ខេត្តកំពង់ចាម ៖ ស្ត្រីសង្ស័យ២នាក់ម្តាយនិងកូនត្រូវបានកម្លាំងសមត្ថកិច្ចឡោមព័ទ្ធចាប់ខ្លួនបានដោយពាក់ព័ន្ធករណីជួញដូរគ្រឿងញៀនដ៏សកម្ម ។ ប្រតិបត្តិការបង្ក្រាបនេះបានធ្វើឡើងកាលពីវេលាម៉ោង១០ និង៣០នាទីព្រឹក ថ្ងៃទី៣០ កក្កដា ២០១៥ ស្ថិតនៅភូមិព្រែកដំបូកក្រោម ឃុំព្រែកដំបូក ស្រុកស្រីសន្ធរ ដោយដកហូតបានថ្នាំញៀន៣កញ្ចប់ ឧបករណ៍វេចខ្ចប់ជាច្រើន ។
លោកវរសេនីយ៍ត្រី ខេង ស្រេង អធិការនគរបាលស្រុកស្រីសន្ធរបានប្រាប់ឲ្យដឹងថា ស្ត្រី២នាក់ម្តាយកូនដែលត្រូវបានចាប់ខ្លួននេះមានឈ្មោះ សុំ គឹមអីុ អាយុ៥១ឆ្នាំ ជាម្តាយ និងកូនស្រីឈ្មោះ សៅ ចាន់ធូ អាយុ២២ឆ្នាំ គឺជាមុខសញ្ញាដ៏សកម្មខាងជួញដូរថ្នាំញៀននៅភូមិ-ឃុំរបស់ខ្លួន ដោយបានទៅទិញថ្នាំញៀនពីរាជធានីភ្នំពេញមកចែកចាយលក់ឲ្យអ្នកភូមិ ព្រមទាំងសិស្សសាលាផងដែរ ។
លោកវរសេនីយ៍ត្រី ខេង ស្រេង បន្តទៀតថា ប្រជាពលរដ្ឋនៅមូលដ្ឋានបានរាយការណ៍ពីសកម្មភាពជួញដូរថ្នាំញៀនរបស់ម្តាយ និងកូនស្រីខាងលើទៅលោកស្នងការនគរបាលខេត្ត ក៏ដូចជាជារាយការណ៍មករូបលោកផ្ទាល់ ឲ្យមានវិធានការចុះបង្ក្រាបជាបន្ទាន់ ។
បន្ទាប់ពីទទួលបានការរាយការណ៍បែបនេះ កាលពីថ្ងៃទី១៦ កក្កដា កន្លងទៅ សមត្ថកិច្ចបានប្រើវិធានការញុះញង់ទិញថ្នាំញៀនបានចំនួន២កញ្ចប់តម្លៃ១២ម៉ឺនរៀលពីឈ្មោះ ចាន់ធូ ក្រោយមកទៀតនៅព្រឹកថ្ងៃទី៣០ កក្កដា រូបលោកបានប្រើវិធីសាស្ត្រញុះញង់ទិញថ្នាំ១កញ្ចប់តម្លៃ៦ម៉ឺនរៀល ស្របពេលដែលប្រគល់ឲ្យនោះក៏ចាប់ខ្លួន និងបាននាំទៅឆែកឆេរផ្ទះ រឹបអូសបានថ្នាំញៀន២កញ្ចប់បន្ថែមទៀត និងលុយមួយចំនួន ព្រមទាំងប្រដាប់វេចខ្ចប់ជាច្រើនទៀត ។ ដោយមានការអនុញ្ញាតពីលោកព្រះរាជអាជ្ញាអមសាលាដំបូងខេត្ត កម្លាំងសមត្ថកិច្ចបានប្រឹងប្រែងរកថ្នាំញៀនក្នុងទូរ និងគន្លៀតជញ្ជាំង តែមិនប្រទះឃើញថ្នាំញៀនឡើយ ។
លោកអធិការនគរបាលស្រុកស្រីសន្ធរបញ្ជាក់ថា ក្រោយពីរូបលោកដឹកនាំកម្លាំងចុះចាប់ខ្លួនស្ត្រី២នាក់ម្តាយនិងកូនស្រីខាងលើនេះ អាជ្ញាធរមូលដ្ឋាន ពិសេសឪពុកម្តាយរបស់សិស្សដែលធ្លាប់តែកូនរបស់គាត់នាំគ្នាទៅទិញថ្នាំញៀនមកជក់នោះ មានការត្រេកអរជាខ្លាំង ហើយក៏សំណូមពរឲ្យកម្លាំងសមត្ថកិច្ចបន្តយុទ្ធនាការចុះបង្ក្រាបគ្រឿងញៀននៅកន្លែងផ្សេងទៀតឲ្យបានដូចភ្លៀងរលឹម ស្របតាមគោលនយោបាយភូមិ-ឃុំមានសុវត្ថិភាពទាំង៩ចំណុចរបស់ក្រសួងមហាផ្ទៃ ៕
ចែករំលែកព័តមាននេះ