ខេត្តបាត់ដំបង ៖ តាមសេចក្តីរាយការណ៍បានឱ្យដឹងថា កាលពីវេលាម៉ោងជាង១០ព្រឹក ថ្ងៃទី៨ កក្កដា នេះនៅចំណុចស្ពានទី២ ក្នុងភូមិអូរដំបង ឃុំអូរដំបង២ ស្រុកសង្កែ មានករណីជនសង្ស័យម្នាក់ឆក់កាបូបស្ពាយពីក្រោយ(សាក់កាដូ)របស់ជនបរទេស២នាក់ប្តី ប្រពន្ធ ខណៈពេលពួកគេកំពុងជិះឡូរី។
ជនរងគ្រោះជាប្តីឈ្មោះម៉ៃឃើល ហុក អាយុ៤៨ឆ្នាំ និងប្រពន្ធឈ្មោះលីស្សា កាក់លីន អាយុ៤៥ឆ្នាំ ជាជនជាតិអាហ្វ្រិកខាងត្បូង។
ជនរងគ្រោះបានឱ្យដឹងថា ក្នុងកាបូបស្ពាយដែលជនសង្ស័យឆក់ទៅមានលិខិតឆ្លងដែន វីហ្សា ទូរស័ព្ទអាយហ្វូន កាតATM និងមានលុយប្រហែល២០ដុល្លារ។
សេចក្តីរាយការណ៍បានបញ្ជាក់ថា ជនសង្ស័យជាមនុស្សស្គាល់គ្នាជាមួយម្ចាស់ឡូរី។ មុនពេលកើតហេតុ ជនរងគ្រោះបានជិះឡូរីចេញពីស្ថានីយរថភ្លើងអូរដំបងឆ្ពោះទៅស្ថានីយអូរស្រឡៅ ដោយជនសង្ស័យសុំជិះទៅជាមួយដែរ លុះពេលត្រឡប់មកវិញដល់ពាក់កណ្តាលផ្លូវមានឡូរីមួយទៀតជិះមកដែរ ពេលនោះម្ចាស់ឡូរីនោះក៏បានឈប់ ហើយលើកឡូរីចេញពីផ្លូវដើម្បីឱ្យឡូរីដែលជនរងគ្រោះជិះធ្វើដំណើរបន្តទៅមុខទៀត។
ខណៈពេលឡូរីកំពុងឈប់ជៀសគ្នានោះ ជនសង្ស័យបានឆ្លៀតឱកាសឆក់យកកាបូបស្ពាយរបស់ជនរងគ្រោះហើយព្យាយាមរត់គេចខ្លួន។ ភ្លាមៗនោះបានធ្វើឱ្យផ្អើលដល់សមត្ថកិច្ចចេញអន្តរាគមន៍ដេញប៉ផាប់ចាប់ពភីង តែចាប់មិនបានទេដោយសារជនសង្ស័យរត់គេចខ្លួនចូលក្នុងតំបន់ព្រៃស្មុគស្មាញពេក ដោយសមត្ថកិច្ចបានរកឃើញតែកាបូបស្ពាយរបស់ជនរងគ្រោះដែលជនសង្ស័យបោះចោលតាមផ្លូវ។
នៅក្នុងកាបូបស្ពាយនោះសមត្ថកិច្ចបានឆែកឃើញមានលិខិតឆ្លងដែន វីហ្សា កាតATM ចំណែកលុយ និងទូរស័ព្ទត្រូវជនសង្ស័យយកទៅបាត់ហើយ។
ពេលនេះសមត្ថកិច្ចកំណត់មុខសញ្ញាជនសង្ស័យបានហើយ ហើយកំពុងតែតាមប្រមាញ់៕
ចែករំលែកព័តមាននេះ