រាជធានីភ្នំពេញ ៖ ជនសង្ស័យជាចោរលួចរថយន្តម្នាក់ ត្រូវកម្លាំងសន្តិសុខយាមនៅក្នុងក្រុមហ៊ុនលក់រថយន្តហ៊ីយ៉ាន់ដាយចាប់ឃាត់ខ្លួនប្រគល់ទៅឲ្យប៉ូលិសប៉ុស្ដិ៍ចោមចៅធ្វើការសាកសួរ និងកសាងសំណុំរឿង
រាជធានីភ្នំពេញ ៖ ជនសង្ស័យជាចោរលួចរថយន្តម្នាក់ ត្រូវកម្លាំងសន្តិសុខយាមនៅក្នុងក្រុមហ៊ុនលក់រថយន្តហ៊ីយ៉ាន់ដាយចាប់ឃាត់ខ្លួនប្រគល់ទៅឲ្យប៉ូលិសប៉ុស្ដិ៍ចោមចៅធ្វើការសាកសួរ និងកសាងសំណុំរឿង ចាត់ការតាមផ្លូវច្បាប់ បន្ទាប់ពីជននោះធ្វើសកម្មភាពចូលទៅលួចរថយន្តនៅក្នុងក្រុមហ៊ុនខាងលើមិនបានសម្រេច។
ហេតុការណ៍នេះបានកើតឡើង កាលពីវេលាម៉ោង២រំលងអធ្រាត្រឈានចូល ថ្ងៃទី០៧ ឧសភា ២០១៥ នៅក្នុងក្រុមហ៊ុនលក់រថយន្តហ៊ីយ៉ាន់ដាយមួយកន្លែង ដែលមានទីតាំងនៅម្ដុំរង្វង់មូលថ្នល់បំបែកចោមចៅ ស្ថិតក្នុងភូមិថ្នល់បំបែក សង្កាត់ចោមចៅ ខណ្ឌពោធិ៍សែនជ័យ ។
ជនសង្ស័យដែលត្រូវចាប់ខ្លួនឈ្មោះ អ៊ឹង រតនា អាយុ២១ឆ្នាំ ស្នាក់នៅផ្ទះជួលម្ដុំរោងចក្រ៣ជាន់គ្លេតភី ស្ថិតក្នុងភូមិជម្ពូវ័ន សង្កាត់ចោមចៅ និងមានស្រុកំណើតនៅក្នុងភូមិឈ្លីកក្រោម ឃុំដំណាក់កន្ទួត ស្រុកដងទង់ ខេត្តកំពត។
តាមប្រភពព័ត៌មានបានឲ្យដឹងថា នៅមុនពេលកើតហេតុ ជនសង្ស័យខាងលើបានចូលទៅធ្វើសកម្មភាពលួចយករថយន្តកូរ៉េម៉ាកហ៊ីយ៉ាន់ដាយចំណុះ២តោនកន្លះមួយគ្រឿងនៅក្នុងក្រុមហ៊ុនខាងលើ។ ខណៈពេលកំពុងធ្វើសកម្មភាពត្រូវសន្តិសុខយាមនៅទីនោះប្រទះឃើញទាន់ក៏បាននាំគ្នាចាប់ឃាត់ខ្លួនបានភ្លាមៗ និងបានប្រគល់ទៅឲ្យប៉ូលិសប៉ុស្ដិ៍ចោមចៅដើម្បីសាកសួរ និងកសាងសំណុំរឿងចាត់ការតាមផ្លូវច្បាប់តែម្ដង។
ប្រភពដដែលបានបន្តថា ក្រោយពេលឃាត់ខ្លួនជននោះបានសារភាពថា ខ្លួនពិតជាបានចូលទៅធ្វើសកម្មភាពលួចរថយន្តនោះមែន ដោយសារតែមានការគំរាមកំហែងពីសំណាក់ជនប្រដាប់អាវុធមួយក្រុម ដោយនៅមុនពេលកើតហេតុ ខ្លួនបានទៅលេងសង្សារដែលបម្រើាការនៅហាងខារ៉ាអូខេមួយកន្លែង ស្ថិតនៅតាមបណ្ដោយផ្លូវម៉ៃដា។ លុះពេលត្រឡប់មកវិញ ខ្លួនបានជិះម៉ូតូឌុប១គ្រឿង ហើយពេលទៅដល់ផ្លូវលេខ២០០៤ បានជួបនឹងជនប្រដាប់អាវុធ១ក្រុមមានគ្នា៤នាក់ ជិះរថយន្ត១គ្រឿងម៉ាកកាមរីឆ្លាម។
ខណៈនោះក៏ត្រូវមនុស្ស១ក្រុមនោះចាប់ក្រៀកខ្លួនដាក់ក្នុងរថយន្តគំរាមសម្លាប់ចោល និងបានបង្ខំឲ្យចូលទៅលួចរថយន្ត១គ្រឿងម៉ាកហ៊ីយ៉ាន់ដាយចំណុះ២តោនកន្លះ ដោយជនទាំងនោះបានប្រាប់ថា រថយន្តនោះមានសោនៅជាប់ស្រាប់។ ពេលនោះដោយខ្លាចជនប្រដាប់អាវុធខាងលើបាញ់សម្លាប់ខ្លួនក៏បានផ្សងគ្រោះថ្នាក់ផ្លោះរបងចូលទៅក្នុងក្រុមហ៊ុនលក់រថយន្តហ៊ីយ៉ាន់ដាយនោះដើម្បីចូលទៅលួចរថយន្ត ដោយខ្មាន់កាំភ្លើងទាំងនោះបានភ្ជង់រហូតដល់ពេលខ្លួនផ្លោះរបង ។ លុះចូលទៅដល់បានឃើញមានរថយន្តដែលមានភិនភាគដូចជនប្រដាប់អាវុធទាំងនោះប្រាប់មែន ហើយខ្លួនក៏បានធ្វើសកម្មភាពលួច ប៉ុន្តែសំណាងអាក្រក់ត្រូវសន្តិសុខចាប់ខ្លួនប្រគល់ឲ្យប៉ូលិសតែម្ដង ចំណែកជនទាំងនោះបានរត់គេចខ្លួនបាត់ស្រមោល៕
ចែករំលែកព័តមាននេះ