រាជធានីភ្នំពេញ ៖ កាមេរ៉ាសុវត្ថិភាពតាមភ្លើងស្តុបចំនួន២០ទីតាំង ដែលរហូតមកដល់ពេលនេះបំពាក់បានចំនួន១៧ទីតាំងហើយ បើមិនមានការរាំងស្ទះអ្វីទេនោះគ្រោងនឹងបញ្ចប់នៅសប្តាហ៏ក្រោយ ក្នុងបំណងដើម្បីរឹតបន្តឹងច្បាប់ចរាចរណ៍ផ្លូវគោក ពិសេសពង្រឹងសន្តិសុខ និងសណ្តាប់ធ្នាប់នៅក្នុងរាជធានីភ្នំពេញ ឲ្យកាន់តែប្រសើរឡើង ។
លោកវរសេនីយ៍ទោ សោម ធារិទ្ធ នាយការិយាល័យទូរស័ព្ទនៃនាយកដ្ឋានវិទ្យុទាក់ទង អគ្គស្នងការដ្ឋាននគរបាលជាតិ ក្រសួងមហាផ្ទៃ ដែលដឹកនាំកម្លាំងចុះបំពាក់កាមេរ៉ាសុវត្ថិភាពនៅតាមភ្លើងស្តុបបានឲ្យកោះសន្តិភាពដឹងតាមរយៈទូរស័ព្ទនៅថ្ងៃទី៣ សីហា ថា ពេលនេះកម្លាំងសមត្ថកិច្ចកំពុងបំពាក់កាមេរ៉ាសុវត្ថិភាពនៅភ្លើងស្តុបច្រមុះជ្រូកក្បាលថ្នល់ ។
ការងារបំពាក់កាមេរ៉ាតាមភ្លើងស្តុបនេះ ចាប់ផ្តើមតាំងពីថ្ងៃទី១៣ កក្កដា ២០១៥ រហូតដល់ថ្ងៃទី៣ សីហា គឺអនុវត្តន៏បានចំនួន១៧ទីតាំងហើយ ក្នុងចំណោម២០ទីតាំង នៅរាជធានីភ្នំពេញ ដែលជាជំនួយរបស់ក្រសួងសន្តិសុខប្រទេសចិន ។ ហើយការងារខាងលើនេះ នៅសល់តែចំនួន៣ទីតាំងទៀតប៉ុណ្ណោះ ដែលត្រូវរង់ចាំឧបករណ៏បន្ថែម បើមិនមានការរាំងស្ទះទេនោះ គ្រោងនឹងបញ្ចប់នៅអំឡុងសប្តាហ៏ក្រោយនេះតែម្តង ។
យោងតាមរបាយការណ៍របស់អគ្គស្នងការដ្ឋាននគរបាលជាតិ បានឲ្យដឹងថា កាមេរ៉ាសុវត្ថិភាពនេះមានចំនួន២០០គ្រឿង នឹងត្រូវបំពាក់តាមទីតាំងចំនួន២០ក្នុងរាជធានីភ្នំពេញ មាន ១-នៅស្តុបច្រមុះជ្រូកក្បាលថ្នល់ ២-ស្តុបចំការមន ៣-ស្តុបក្រសួងមហាផ្ទៃ ៤-ស្តុបពេទ្រចិន ៥-ស្តុបបូកគោ ៦-ស្តុបទូតអាល្លឺម៉ង់ផ្លូវសម្តេចប៉ាន ៧-ស្តុបផ្សារអូរឫស្សី ៨-ស្តុបផ្សារថ្មី ៩-ស្តុបសណ្ឋាគារណាន់ជីង ១០-ស្តុបសួនកាណាឌីយ៉ា ១១-ស្តុបដីអ៊ិន ១២-ស្តុបសន្ធរមុខ ១៣-ស្តុបម៉ុងឌីយ៉ាល់ ១៤-ស្តុបទេពផន ១៥-ស្តុបអាងទឹកអូរឡាំពិក ១៦-ស្តុបផ្សារដើមគរ ១៧-ស្តុបផ្សារដេប៉ូ ១៨-ស្តុបនាងគង្ហីងវត្តព្រះពុទ្ធមានបុណ្យ ១៩-ស្តុបច្បារអំពៅ និង២០-ស្តុបអូឡាំពិក ។
ព័ត៌មានពិស្តារមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ