រាជធានីភ្នំពេញ ៖ លោកនាយឧត្តមសេនីយ៍សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃឲ្យដឹងថា ការធ្វើជំរឿនជនបរទេសនៅក្នុងប្រទេសកម្ពុជាបានធ្វើឡើងចំនួន៣ដងមកហើយ និងបង្ហាញថា
រាជធានីភ្នំពេញ ៖ លោកនាយឧត្តមសេនីយ៍សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃឲ្យដឹងថា ការធ្វើជំរឿនជនបរទេសនៅក្នុងប្រទេសកម្ពុជាបានធ្វើឡើងចំនួន៣ដងមកហើយ និងបង្ហាញថា ជនបរទេសកើនឡើងជាបន្តបន្ទាប់ ។ ជាក់ស្តែងកាលពីឆ្នាំ២០០២ តួលេខជនបរទេសមានចំនួនជាង៧ម៉ឺននាក់ ឆ្នាំ២០១០ឡើងជាង១០ម៉ឺននាក់ និងឆ្នាំ២០១៤កើនដល់ប្រមាណ១៦ម៉ឺននាក់ដែលក្រសួងមហាផ្ទៃរកឃើញជនអន្តោប្រវេសន៍មិនទាន់បានបំពេញសំណុំបែបបទត្រឹមត្រូវតាមច្បាប់ ក្នុងនោះមាន២១ជនជាតិ ភាគច្រើនជាជនជាតិវៀតណាម ។
លោកនាយឧត្តមសេនីយ៍សុខ ផល ឲ្យដឹងបែបនេះក្នុងពេលលោកអញ្ជើញជាអធិបតី ជាមួយលោកប៉ា សុជាតិវង្ស អភិបាលរាជធានីភ្នំពេញ នៅក្នុងកិច្ចប្រជុំផ្សព្វផ្សាយសមាសភាពគណៈកម្មការជំរឿន និងការរៀបចំក្រុមការងារចម្រុះអនុវត្តការងារគ្រប់គ្រងជនអន្តោប្រវេសន៍ នៅសាលារាជធានីភ្នំពេញ កាលពីរសៀលថ្ងៃទី១០ សីហា ២០១៥ ។ ពិធីនោះមានការចូលរួមពីមន្ត្រីអាជ្ញាធរគ្រប់លំដាប់ថ្នាក់ក្រោមឱវាទសាលារាជធានីភ្នំពេញ និងមន្ត្រីពាក់ព័ន្ធជា ច្រើនរូបទៀត ។
លោកនាយឧត្តមសេនីយ៍សុខ ផល បញ្ជាក់ថា តួលេខនៃការធ្វើជំរឿននេះ គឺបានតែ ៧០%ប៉ុណ្ណោះ ហើយមិនទាន់គិតពីជនបរទេសអន្តោប្រវេសន៍ដែលចូលមកស្របច្បាប់ទេ ។ ចំណែកជនបរទេសអន្តោប្រវេសន៍ស្របច្បាប់សម្រាប់ឆ្នាំ២០១៥នេះ មានជាង២លាននាក់ ក្នុងនោះមានជាអង្គទូត NGO អ្នកទេសចរ អ្នកសាសនា ពាណិជ្ជករ និងអ្នកវិនិយោគទុនជាដើម ។ ដោយឡែកអ្នកទេសចរមានជាង២លាននាក់ ហើយពីដើមខែកក្កដា ដល់ខែធ្នូនឹងអាចកើនដល់៥លាននាក់ ។
លោកនាយឧត្តមសេនីយ៍បានរំឭកថា «តាមពិតច្បាប់អន្តោប្រវេសន៍នៅព្រះរាជាណាចក្រកម្ពុជាយើងរហូតមកដល់ពេលនេះ បានចេញចំនួន២លើកហើយ គឺលើកទី១ បានចេញកាលពីឆ្នាំ១៩៥៦ ក្រោយទទួលបានឯករាជ្យកាលឆ្នាំ១៩៥៣ ដែលមានសម្តេចព្រះបរមរតនកោដ្ឋ នរោត្តម សីហនុ លោកជានាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ហើយនៅជំនាន់នោះភ្នំពេញមានមនុស្សរស់នៅតែជាង១១ម៉ឺននាក់ទេ ចំណែកឯជនបរទេសអន្តោប្រវេសន៍មានជាង៥០% ក្នុងនោះជនជាតិវៀតណាមច្រើនជាង គេ ។ ក្រោយមកនៅឆ្នាំ១៩៩៤ ច្បាប់អន្តោប្រវេសន៍បានចេញជារូបរាងជាលើកទី២ ដែលត្រូវអនុវត្តរហូតមកដល់ពេលនេះ តែទោះជាយ៉ាងណាក្តីច្បាប់នេះនៅមិនទាន់បានអនុវត្តឱ្យបានពេញលេញនៅឡើយទេ» ។
នាយឧត្តមសេនីយ៍សុខ ផល បានលើកឡើងថាជនអន្តោប្រវេសន៍បានចុះបញ្ជីតាំងពីសម័យអាណានិគម តែក្រោយមកឆ្លងកាត់ពីរបបមួយទៅរបបមួយ ជនអន្តោប្រវេសន៍ទាំងនោះបានចាកចេញដោយសារភ័យខ្លាចពីការកាប់សម្លាប់់។ ក្រោយឆ្នាំ១៩៧៩ ពួកទាំងនោះបានត្រឡប់មកវិញ ហើយសមត្ថកិច្ចប្រមូលឲ្យចុះបញ្ជី និងធ្វើប័ណ្ណអន្តោប្រវេសន៍ស្នាក់នៅស្របច្បាប់ ។ ការងារនេះកំពុងតែធ្វើរាល់ថ្ងៃបានជាង២ម៉ឺននាក់ហើយៗនឹងខិតខំធ្វើបន្តទៅទៀត ជាពិសេស នឹងធ្វើឈីបសម្រាប់១គ្រួសារមួយ ដើម្បីងាយ ស្រួលគ្រប់គ្រង ។ ការងារនេះនឹងបញ្ចប់នៅឆ្នាំ២០១៦ ។
លោកឧត្តមសេនីយ៍សុខ ផល បានអំ ពាវនាវដល់អាជ្ញាធរភូមិ សង្កាត់ នគរបាលប៉ុស្តិ៍ថា«ត្រូវបញ្ឈប់ជាបន្ទាន់ និងដាច់ខាតចំពោះការចេញលិខិតស្នាមទទួលស្គាល់ជន បរទេសអន្តោប្រវេសន៍ខុសច្បាប់ ហើយបើអស់លោកមិនភ្ញាក់រឭក នៅតែចេញលិខិតទទួលស្គាល់ជនអន្តោប្រវេសន៍ខុសច្បាប់ទៀតនោះ វានឹងបង្កផលលំបាកដល់ជាតិដល់កូនចៅយើងជាច្រើនជំនាន់ទៀត»។
ក្នុងឱកាសនោះលោកប៉ា សុជាតិវង្ស អភិ បាលរាជធានីភ្នំពេញមានប្រសាសន៍ថា បញ្ហា ជនបរទេសអន្តោប្រវេសន៍ខុសច្បាប់ ជាបញ្ហារសើបមួយ និងមិនអាចមើលស្រាលបានទេ ដែលកន្លងមកមានបក្សនយោបាយខ្លះឆ្លៀតប្រើប្រាស់បញ្ហានេះទាញយកប្រជាប្រិយភាពធ្វើអាជីវកម្មនយោបាយ ជាពិសេសនៅភ្នំពេញ។កិច្ចប្រជុំនេះដើម្បីវាយតម្លៃឲ្យបានច្បាស់លាស់អំពីលទ្ធផល និងការងារកន្លងមក ។
លោកអភិបាលរាជធានីទទួលស្គាល់ថា«ការគ្រប់គ្រងជនអន្តោប្រវេសន៍របស់អាជ្ញាធរយើងនៅធូររលុងណាស់ ទាំងការផ្តល់អត្តសញ្ញាណប័ណ្ណ សៀវភៅស្នាក់នៅ សៀវភៅគ្រួសារ លិខិតអត្រានុកូលដ្ឋានជាដើម ។ កិច្ចប្រជុំពេលនេះមានបំណងផ្សព្វផ្សាយច្បាប់អន្តោប្រវេសន៍ផង និងក្រើនរំឭកដល់អាជ្ញាធរផង ឲ្យពង្រឹងការគ្រប់គ្រងជនបរទេសអន្តោប្រវេសន៍ខុសច្បាប់ឲ្យបានខ្លាំងក្លា ក្នុងស្មារតីជាតិ និងប្រកបដោយការទទួលខុសត្រូវសម្រាប់អាជ្ញាធររបស់យើង ជាពិសេសភូមិ សង្កាត់ នគរបាលប៉ុស្តិ៍ ដែលជាអ្នកនៅជាប់ក្នុងមូលដ្ឋានជាមួយប្រជាពលរដ្ឋ»។
លោកជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញបានឲ្យដឹងថា ផែនការចុះរៀបចំ និងត្រួតពិនិត្យជនអន្តោប្រវេសន៍នៅរាជធានីភ្នំពេញចាប់ពីខែមករា រហូតដល់ខែកក្កដា ២០១៥មានចំនួន២៧១គោលដៅ ត្រួតពិនិត្យជនអន្តោប្រវេសន៍បានចំនួន១.៨៦៦នាក់ ប្រុស១.៤២១នាក់ មាន៤២សញ្ជាតិ ។
ការងារកន្លងមកមានការប្រឈមដូចជា មន្ត្រីរបស់មានការយល់ដឹងតិចចំពោះការអនុវត្តនីតិវិធីច្បាប់អន្តោប្រវេសន៍; កម្លាំងតាមការិយា ល័យជំនាញមានការខ្វះខាត; សមត្ថកិច្ចមូលដ្ឋានមួយចំនួនតូចឃុបឃិតគ្នាចេញឯកសារ ផ្សេងៗ សម្រាប់សំគាល់អត្តសញ្ញាណខ្មែរ និងកែឈ្មោះមកជាខ្មែរ ដែលបង្កការលំបាកក្នុងការគ្រប់គ្រងទិន្នន័យ និងកម្លាំងសមត្ថកិច្ចមូលដ្ឋាន ជាពិសេសនគរបាលមណ្ឌលមានភារកិច្ចច្រើនដែលធ្វើឲ្យការគ្រប់គ្រងមិនបានគ្រប់ជ្រុងជ្រោយ ៕
ចែករំលែកព័តមាននេះ