ខេត្តកំពង់ឆ្នាំង ៖ បុរសម្នាក់រងរបួសយ៉ាងធ្ងន់ធ្ងរ បន្ទាប់ពីជិះម៉ូតូលឿនហួសផ្លូវហោះទៅបុកនឹងរបងថ្ម កាលពីវេលាម៉ោង០៨ និង៣០នាទីយប់ថ្ងៃទី៣ កក្កដា ២០១៥ ស្ថិតនៅលើកំណាត់ផ្លូវជាតិលេខ៥៣ចំណុចលូទឹក ក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង។
មន្ត្រីនគរបាលក្រុងកំពង់ឆ្នាំងបានឱ្យដឹងថា នៅមុនពេលកើតហេតុ គេឃើញជនរងគ្រោះរូបនោះបានជិះម៉ូតូម៉ាកស៊ុយហ្សុយគី
ស្មាស់រីវ៉ូ ពណ៌ខ្មៅ ពាក់ស្លាកលេខកំពង់ឆ្នាំង 1D-2682 ក្នុងដំណើរពីត្បូងទៅជើង តាមបណ្តោយផ្លូវលំ ក្នុងល្បឿនយ៉ាងលឿន លុះមកដល់ចំណុចកើតហេតុ ជាផ្លូវឡើងប្រសប់ជាមួយផ្លូវជាតិ ជនរងគ្រោះបានបើកហួសថ្នល់ជាតិហោះទៅបុកនឹងរបងថ្ម ដែលមានចម្ងាយប្រមាណ៦ម៉ែត្រ បណ្តាលឱ្យរងរបួសជាទម្ងន់ និងសន្លប់នៅនឹងកន្លែងតែម្តង។
ភ្លាមៗនោះ គេមិនបានស្គាល់អត្តសញ្ញាណជនរងគ្រោះនោះទេ តែបន្តិចក្រោយមកមានមិត្តភក្តិបានមកដល់អះអាងថា ជនរងគ្រោះទើបតែបែកចេញពីខ្លួនមុននេះបន្តិច ស្រាប់តែមកជួបគ្រោះថ្នាក់បែបនេះ ។ មិត្តភក្តិរូបនោះបានបញ្ជាក់ទៀតថា ជនរងគ្រោះមានឈ្មោះសុទ្ធ បញ្ញា អាយុ២៣ឆ្នាំ មានទីលំនៅភូមិស្រះកែវ ឃុំ មេលុំ ស្រុកបរិបូរណ៍ ។
ក្រោយពេលកើតហេតុ សមត្ថកិច្ចនគរបាលបានហៅរថយន្តរបស់មន្ទីពេទ្យខេត្តដឹកជនរងគ្រោះទៅសង្គ្រោះនៅមន្ទីរពេទ្យ ចំណែកម៉ូតូដែលរងការខូចខាងមួយកំណាត់មុខ ត្រូវបានសមត្ថកិច្ចនគរបាលក្រុងកំពង់ឆ្នាំង ដឹកមករក្សាទុកនៅអធិការដ្ឋាននគរបាលក្រុងដើម្បីរក្សាទុកឱ្យម្ចាស់ដើមវិញ ៕
ចែករំលែកព័តមាននេះ