ខេត្តសៀមរាប ៖ កម្លាំងសមត្ថកិច្ចចម្រុះចុះឆែកឆេរទីតាំងស្តុកម៉ូតូ កង់ ដែលបានដាក់បញ្ចាំគ្មានច្បាប់ទម្លាប់ ក្នុងការចុះបំពេញបេសកកម្មត្រួតពិនិត្យរបស់គណៈកម្មការដោះស្រាយគោលនយោបាយផលប៉ះពាល់
ខេត្តសៀមរាប ៖ កម្លាំងសមត្ថកិច្ចចម្រុះចុះឆែកឆេរទីតាំងស្តុកម៉ូតូ កង់ ដែលបានដាក់បញ្ចាំគ្មានច្បាប់ទម្លាប់ ក្នុងការចុះបំពេញបេសកកម្មត្រួតពិនិត្យរបស់គណៈកម្មការដោះស្រាយគោលនយោបាយផលប៉ះពាល់ ក្នុងគម្រោងស្តារស្ទឹងសៀមរាប ជំហានទី២នេះ កម្លាំងសមត្ថកិច្ចប៉ុស្តិ៍នគរបាលសង្កាត់សៀមរាប ក៏បានរាយការណ៍ជូនដល់លោកអធិការនគរបាលក្រុង និងមានការសម្របសម្រួលដឹកនាំដោយលោក សំរិទ្ធ សុខុន ព្រះរាជអាជ្ញារងអមសាលាដំបូងខេត្តផងដែរ បានចុះពិនិត្យកន្លែងដាក់បញ្ចាំម៉ូតូ កង់ គ្មានច្បាប់ កាលពីវេលាម៉ោង១០និង៣០នាទីព្រឹកនាថ្ងៃទី២១ កក្កដា ២០១៥ ស្ថិតនៅក្នុងភូមិអារ័ញ្ញ សង្កាត់សៀមរាប ក្រុងសៀមរាប ។
មន្ត្រីសមត្ថកិច្ចចម្រុះ បានឱ្យដឹងថា ទីតាំងបញ្ចាំម៉ូតូ កង់ ខាងលើនេះ ពុំមានច្បាប់អនុញ្ញាតឡើយ ដោយមានម្ចាស់ឈ្មោះ ឡាយ គឹមហួ ភេទស្រី អាយុ៦៨ឆ្នាំ ដែលជាជនជរាពិការ ដេកនៅនឹងកន្ទេល ដែលជាអ្នកទទួលបញ្ចាំម៉ូតូ កង់ ទាំងនេះ ។
តាមសម្តីអ្នកជិតខាង បាននិយាយថា លោកយាយពិការខាងលើនេះ បានប្រកបរបរបញ្ចាំម៉ូតូនិងកង់ទំនើបៗនេះជាយូរឆ្នាំមកហើយ ក្នុងការរកប្រាក់ដើម្បីចិញ្ចឹមជីវិតរបស់គាត់ ពុំដែលមានសមត្ថកិច្ច ឬអាជ្ញាធរមូលដ្ឋានណាចុះមកក្បែរទីនេះឡើយ គឺមានម្តងម្កាលកម្លាំងនគរបាលប៉ុស្តិ៍ម្នាក់ សុំមិនបញ្ចេញឈ្មោះតែងតែមកសួរនាំនៅពេលដែលមានការបាត់ម៉ូតូពីកន្លែងផ្សេងៗ ។
ក្នុងប្រតិបត្តិការនេះ កម្លាំងសមត្ថកិច្ច បានឲ្យដឹងថា ម៉ូតូដែលបានចូលមកកន្លែងកុងស៊ីបញ្ចាំនេះ មានចំនួនជាង៧០គ្រឿង ហើយត្រូវបានព្រះរាជអាជ្ញារងបញ្ជាឲ្យប្រមូលនិងដកហូត ដើម្បីដឹកជញ្ជូនយកទៅរក្សាទុកនៅអធិការដ្ឋាននគរបាលក្រុងសៀមរាប រីឯម៉ូតូចំនួន២០គ្រឿង និងនៅសល់ប៉ុន្មានទៀតត្រូវរក្សាទុកនៅទីតាំងនេះដដែលសិន ៕
ព័ត៌មានលម្អិតមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ