រាជធានីភ្នំពេញ ៖ មេធាវីការពារក្តីជនជាប់ចោទ ថោង សារ៉ាត់ បានថ្លែងប្រាប់អ្នកសារព័ត៌មានថា ចៅក្រមសាលាដំបូងរាជធានី កាលពីរសៀលថ្ងៃទី២៣ មេសា បានបន្តសាកសួរលោក ថោង សារ៉ាត់ ទាក់ទងនឹងឃាតក.ម្មលើលោកឧកញ៉ា អ៊ឹង ម៉េងជឺ
រាជធានីភ្នំពេញ ៖ មេធាវីការពារក្តីជនជាប់ចោទ ថោង សារ៉ាត់ បានថ្លែងប្រាប់អ្នកសារព័ត៌មានថា ចៅក្រមសាលាដំបូងរាជធានី កាលពីរសៀលថ្ងៃទី២៣ មេសា បានបន្តសាកសួរលោក ថោង សារ៉ាត់ ទាក់ទងនឹងឃាតកម្មលើលោកឧកញ៉ា អ៊ឹង ម៉េងជឺ ។ ការសាកសួរនេះ ធ្វើឡើងនៅចំពោះមុខមេធាវីការពារក្តីជនជាប់ចោទ និងមេធាវីការពារក្តីរបស់គ្រួសារលោកឧកញ៉ា អ៊ឹង ម៉េងជឺ គឺលោកមេធាវី ឡាច សំរោង ។
នៅវេលាម៉ោង២រសៀល ថ្ងៃទី២៣ មេសា អនុរក្សពន្ធនាគារព្រៃ.ស បាននាំខ្លួនលោក ថោង សារ៉ាត់ មកកាន់សាលាដំបូងរាជធានីភ្នំពេញដើម្បីសាកសួរពីរឿងឃាតកម្មលោកឧកញ៉ា អ៊ឹង ម៉េងជឺ កាលពីថ្ងៃទី២២ ខែវិច្ឆិកា ឆ្នាំ២០១៤កន្លងទៅ ។ ជាការកត់សម្គាល់ លោកថោង សារ៉ាត់ ត្រូវបានស្លៀកសម្លៀកបំពាក់ពណ៌ទឹកក្រូចជាសម្លៀកបំពាក់អ្នកទោសរួចទៅហើយ បន្ទាប់ពីត្រូវឃុំខ្លួនពីថ្ងៃទី១៧ មេសារហូតមក ។
ថោង សារ៉ាត់ ត្រូវបានចាប់ខ្លួនដោយសមត្ថកិច្ចប្រទេសវៀតណាមនៅវេលាម៉ោង៩យប់ថ្ងៃទី១៦ មេសា និងបានបញ្ជូនមកឱ្យសមត្ថកិច្ចប្រទេសកម្ពុជានៅច្រកព្រំដែនបាវិត ហើយត្រូវបានបញ្ជូនមកកាន់នាយកដ្ឋានកណ្តាលសន្តិសុខនៃក្រសួងមហាផ្ទៃ និងស្នងការដ្ឋានរាជធានីភ្នំពេញ ។ បន្ទាប់មកបានបញ្ជូនមកកាន់តុលាការកាលពីរសៀលថ្ងៃទី១៧ មេសា ហើយក៏ត្រូវបានឃុំខ្លួននៅពន្ធនាគារព្រៃសតែម្តង ។
ប្រភពពីសាលាដំបូងរាជធានីភ្នំពេញអះអាងថា ថោង សារ៉ាត់ ត្រូវបានចោទប្រកាន់ពីបទប្រើប្រាស់ និងកាន់កាប់អាវុធខុសច្បាប់ ផ្តួចផ្តើមគំនិតមនុស្សឃាតដោយចេតនា ។ យោងតាមបទចោទប្រកាន់នេះ ជនជាប់ចោទអាចប្រឈមនឹងការជាប់ពន្ធនាគារអស់មួយជីវិត ។
ការសាកសួរ ថោង សារ៉ាត់ នៅពេលនេះស្របពេលដែលតុលាការបានសាកសួរភរិយារបស់លោកឧកញ៉ា អ៊ឹង ម៉េងជឺ គឺអ្នកស្រី តាំង គឹមឆេង កាលពីថ្ងៃទី៧ មេសា កន្លងមក និងការឆ្លើយរបស់ក្រុមអង្គរក្សចំនួន៤នាក់របស់ជនជាប់ចោទ ថោង សារ៉ាត់ ដែលពេលនេះកំពុងជាប់ឃុំឃាំងនៅពន្ធនាគារព្រៃសរួចទៅហើយដែរ ៕
ចែករំលែកព័តមាននេះ