សារព័ត៌មានបរទេសកាលពីថ្ងៃទី២៧ ឧសភា ២០១៥ ផ្សាយថា លោកហ្វេលីក គីប្រូណូ មេធាវីជនជាតិកេនយ៉ា បានប្រកាសតាមរយៈកាសែត «ដឹ ណៃរ៉ូបៀន» កាលពីថ្ងៃទី២៦ ឧសភា ថា លោកត្រៀមប្រាក់ទិញគោចំនួន៥០ក្បាល ចៀម៧០ក្បាល និងពពែ៣០ក្បាល ដើម្បីស្តីដណ្តឹងនាង Malia Obama អាយុ១៦ឆ្នាំ ជាកូនរបស់លោកប្រធានាធិបតីសហរដ្ឋអាមេរិក បារ៉ាក់ អូបាម៉ា សម្រាប់បំពេញក្តីស្រមៃរបស់លោក ដែលចង់បាននាងជាគូអនាគត ដោយមានចំណាប់អារម្មណ៍ទៅលើនាងតាំងពីឆ្នាំ២០០៨មក ។ ការចាប់អារម្មណ៍នោះ ខណៈលោកបារ៉ាក់ អូបាម៉ា កំពុងឈរឈ្មោះបោះឆ្នោតជាប្រធានាធិបតីអាមេរិកលើកដំបូង និងនាង Malia ទើបតែមានអាយុ១០ឆ្នាំប៉ុណ្ណោះ ។
លោកគីប្រូណូ បាននិយាយថា លោកនៅមិនទាន់បានសេពគប់ជាមួយនារីណាម្នាក់នៅឡើយ និងសន្យាថានឹងស្រឡាញ់ស្មោះត្រង់ចំពោះនាង Malia ។ លោកគីប្រូណូបានបញ្ជាក់ប្រាប់រឿងនេះដល់ក្រុមគ្រួសាររបស់ខ្លួនរួច ហើយៗពួកគេយល់ស្រប ។ មិនតែប៉ុណ្ណោះក្រុមគ្រួសារសន្យានឹងជួយរកបណ្ណាការបន្ថែមដើម្បីយកទៅស្តីដណ្តឹងកូនស្រីលោកប្រធានាធិបតីអាមេរិក ។
បុរសមានមហិច្ឆតាខ្ពស់កប់ពពកនោះ សង្ឃឹមថា លោក អូបាម៉ា នឹងនាំកូនស្រីទៅជាមួយក្នុងឱកាសធ្វើដំណើរទស្សនកិច្ចនៅប្រទេសកេនយ៉ា ដែលជាស្រុកកំណើតរបស់លោកនាខែកក្កដា ។
ចំណែកលោកយាយរបស់លោកប្រធានាធិបតីអាមេរិក បារ៉ាក់ អូបាម៉ា មានអាយុ៩០ឆ្នាំ បច្ចុប្បន្នរស់នៅក្រុងកូហ្គេឡូ ភាគខាងលិចប្រទេសកេនយា៉ ព្រមទាំងមានបងប្អូន ញាតិមិត្តជាច្រើននាក់របស់លោកនៅទីនោះ ។
មេធាវីកេនយ៉ា លោកគីប្រូណូ បានសរសេរសំបុត្រផ្ញើទៅលោកអូបាម៉ា ដោយស្នើសុំឱ្យនាំកូនស្រីទៅធ្វើទស្សនកិច្ចនៅប្រទេសកេនយ៉ា ផង និងសង្ឃឹមថា ស្ថានទូតអាមេរិកនឹងជួយបញ្ជូនសំបុត្ររបស់លោកទៅលោកប្រធានាធិបតីអាមេរិកមិនខាន ។ លោកគីប្រូណូ និយាយថា «ខ្ញុំគ្មានបំណងចង់បានអ្នកធំជាខ្សែ ឬចង់បានប្រាក់ទេ ប៉ុន្តែរឿងចម្បងចំពោះខ្ញុំគឺក្តីស្រឡាញ់ចំពោះនាង Malia» ។
មេធាវីរូបនោះមិនបានបង្ហើបឱ្យដឹងពីអាយុរបស់ខ្លួនទេ ដោយបញ្ជាក់ត្រឹមតែថា លោកមានគម្រោងរៀបការជាមួយនាងម៉ាលីយ៉ា និងនៅពេលបាននាងជាប្រពន្ធ លោកនឹងបង្រៀននាងឱ្យស្គាល់ពីរបៀបរស់នៅយ៉ាងងាយស្រួលជាលក្ខណៈកសិករ ដោយបង្រៀនឱ្យចេះរឹតយកទឹកដោះគោ ចម្អិនអាហារ និងធ្វើទឹកដោះគោជូរដូចនារីដទៃទៀតនៅប្រទេសកេនយ៉ា ៕
ចែករំលែកព័តមាននេះ