អាជ្ញាធរជប៉ុន កាលពីព្រឹកថ្ងៃទី២៩ ឧសភា បានចេញបញ្ជាឱ្យជម្លៀសប្រជាជនចេញពីកោះតូចមួយនាភាគខាងត្បូងប្រទេស ក្រោយការផ្ទុះគួរឱ្យភ្ញាក់ផ្អើលនូវភ្នំភ្លើងមួយលើកោះនេះ ។
អាជ្ញាធរជប៉ុន កាលពីព្រឹកថ្ងៃទី២៩ ឧសភា បានចេញបញ្ជាឱ្យជម្លៀសប្រជាជនចេញពីកោះតូចមួយនាភាគខាងត្បូងប្រទេស ក្រោយការផ្ទុះគួរឱ្យភ្ញាក់ផ្អើលនូវភ្នំភ្លើងមួយលើកោះនេះ ។
រូបភាពទាំងឡាយនៃទូរទស្សន៍ជប៉ុន NHK បង្ហាញពពកផ្សែងខ្មៅ និងផេះហុយចេញពីភ្នំភ្លើងមានកម្ពស់ដល់៩០០០ម៉ែត្រ ។ អ្នកភូមិប្រមាណជា១៣៧នាក់ត្រៀមចាកចេញពីកោះ KUCHINOERABU នៅចុងខាងត្បូងជប៉ុនតាមនាវារបស់កងឆ្មាំឆ្នេរសមុទ្រ ។
ការផ្ទុះភ្នំភ្លើង SHINDAKE នេះពុំបណ្តាលឱ្យមានជនរងគ្រោះ ឬការខូចខាតសម្ភារធំដុំឡើយ ។ អ្នកនាំពាក្យរដ្ឋាភិបាលលោកយ៉ូស៊ីហ៊ីដ ស៊ូហ្គា អះអាងថា រហូតមកទល់ពេលនេះពុំមានមនុស្សណាម្នាក់រងគ្រោះនៅឡើយ ។ យើងប្រមូលផ្តុំគ្រប់ផ្នែករបស់រដ្ឋដើម្បីធានាសន្តិសុខប្រជាជន ។ បណ្តាឧទ្ធម្ភាគចក្រ និងនាវារបស់កងឆ្មាំឆ្នេរសមុទ្រត្រូវបានបញ្ជូនទៅ ហើយកងទាហាននៃកងកម្លាំងស្វ័យការពារ ក៏ត្រូវបញ្ជូនទៅដែរ ។
ភ្នំភ្លើងនេះបានផ្ទុះនាវេលាម៉ោង៩និង៥៩នាទីម៉ោងក្នុងស្រុក ហើយទីភ្នាក់ងារឧតុនិយមជប៉ុនដែលបង្កើនការប្រកាសអាសន្នកម្រិតខ្ពស់បំផុតនិយាយថា ចាំបាច់ត្រូវជម្លៀសប្រជាជនចេញពីកោះនោះ ។
ភ្នំភ្លើង SHINDAKE ធ្លាប់ផ្ទុះជាលើកដំបូងកាលពីឆ្នាំ១៨៤១ ហើយសកម្មភាពភ្នំភ្លើងបន្តរយៈពេលជាច្រើនទសវត្ស ១៩៣១-១៩៣៥ និង ១៩៦៦-១៩៨០ ។
កាលពីខែកញ្ញា ឆ្នាំ២០១៤ ភ្នំភ្លើងមួយនៅភាគកណ្តាលជប៉ុន គឺភ្នំភ្លើង ONTAKE បានផ្ទុះយ៉ាងខ្លាំងប៉ះពាល់ដល់ពួកអ្នកទេសចរដែលទៅកាន់ទីនោះ រួចមនុស្ស៥៧នាក់ស្លាប់ និង៦នាក់បាត់ខ្លួន ៕
ចែករំលែកព័តមាននេះ