វិមានក្រឹមឡាំងគូសបញ្ជាក់កាលពីថ្ងៃទី៣០ មេសាថា មេដឹកនាំកូរ៉េខាងជើង លោកគីម ជុងអ៊ុន បានលុបចោលទស្សនកិច្ចរបស់លោកនៅទីក្រុងមូស្គូ ដើម្បីចូលរួមក្នុងពិធីនានារំលឹកដល់ទិវា
វិមានក្រឹមឡាំងគូសបញ្ជាក់កាលពីថ្ងៃទី៣០ មេសាថា មេដឹកនាំកូរ៉េខាងជើង លោកគីម ជុងអ៊ុន បានលុបចោលទស្សនកិច្ចរបស់លោកនៅទីក្រុងមូស្គូ ដើម្បីចូលរួមក្នុងពិធីនានារំលឹកដល់ទិវាជ័យជម្នះក្នុងសង្គ្រាមលោកលើកទី២ គ្រោងធ្វើនាថ្ងៃទី៩ ឧសភា ខាងមុខនេះ ។
អ្នកនាំពាក្យវិមានក្រឹមឡាំង លោកឌីមីឌ្រី ប៉េស្កូវ ថ្លែងថា យើងទទួលបានសេចក្តីជូនដំណឹងពីសេចក្តីសម្រេចចិត្តនោះតាមផ្លូវការទូត។ មេដឹកនាំកូរ៉េខាងជើងលើកហេតុផលពីការលុបចោលនោះថា មកពីកិច្ចការក្នុងស្រុកច្រើនត្រូវធ្វើ។
ប្រទេសកូរ៉េខាងជើងធ្លាប់បានអះអាងកាលពីដំណាច់ខែមករា ពីទស្សនកិច្ចនោះរបស់លោកគីម ជុងអ៊ុន នៅក្រុងមូស្គូ ។ លោកប៉េស្កូវ បានបដិសេធពាក្យចចាមអារ៉ាមនានាដែលថា ការសម្រេចចិត្តនោះរបស់មេដឹកនាំកូរ៉េខាងជើងធ្វើឡើងបន្ទាប់ពីក្រុងមូស្គូ ទទួលការព្រមាននានាពីប្រទេសឯទៀតៗប្រឆាំងវត្តមានលោកគីម ជុងអ៊ុន នៅក្រុងមូស្គូ ។
លោកអះអាងថា ពិតជាពុំមានរឿងបែបនេះទេ ។ សម្រាប់ពេលនេះពុំមានគម្រោងណាមួយនៃការជួបគ្នាជាយថាហេតុរវាងប្រធានាធិបតីរុស្ស៊ី លោកវ្ល៉ាឌីមៀរ ពូទីន និងលោកគីម ជុងអ៊ុន ឡើយ ។
អ្នកនាំពាក្យរូបនេះក៏អះអាងផងដែរថា មេដឹកនាំរបស់ប្រទេសចំនួន៣០ និងអង្គការអន្តរជាតិទាំងឡាយនឹងមកចូលរួមក្នុងពិធីនានាគ្រោងធ្វើនាថ្ងៃទី៩ ឧសភា នៅក្រុងមូស្គូ ។
ជារៀងរាល់ឆ្នាំ ប្រទេសរុស្ស៊ីតែងប្រារព្ធធ្វើទិវា៩ ឧសភា ជាទិវាកំណត់ពីជ័យជម្នះប្រឆាំងអាល្លឺម៉ង់ ណាហ្ស៊ី ក្នុងមហាសង្គ្រាមស្នេហាជាតិ ជាពាក្យដែលរុស្ស៊ីប្រើសំដៅលើសង្គ្រាមលោកលើកទី២ ៕
ចែករំលែកព័តមាននេះ