រាជធានីភ្នំពេញ ៖ មានករណីបាញ់ប្រហារមួយបានកើតឡើងកាលពីវេលាម៉ោងជាង៧យប់ថ្ងៃទី១៤ មិថុនា ២០១៥ នៅក្នុងហាងគុយទាវឆ្នាំងភ្លើងសឹងហ៊ឹភ្នំពេញ ស្ថិតតាមផ្លូវលេខ៦៣ កែងផ្លូវ៣៩២ សង្កាត់បឹងកេងកង១ ខណ្ឌចំការមន បណ្តាលអោយបុរសម្នាក់បានស្លាប់ភ្លាមៗនៅនឹងកន្លែងកើតហេតុ ។
ប្រភពព័ត៌មានជំហានដំបូងបានអោយដឹង បុរសរងគ្រោះមានអាយុប្រហែល៣៥ឆ្នាំ ពាក់អាវស ខោខ្មៅ (អាវក្នុងខោ) ជិះម៉ូតូម៉ាកអាយខុន ពណ៌ទឹកក្រូច លាយស ពាក់ស្លាកលេខ ភ្នំពេញ 1AC-7591 តែម្នាក់ឯង ចំណែកឯជនសង្ស័យជាខ្មាន់កាំភ្លើងជិះម៉ូតូម៉ាកហុងដាឌ្រីម មានគ្នា២នាក់ ។
ខណៈជិះមកដល់ចំណុចមុខហាងគុយទាវឆ្នាំងភ្លើងសឹងហ៊ឹ ភ្នំពេញ ជនសង្ស័យ និងជនរងគ្រោះហាក់ដូចជាឈ្លោះគ្នា ពេលនោះជនរងគ្រោះក៏រត់ចូលទៅក្នុងហាងគុយទាវ ហើយខ្មាន់កាំភ្លើងទាំង២ក៏រត់ចូលតាម ។ ពេលចូលទៅដល់ក្នុងហាងគុយទាវជនរងគ្រោះក៏ហូតខ្សែក្រវ៉ាត់ដើម្បីការពារខ្លួន តែត្រូវជនសង្ស័យម្នាក់ក្នុងចំណោមនោះដកកាំភ្លើងបាញ់២គ្រាប់ចំជនរងគ្រោះស្លាប់ភ្លាមមួយរំពេច ។
ក្រោយពេលបាញ់ប្រហារ ខ្មាន់កាំភ្លើងទាំង២នាក់ក៏រត់សំដៅមកម៉ូតូរបស់ខ្លួនដែលនៅខាងក្រៅ ហើយបាញ់ឡើងលើ២គ្រាប់ទៀតដើម្បីបើកផ្លូវរត់គេចខ្លួន ។
សមត្ថកិច្ចនៅមិនទាន់អាចសន្និដ្ឋានបាននៅឡើយទេថា ការបាញ់ប្រហារជនរងគ្រោះរហូតដល់ស្លាប់នេះដោយសារមូលហេតុអ្វីទេ ។
ព័ត៌មានបន្ថែមនឹងមានផ្សាយជូននៅពេលក្រោយ ៕
ចែករំលែកព័តមាននេះ