងដែរ ។
គួរបញ្ជាក់ថា កាលពីចុងសប្តាហ៍កន្លងទៅនេះ មាននាវាដឹកភ្ញៀវទេសចរមួយឈ្មោះថា Dawn Princess ដែលផ្ទុកភ្ញៀវទេសចរចម្រុះជាតិសាសន៍ប្រមាណជា២.០០០នាក់ បានចូលចតនៅកំពង់ផែអន្តរជាតិក្រុងព្រះសីហនុ ដោយចំណាយពេលមួយថ្ងៃ មុននឹងនាវាធំមួយនេះចាកចេញទៅកាន់ប្រទេសថៃ ។
តាមរបាយការណ៍របស់មន្ទីរទេសចរណ៍ខេត្តព្រះសីហនុ ក្នុងរយៈពេល៦ខែក្នុងឆ្នាំ២០១៥នេះ មានភ្ញៀវទេសចរសរុប៨,៨សែននាក់ កើនឡើង១៥,៨៧ភាគរយ ដែលបានមកទស្សនានៅក្នុងខេត្តព្រះសីហនុ ក្នុងនោះមានភ្ញៀវជាតិចំនួន ៦,៦សែននាក់ កើនឡើង១៨,៧៣ភាគរយ និងភ្ញៀវបរទេសមានចំនួន២,១សែននាក់ ដែលមានកំណើន៧,៨ភាគរយ ៕
ចែករំលែកព័តមាននេះ