បន្ទាយមានជ័យ ៖ ស្ត្រីម្នាក់ក្នុងចំណោម២នាក់ត្រូវបានក្រុមចោរឆក់កាបូបអស់ប្រាក់ជាង២០០០ដុល្លាបង្កអោយមានការភ្ញាក់ផ្អើលកាលពីវេលាម៉ោង៦ និង៣៥នាទីល្ងាច ថ្ងៃទី៩ ខែឧសភា ឆ្នាំ២០១៥
បន្ទាយមានជ័យ ៖ ស្ត្រីម្នាក់ក្នុងចំណោម២នាក់ត្រូវបានក្រុមចោរឆក់កាបូបអស់ប្រាក់ជាង២០០០ដុល្លាបង្កអោយមានការភ្ញាក់ផ្អើលកាលពីវេលាម៉ោង៦ និង៣៥នាទីល្ងាច ថ្ងៃទី៩ ខែឧសភា ឆ្នាំ២០១៥ លើដងផ្លូវបេតុងមួយកន្លែងចំណុចព្រំប្រទល់ភូមិបាលិលេយ្យ០១និងភូមិបាលិលេយ្យ០២ សង្កាត់-ក្រុងប៉ោយប៉ែត ខណៈកំពុងជិះម៉ូតូប្រមូលប្រាក់គេជំពាក់ ។
ជនរងគ្រោះខាងលើឈ្មោះលុយ សារួន អាយុ៥៤ឆ្នាំ មានទីលំនៅភូមិនិមិត្តថ្មី សង្កាត់និមិត្ត ក្រុងប៉ោយប៉ែត ជាអាជីវការលក់កូនឈើ ។ ស្ត្រីរងគ្រោះជិះម៉ូតូម៉ាកឌ្រីម សេរីឆ្នាំ២០០៣ ពណ៌ខ្មៅ ពាក់ស្លាកលេខ បន្ទាយមានជ័យ 1G-0816 ជាអ្នកបើកម៉ូតូ ជាមួយអ្នករួមដំណើរម្នាក់ទៀតឈ្មោះប៉ាល់ សុភី អាយុ៥០ឆ្នាំ មានទីលំនៅភូមិភ្នំជញ្ជាំង ឃុំជប់វ៉ារី ស្រុកព្រះនេត្រព្រះ ។
នៅកន្លែងកើតហេតុ ស្ត្រីរងគ្រោះបានអះអាងថា កាបូបប្រាក់របស់គាត់ដែលចោរឆក់នោះមានចំនួន២៣០០ដុល្លា និងឯកសារមួយចំនួនទៀត ។ ស្ត្រីរងគ្រោះក៏ដូចជាអ្នករួមដំណើរបាននិយាយថា ដំបូងពួកគាត់ជិះម៉ូតូដឹកគ្នាមកពីទិសខាងត្បូងក្នុងបំណងរកផ្ទះគ្រួសារមួយដើម្បីទារប្រាក់ជំពាក់ថ្លៃទិញកូនឈើ លុះដល់ចំណុចកើតហេតុស្រាប់តែជនសង្ស័យ២នាក់ជិះម៉ូតូស្របទិសពីក្រោយ ធ្វើសកម្មភាពឆក់កាបូបប្រាក់របស់គាត់ដែលបណ្តោងជាប់និងក្បាលម៉ូតូបានសម្រេច ។
ទោះជាយ៉ាងណា នៅកន្លែងកើតហេតុគេឃើញក្រុមចោរបានបន្សល់ទុកម៉ូតូ១គ្រឿងម៉ាកឌ្រីម មិនទាន់ស្គាល់ស៊េរីឆ្នាំណា ពណ៌ខ្មៅពាក់ស្លាកលេខ បាត់ដំបង 1l-4890 ព្រោះពេលធ្វើសកម្មភាពម៉ូតូរបស់ជនសង្ស័យជ្រុលចង្កូតទៅចូលមុខតូបលក់គ្រឿងសំណង់ បត់ចេញមិនកើត ។
ក្រោយធ្វើសកម្មភាពឆក់កាបូបបានសម្រេច ក្រុមចោរម្នាក់រត់ទៅទិសខាងជើង និងម្នាក់រត់ទៅទិសខាងលិចបាត់ស្រមោល ។
ក្រោយហេតុការណ៍ចោរឆក់នេះកើតឡើង សមត្ថកិច្ចបានចុះដល់កន្លែងកើតហេតុ នាំយកម៉ូតូសង្ស័យ និងជនរងគ្រោះទៅប៉ុស្តិ៍រដ្ឋបាលសង្កាត់ប៉ោយប៉ែត ដើម្បីសាកសួរពីដំណើរដើមរឿង និងធ្វើកំណត់ហេតុ ។
សូមបញ្ជាក់ផងដែរថា នៅព្រឹកថ្ងៃទី១០ ខែឧសភានេះ លោកអ៊ឹម សុភារះ នាយប៉ុស្តិ៍រដ្ឋបាលនគរបាលសង្កាត់ប៉ោយប៉ែតបានប្រាប់តាមទូរស័ព្ទថា មិនទាន់វែកមុខក្រុមជនសង្ស័យឃើញនៅឡើយទេ ប៉ុន្តែលោកថា សមត្ថកិច្ចនៅតែបន្តស្រាវជ្រៀវយ៉ាងក្ដៅគគុករហូតទាល់តែចាប់ជនសង្ស័យបាន ៕
ចែករំលែកព័តមាននេះ