ខេត្តសៀមរាប ៖ អាជ្ញាធរក្រុងសៀមរាបនៅព្រឹកថ្ងៃទី៣០ កក្កដា បានសម្រេចបញ្ឈប់គម្រោងអាជីវកម្មបារអាកាស ឬហៅថាស្កាយបារ លើកដំបូងនៅអគាររោងភាពយន្តផ្លាទីនៀមសៀមរាប បន្ទាប់ពីពិនិត្យឃើញថា អាជីវកម្មទាំងអស់នៅក្នុងអគារដ៏ធំនោះពុំមានច្បាប់អនុញ្ញាត ។
សូមបញ្ជាក់ថា រោងភាពយន្តផ្លាទីនៀមសៀមរាប ដែលត្រៀមបន្តុបអាជីវកម្មស្កាយបារនៅលើដំបូលនោះមានទីតាំងនៅតាមបណ្តោយវិថីស៊ីវុត្ថិជាប់នឹងរង្វង់មូលផ្សារចាស់ ក្នុងភូមិស្ទឹងថ្មី សង្កាត់ស្វាយដង្គំ ក្រុងសៀមរាប ដែលជាដីអតីតមន្ទីរសង្គមកិច្ចខេត្ត ។
អភិបាលក្រុងសៀមរាប លោក សូ ប្លាតុង នៅព្រឹកថ្ងៃទី៣០ កក្កដា នៅគ្រាដឹកនាំមន្ត្រីចម្រុះរួមមានមន្ទីរបរិស្ថាន មន្ទីរទេសចរណ៍ មន្ទីរវប្បធម៌ និងវិចិត្រសិល្បៈ ចុះត្រួតពិនិត្យអាជីវកម្មក្នុងអគារភាពយន្តផ្លាទីនៀមខាងលើបានថ្លែងថា យើងបានបញ្ឈប់ទាំងស្រុងចំពោះគម្រោងអាជីវកម្ម ដែលមានលក្ខណៈជាស្កាយបារ ឬបារអាកាស ដែលកំពុងរៀបចំនៅលើដំបូងអគាររោងភាពយន្តផ្លាទីនៀមសៀមរាបខាងលើនោះហើយ និងតម្រូវឲ្យរុះរើចេញរាល់សំណង់សង់បន្ថែម រួមមានគ្រោងដែកដំបូល ។
លោកបានបន្ថែមថា ក្រៅពីបញ្ឈប់គម្រោងបារអាកាសហ្នឹងរួចហើយ ក្រុមកម្លាំងចម្រុះក៏កំពុងត្រួតពិនិត្យទៅតាមជំនាញរៀងៗខ្លួន គឺបរិស្ថានពិនិត្យទៅលើបញ្ហាសំឡេង រីឯទេសចរណ៍ពិនិត្យទៅលើទីតាំង ព្រោះអគារហ្នឹងបានលើកស្លាកឈ្មោះថាជារោងភាពយន្ត តែតាមពិតនៅក្នុងអគារនោះមានអាជីវកម្មជាច្រើនទៀត តួយ៉ាងដូចជាហាងនំ និងក្រុមហ៊ុនទូរសព្ទ័ជាដើម ក៏ប៉ុន្តែពុំមានច្បាប់អ្វី្វទាំងអស់ ។
លោកបានបញ្ជាក់បន្ថែមថា តាមច្បាប់ឬតាមប្រកាសរបស់ក្រសួងទេសចរណ៍ ស្តីពីកន្លែងកម្សាន្តសម្រាប់មនុស្សចាស់ ត្រូវស្ថិតនៅចម្ងាយយ៉ាងតិច២០០ម៉ែត្រពីអគារសាធារណៈ ដូចជាមន្ទីរពេទ្យ សាលារៀន វត្តអារាមជាដើម ដូច្នេះបើពិនិត្យឃើញទីតាំងខាងលើនេះមានផលប៉ះពាល់មែនយើងមិនចេញច្បាប់ឲ្យធ្វើអាជីវកម្មជាដាច់ខាត ។
ទោះជាយ៉ាងនេះក្តី ពេញមួយរសៀលថ្ងៃដដែលនេះ គេមិនអាចទាក់ទងប្រធានរោងភាពយន្តផ្លាទីនៀមសៀមរាប លោក គិត វាសនា បានទេ ដោយទូរស័ព្ទរបស់លោកហៅចូលជាច្រើនដងតែគ្មានអ្នកទទួល ។
សូមរំលឹកថា រោងភាពយន្តផ្លាទីនៀម បានចាប់ផ្តើមដាក់ឲ្យដំណើរការតាំងពីថ្ងៃទី១៧ កក្កដា ឆ្នាំ២០១៥ ដែលក្នុងអគារដ៏ធំនោះមានបម្រើសេវានំដុត និងក្រុមហ៊ុនទូរស័ព្ទផងដែរ ៕
ចែករំលែកព័តមាននេះ