ក្រុមចោរហារយប្រើកាំភ្លើងអាកា ចូលប្លន់ផ្ទះអ្នកទិញ-លក់អេតចាយ
ដោយ ៖ អប្សរា
ថ្ងៃសុក្រ ទី១៩ ខែមិនា ឆ្នាំ២០១០ ម៉ោង ១៧:១៤
ខេត្ដតាកែវ ៖ ក្រុមចោរប្រដាប់ដោយ កាំភ្លើងAK ចំនួន៧នាក់បានចូលធ្វើសកម្មភាពប្លន់ផ្ទះអ្នករកស៊ីទិញលក់អេតចាយមួយកន្លែង និងបានចាកចេញទៅវិញដោយសុវត្ថិភាព ខណៈពេលដែលម្ចាស់ផ្ទះរងគ្រោះកំពុងរៀបចំអីវ៉ាន់ទុកដាក់ក្នុងផ្ទះ ដោយមិនទាន់ទាំងបិទទ្វារ និងពន្លត់ភ្លើងផង កាលពីថ្ងៃទី ១៨ មីនា វេលាម៉ោង៧យប់នៅក្នុងភូមិតាឡូង ឃុំកំពែង ស្រុកព្រៃកប្បាស ខេត្ដតាកែវ ។
លោកវរសេនីយ៍ត្រីជុំ ឈឿន អធិការប៉ូលិសស្រុកព្រៃកប្បាសបានឱ្យកោះសន្ដិភាពដឹងថា ម្ចាស់ផ្ទះរងគ្រោះមានឈ្មោះអ៊ុយ សុខហេង ភេទប្រុស អាយុ៣១ឆ្នាំ ប្រពន្ធឈ្មោះយូ លៀងឈន អាយុ២៥ឆ្នាំ រស់នៅភូមិកើតហេតុខាងលើមានកូនចំនួន២នាក់។ ពេលកំពុងមមាញឹកក្នុងការជញ្ជូនសំភារចូលផ្ទះនោះស្រាប់តែមានមនុស្សដើរចូលមកយកកាំភ្លើងភ្ជង់ និងខ្លះទៀតបានចាប់ចងដោយសំឡុតគំរាមសួររកលុយ និងមាស ហើយពួកចោរខ្លះបានដើររើកកាយរកវត្ថុមានតំលៃ ។
លោកអធិការប៉ូលិសស្រុកបានបន្ដឱ្យដឹងទៀតថា សំភារដែលក្រុមចោរកាំភ្លើងAK នោះប្រមូលបានមានលុយ២លាន៥សែនរៀល មាស១តម្លឹង៦ជី ក្នុងនោះខ្សែ.កមាស១តម្លឹង ចិញ្ចៀនត្រា៦ជី គ្រឿងអលង្ការធ្វើពីបា្លទីន១តម្លឹង និងទូរស័ព្ទដៃ២គ្រឿង ។
ព័ត៌មានលំអិតនឹងផ្សាយជូននៅពេលក្រោយ និងនៅលើទំព័រកាសែតកោះសន្ដិភាព ។
