ខេត្តប៉ៃលិន ៖ យុវនារីវ័យក្មេងស្រស់ស្អាតជាបុគ្គលិកកាស៊ីណូម្កុដពេជ្រម្នាក់ខឹងនឹងម្តាយមីងមិនឲ្យដើរលេងជាមួយមិត្តភក្តិរួមការងារ ហើយថែមទាំងវាយនាងជាច្រើនដៃបណ្តាលឱ្យចំភ្លៅ និងទះកំភ្លៀងទាំងសងខាង រួចដាល់ចំភ្នែកឆ្វេង១ដៃ
ខេត្តប៉ៃលិន ៖ យុវនារីវ័យក្មេងស្រស់ស្អាតជាបុគ្គលិកកាស៊ីណូម្កុដពេជ្រម្នាក់ខឹងនឹងម្តាយមីងមិនឲ្យដើរលេងជាមួយមិត្តភក្តិរួមការងារ ហើយថែមទាំងវាយនាងជាច្រើនដៃបណ្តាលឱ្យចំភ្លៅ និងទះកំភ្លៀងទាំងសងខាង រួចដាល់ចំភ្នែកឆ្វេង១ដៃ បណ្ដាលឲ្យរបួសជាំ បានគិតខ្លីដើរចេញទៅក្រៅផ្ទះទិញថ្នាំងងុយដេកយកទៅសម្ងំលេបក្នុងបន្ទប់ផ្ទះជួលប៉ងធ្វើអត្តឃាតខ្លួនតែម្តងតែត្រូវបានគ្រូពេទ្យជួយសង្គ្រោះទាន់ពេល ។ ហេតុការណ៍នេះបានកើតឡើងនៅវេលាម៉ោង៧ និង៤០នាទីយប់ ថ្ងៃទី៨ រហូតដល់ម៉ោង១១ និង៤៥នាទីព្រឹក ថ្ងៃទី៩ ខែឧសភា ឆ្នាំ២០១៥ បន្ទាប់ពីមិត្តភក្តិរួមការងារជាមួយមកហៅទៅធ្វើការ ទើបម្ដាយមីងបានដើរទៅហៅក៏ឃើញនាងក្អួតចង្អោរចេញសុទ្ធតែបាយ និងថ្នាំមួយចំនួននៅក្បែរខ្លួន ហើយក៏ប្រញាប់ដឹកតាមរថយន្តយកទៅសង្គ្រោះនៅមន្ទីរពេទ្យខេត្តប៉ៃលិន ។
នារីក្រមុំរងគ្រោះដែលលេបថ្នាំប៉ងសម្លាប់ខ្លួននេះឈ្មោះលីម សម្ផស្ស អាយុ១៨ឆ្នាំ ជាបុគ្គលិកកាស៊ីណូផ្នែកខាងចែកបៀរ ជាង១ឆ្នាំហើយ មានស្រុកកំណើតឃុំស្អាង ស្រុកស្អាង ខេត្តកណ្ដាល ។ ចំណែកម្តាយមីងឈ្មោះបាក់ ចាន់ អាយុ៣៦ឆ្នាំ បច្ចុប្បន្នរស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ និងមានស្រុកកំណើតនៅស្រុកស្អាង ខេត្តកណ្ដាលដូចគ្នា ។
ម្ដាយមីងរបស់នារីរងគ្រោះបានអោយដឹងនៅក្នងមន្ទីរពេទ្យថា នារីរងគ្រោះនេះត្រូវជាក្មួយរបស់គាត់ ហើយរាល់ម៉ោងចេញពីធ្វើការ គាត់ហាមមិនឲ្យដើរលេងជាមួយមិត្តភកិ្តទេ តែនាងមិនស្ដាប់តាម លុះខឹងខ្លាំងពេកក៏ហៅមកក្នុងបន្ទប់ផ្ទះជួល និយាយគ្នាពីរបីម៉ាត់ ស្រាប់តែនាងតមាត់ ទើបគាត់ទ្រាំមិនបានក៏វាយតែម្តង ។
ស្ត្រីរូបនោះបានបន្តទៀតថា ក្រោយមករូបគាត់ក៏ដើរចេញទៅក្រៅ លុះពេលត្រឡប់មកវិញស្រាប់តែឃើញមិត្តភកិ្តនាងទៅហៅក្មួយស្រីនៅមុខបន្ទប់ដើម្បីទៅបន្តធ្វើការពេលយប់ ស្រាប់តែដើរទៅមើលឃើញក្មួយស្រីរបស់ខ្លួនដេកក្អួតចង្អោរ បន្ទាប់ពីសួរនាំនាងឆ្លើយថាលេបថ្នាំងងុយដេកអស់ជាច្រើនគ្រាប់ ។
នារីរងគ្រោះបានប្រាប់ឲ្យដឹងថា មុនពេលកើតហេតុនាងបានចេញពីធ្វើការនៅកាស៊ីណូម្កុដពេជ្រជាមួយមិត្តភកិ្តទៅដើរលេងមួយសន្ទុះ ដោយមិនបានប្រាប់ម្ដាយមីងឱ្យដឹងមុនឡើ យ ។ ក្រោយមកក៏ត្រឡប់ទៅបន្ទប់ជួលវិញ ហើយម្ដាយមីងក៏ហៅហូបបាយជួបជុំគ្នា ស្រាប់តែគាត់និយាយថា ពេលចេញពីធ្វើការងារវិញត្រូវតែមកផ្ទះ បើចង់ទៅណាមកណាត្រូវឲ្យដំណឹងជាមុន ។ បន្ទាប់មកក៏កើតជាជម្លោះពាក្យសម្ដីមីង និងក្មួយ ធ្វើឲ្យម្ដាយមីងខឹងខ្លាំងពេកទ្រាំមិនបានក៏ជ្រុលវាយទៅលើនាងបួនប្រាំដៃ ចំមុខ និងភ្លៅ ហើយនាងតូចចិត្តរត់ទៅទិញថ្នាំងងុយដេកយកមកសំងំលេបក្នុងបន្ទប់ផ្ទះជួលតាំងពីម៉ោង៧ និង២០នាទីយប់ថ្ងៃទី៨ រហូតដល់ម៉ោង១១ និង៤៥នាទីព្រឹក ថ្ងៃទី៩ ខែឧសភា ឆ្នាំ២០១៥ ទើបក្រុមគ្រួសារដឹកយកទៅសង្គ្រោះ ប៊ិះតែនឹងហួសពេលទៅហើយ សំណាងល្អនាងលេបថ្នាំតិចតួច ៕
ចែករំលែកព័តមាននេះ