ប្រធានាធិបតីអាមេរិកលោកបារ៉ាក់ អូបាម៉ា អះអាងកាលពីថ្ងៃទី៦ កក្កដាថា ក្រុមចម្រុះអន្តរជាតិនាំមុខដោយសហរដ្ឋអាមេរិក ប្តេជ្ញាបង្កើនការតស៊ូប្រឆាំងក្រុមរដ្ឋអ៊ិស្លាមនៅស៊ីរី ដោយអះអាងជាថ្មីថា យុទ្ធនាការ
ប្រធានាធិបតីអាមេរិកលោកបារ៉ាក់ អូបាម៉ា អះអាងកាលពីថ្ងៃទី៦ កក្កដាថា ក្រុមចម្រុះអន្តរជាតិនាំមុខដោយសហរដ្ឋអាមេរិក ប្តេជ្ញាបង្កើនការតស៊ូប្រឆាំងក្រុមរដ្ឋអ៊ិស្លាមនៅស៊ីរី ដោយអះអាងជាថ្មីថា យុទ្ធនាការប្រឆាំងពួកជីហាដនឹងមានរយៈពេលយូរអង្វែង ។
ក្នុងសេចក្តីថ្លែងការណ៍មួួយឯមន្ទីរប៉ង់តាហ្គោន លោកអូបាម៉ា មានប្រសាសន៍ថា យើងបង្កើនការខិតខំប្រឹងប្រែងប្រឆាំងបណ្តាមូលដ្ឋានរបស់ក្រុមរដ្ឋអ៊ិស្លាមនៅស៊ីរី ។ ការវាយប្រហារតាមអាកាសរបស់យើងនឹងបន្តសំដៅលើបណ្តាទីតាំងប្រេងកាត និងឧស្ម័នដែលជាប្រភពផ្តល់ហិរញ្ញវត្ថុដល់បណ្តាប្រតិបត្តិការរបស់ពួកជីហាដ។ យើងក៏វាយប្រហារផងដែរលើបណ្តាថ្នាក់ដឹកនាំ និងបណ្តាហេដ្ឋារចនាសម្ព័ន្ធរបស់ក្រុមរដ្ឋអ៊ិស្លាមនៅស៊ីរី ។
ក្រុមចម្រុះដឹកនាំដោយសហរដ្ឋអាមេរិករយៈពេលបុ៉ន្មានថ្ងៃចុងក្រោយនេះបានធ្វើការវាយប្រហារតាមអាកាសយ៉ាងខ្លាំងក្លាពុំធ្លាប់មានពីមុនមកលើទីក្រុងរ៉ាកា ដែលក្លាយជារដ្ឋធានីរបស់ក្រុមរដ្ឋអ៊ិស្លាមនៅស៊ីរី ដោយកម្ទេចបណ្តាហេដ្ឋារចនាសម្ព័ន្ធដែលពួកជីហាដប្រើប្រាស់ ។ ការវាយប្រហារទាំងនេះបណ្តាលឱ្យមនុស្សស្លាប់យ៉ាងតិច៣០នាក់ ។ នេះជាការអះអាងរបស់អង្គការសិទ្ធិមនុស្សស៊ីរី OSDH ដែលមានប្រភពព័ត៌មានច្រើន ។
យោងតាមរដ្ឋមន្ត្រីការពារប្រទេសអាមេរិក លោក ASHTON CARTER ថា ការទម្លាក់គ្រាប់បែករបស់អាមេរិកដំបូងបំផុតសំដៅជួយទ្រទ្រង់ដល់ការវាយរុលទៅមុខរបស់កងកម្លាំងឃើត ។
អង្គការ OSDH រាយការណ៍ម្យ៉ាងទៀតថា ក្រុមរដ្ឋអ៊ិស្លាមកាលពីថ្ងៃទី៦ កក្កដា វាយដណ្តើមយកទីក្រុង AIN ISSA ពីពួកយុទ្ធជនឃើតក្រោយការវាយលុកយ៉ាងខ្លាំងក្លាមួយដែលបណ្តាលឱ្យមនុស្សស្លាប់ជាច្រើនសិបនាក់ខាងភាគីពួកឃើត ។ ក្រុមរដ្ឋអ៊ិស្លាមដណ្តើមត្រួតត្រាទីក្រុងនេះ និងតំបន់ជុំវិញក្នុងយុទ្ធនាការនៅខាងកើតខេត្តរ៉ាកាភាគខាងជើងស៊ីរី ។ ក្រុមរដ្ឋអ៊ិស្លាមបាត់បង់ទីក្រុងនេះធ្លាក់ក្នុងកណ្តាប់ដៃពួកឃើតកាលពីខែមុន ។ ពួករដ្ឋអ៊ិស្លាមបានធ្វើការវាយបកវិញដើម្បីដណ្តើមយកទីក្រុងនេះកាលពីថ្ងៃទី៦ កក្កដា ព្រោះជាទីក្រុងយុទ្ធសាស្ត្រមួយស្ថិតនៅក្បែរទីក្រុងរ៉ាកា ។ ពេលទីក្រុងនេះធ្លាក់ក្នុងដៃពួកឃើត ក្រុមរដ្ឋអ៊ិស្លាមហាក់រងការគំរាមកំហែង ព្រោះពួកយុទ្ធជនឃើតនៅចម្ងាយត្រឹមតែ៣០គីឡូម៉ែត្រពីក្រុងរ៉ាកា ៕
ចែករំលែកព័តមាននេះ