ទាហានអាមេរិក៤នាក់ស្លាប់កាលពីថ្ងៃទី២២ សីហា នៅភាគខាងកើត និងភាគខាងត្បូងអាហ្វហ្គានីស្ថាន ចំណែកនៅភាគខាងជើងប្រទេសនេះវិញ អតីតប្រមុខឧទ្ទាមប្រឆាំងសូវៀតម្នាក់បានត្រូវស្លាប់ក្នុងការផ្ទុះគ្រាប់បែកមួយគ្រាប់ ។ យោងតាមអង្គការអូតង់ថា ក្នុងចំណោមទាហានទាំង៤នាក់នេះ ទាហាន៣នាក់ស្លាប់ក្នុងការវាយប្រហាររបស់ពួកបះបោរ ហើយទាហានទី៤ ស្លាប់ដោយសារការផ្ទុះគ្រាប់បែកច្នៃមួយគ្រាប់ ។ ការស្លាប់ទាហានអាមេរិកទាំង៤នាក់នេះទៀត ធ្វើឱ្យទាហានបរទេសស្លាប់នៅអាហ្វហ្គានីស្ថានក្នុងខែសីហាឡើងដល់៤២នាក់ ក្នុង នោះមានទាហានអាមេរិក២៨នាក់ ។ ក្នុងខែកក្កដា ទាហានអាមេរិកស្លាប់នៅអាហ្វហ្គានីស្ថានមានដល់៦៦នាក់ ធ្វើឱ្យខែនេះជាខែដែលមានទាហានអាមេរិកស្លាប់ច្រើនបំផុត ចាប់តាំងពីការលុកលុយប្រទេសនេះពីឆ្នាំ២០០១មក ។
ក្នុងខេត្តហ្វារយ៉ាប (ភាគខាងជើងអាហ្វហ្គានីស្ថាន) គ្រាប់បែកមួយគ្រាប់បញ្ជាឱ្យផ្ទុះពីចំងាយបណ្តាលឱ្យស្លាប់អតីតប្រមុខមូចាហ៊ីឌីន លោកសាឡាអាប ប៉ាហ៍ឡាវ៉ាន ព្រមទាំងកូនរបស់គេ២នាក់ ព្រមទាំងអង្គរក្ស២នាក់ ។ អតីតយុទ្ធជនធ្លាប់តស៊ូប្រឆាំងការលុកលុយរបស់សូវៀត (ពីឆ្នាំ១៩៧៩-៨៩) ដូចជាលោកប៉ាហ៍ឡាវ៉ាន ជាគោលដៅវាយប្រហាររបស់ពួកតាលីបង់ដែលចោទពួកគេថា ជាសម្ព័ន្ធមិត្តរបស់រដ្ឋាភិបាលក្រុងកាប៊ុល ៕
ចែករំលែកព័តមាននេះ