អង្គការអូតង់ស្នើសុំឱ្យមានការបញ្ជូនទ័ព2.000នាក់ទៀតសំរាប់អាហ្វហ្គានីស្ថាន
ដោយ ៖ ប្រុសកោះ
ថ្ងៃចន្ទ ទី៦ ខែកញ្ញា ឆ្នាំ២០១០ ម៉ោង ១៤:៤១
ទូរទស្សន៍ CNN រាយការណ៍កាលពីថ្ងៃទី៦ កញ្ញា ថា កងទ័ពដល់ទៅ២.០០០នាក់ថែមទៀត ក្នុងនោះមានកងទាហានអាមេរិកមួយចំនួននឹងត្រូវបញ្ជូនទៅកាន់ប្រទេសអាហ្វហ្គានីស្ថានរយៈពេលប៉ុន្មានសប្តាហ៍ខាងមុខទៀតនេះ ក្រោមផែនការមួយដែលស្នើឡើងដោយលោកឧត្តមសេនីយ៍ David Petraeus មេបញ្ជាការកងកំលាំងអង្គការអូតង់នៅអាហ្វហ្គានីស្ថាន ។ ប៉ុន្តែទោះបីជាបែបណា លោកឧត្តមសេនីយ៍ David Petraeus មិនបានធ្វើការអត្ថាធិប្បាយជាសាធារណៈស្តីអំពីសេចក្តីត្រូវការទ័ពនោះទេ ។
លោក David Petraeus បានស្នើសុំឱ្យមានការបញ្ជូនកងទ័ពបន្ថែមទៅអាហ្វហ្គានីស្ថាននៅក្នុងការប្រជុំសំងាត់មួយជាមួយអង្គការអូតង់ ។
យោងតាមប្រភពពីអង្គការអូតង់ថា អង្គការអូតង់បានស្នើសុំការបញ្ជូនកងទ័ព២.០០០នាក់បន្ថែមទៀត ក្នុងនោះមានទាហាន៧៥០នាក់ នឹងធ្វើជាអ្នកហ្វឹកហ្វឺនសំរាប់កងកំលាំងអាហ្វហ្គានីស្ថាន ។ អាជ្ញាធរយោធាអង្គការអូតង់គ្រោងនឹងបើកកិច្ចប្រជុំមួយក្នុងរយៈពេលប៉ុន្មានថ្ងៃខាងមុខនេះ ដើម្បីកំណត់ពីការប្តេជ្ញាចិត្តផ្តល់ទ័ពពីប្រទេសជាសមាជិក ៕
