មន្ទីរប៉ង់តាហ្គោន ព្រមទាំងក្រុមពន្លត់ភ្លើងជប៉ុនគូសបញ្ជាក់ថា ការផ្ទុះឆេះនានាកើតមានកាលពីវេលារំលងអធ្រាត្រថ្ងៃទី២៤ សីហា នៅទីតាំងយោធាអាមេរិកមួយជិតក្រុងតូក្យូ បណ្តាលឱ្យមានអគ្គិភ័យ ក៏ប៉ុន្តែពុំបណ្តាលឱ្យមានជនរងគ្រោះឡើយ ។
អ្នកនាំពាក្យម្នាក់របស់ក្រសួងការពារប្រទេសអាមេរិករៀបរាប់ប្រាប់ AFP ថា ការផ្ទុះមួយកើតមានក្រោយពេលរំលងអធ្រាត្រម៉ោងនៅជប៉ុន ក្នុងអគារមួយរបស់កងទ័ពអាមេរិក គឺឃ្លាំងសាហ្គាមី ក្នុងទីក្រុងសាហ្គាមីហារ៉ា ប្រទេសជប៉ុន ចម្ងាយប្រមាណជា៤០គីឡូម៉ែត្រភាគនិរតីក្រុងតូក្យូ ។ ក្នុងសេចក្តីប្រកាសមួយអ្នកនាំពាក្យរូបនេះបន្តថា ពុំមានព័ត៌មានទាក់ទិននឹងជនរងគ្រោះឡើយ ។
ក្រុមពន្លត់ភ្លើងមូលដ្ឋានបានបញ្ជូនរថយន្តបាញ់ទឹក១៣គ្រឿងទៅកាន់កន្លែងឆេះ ហើយភ្លើងទីបំផុតបានរលត់៦ម៉ោងក្រោយមក ដោយពុំរាលដាលដល់អគារឯទៀតៗនៅជុំវិញឡើយ ។
អ្នកនាំពាក្យក្រសួងការពារប្រទេសអាមេរិកបញ្ជាក់ថា ឃ្លាំងស្តុកនេះពុំមានគ្រាប់រំសេវ ឬក៏វត្ថុធាតុវិទ្យុសកម្មឡើយ ។ អគារនោះពុំទទួលស្តុកបណ្តាសម្ភារគ្រោះថ្នាក់ឡើយ ។ យើងកំពុងតែកំណត់ឱ្យច្បាស់ តើមានអ្វីខ្លះក្នុងអគារនេះ ព្រមទាំងមូលហេតុនៃការផ្ទុះ ។
វីដេអូមួយថតដោយប្រជាជនម្នាក់ ហើយផ្សាយតាមអីុនធើរណេត គេឃើញដុំភ្លើងខ្ទេចចេញដូចកាំជ្រួចពីអគារនេះដែលកំពុងឆាបឆេះ។ ការផ្ទុះខ្លាំងៗអាចស្តាប់ឮជាច្រើនគីឡូម៉ែត្រ ៕
ចែករំលែកព័តមាននេះ