ជប៉ុនជាប់ចំណាត់ថ្នាក់ជាប្រទេសមានអត្រាអ្នកធ្វើអត្តឃាតខ្ពស់បំផុតលើពិភពលោក
ដោយ ៖ ប្រុសកោះ
ថ្ងៃពុធ ទី៨ ខែកញ្ញា ឆ្នាំ២០១០ ម៉ោង ០៩:៥៩
រដ្ឋាភិបាលជប៉ុនថ្លែងថា ការធ្វើអត្តឃាត និងទុក្ខព្រួយបានធ្វើឱ្យសេដ្ឋកិច្ចរបស់ជប៉ុនខាតបង់អស់ប្រាក់ជិត២,៧ពាន់លានយេន ប្រហែល៣២ពាន់លានដុល្លារអាេមរិក កាលពីឆ្នាំ២០០៩កន្លងមក ។ នេះជាលើកទី១ហើយដែលជប៉ុនលាតត្រដាងតួលេខនៃការខាតបង់ផ្នែកសេដ្ឋកិច្ចនេះ ។ តាមរបាយការណ៍មួយថា ជប៉ុនជាប្រទេសមួយដែលមានចំនួនអ្នកធ្វើអត្តឃាតច្រើនបំផុតនៅលើពិភពលោក ដោយកាលពីឆ្នាំ២០០៩កន្លងមក មានពលរដ្ឋដល់ទៅ៣២.០០០នាក់បានធ្វើអត្តឃាត ។
ដោយសារហេតុផលនេះ នាយករដ្ឋមន្ត្រីជប៉ុន លោកណាអូតូ កាន បានមើលឃើញថា ជាភស្តុតាងមួយដែលនាំឱ្យសេដ្ឋកិច្ចរបស់ជប៉ុនមានការធ្លាក់ចុះ ។ លោកនាយករដ្ឋមន្ត្រីណាអូតូកាន ថ្លែងថា ពេលនេះរដ្ឋាភិបាលរបស់លោកបាននិងព្យាយាមបង្កើតអង្គភាពពិសេសមួយដើម្បីកាត់បន្ថយ និងទប់ស្កាត់អត្រាអ្នកធ្វើអត្តឃាត ។ បុព្វហេតុនៃការធ្វើអត្តឃាតរបស់ពលរដ្ឋជប៉ុនភាគច្រើនគឺដោយសារទុក្ខព្រួយ និងរោគតប់ប្រមល់៕
