យមរាជជាប់គុក51ឆ្នាំ តវ៉ាសុំនៅក្រៅឃុំ
រាជធានីភ្នំពេញ ៖ ចៅក្រមសាលាដំបូងរាជធានីភ្នំពេញ នៅថ្ងៃទី២២ ខែមេសា ឆ្នាំ២០១៥ បានបញ្ចប់សវនាការសំណុំរឿងប៉ុនប៉ងធ្វើឃាតលោកនាយឧត្តមសេនីយ៍ សៅ សុខាមេបញ្ជាការកងរាជអាវុធហត្ថលើផ្ទៃប្រទេស
រាជធានីភ្នំពេញ ៖ ចៅក្រមសាលាដំបូងរាជធានីភ្នំពេញ នៅថ្ងៃទី២២ ខែមេសា ឆ្នាំ២០១៥ បានបញ្ចប់សវនាការសំណុំរឿងប៉ុនប៉ងធ្វើឃាតលោកនាយឧត្តមសេនីយ៍ សៅ សុខាមេបញ្ជាការកងរាជអាវុធហត្ថលើផ្ទៃប្រទេសលោក អ៊ុក សាវុធ អគ្គព្រះរាជអាជ្ញាអមសាលាឧទ្ធរណ៍ និងសម្លាប់លោកចៅក្រម សុក សេដ្ឋាមុនី ក្នុងឆ្នាំ២០០៣ ដែលមានជនជាប់ចោទឈ្មោះ ហង្ស វុទ្ធី រហស្សនាមយមរាជ ភេទប្រុស អាយុ៤៦ឆ្នាំ ជាអ្នកប្រព្រឹត្តតាមបញ្ជា ហេង ពៅ ។
ក្រោយសាកសួរដេញដោលលើបណ្តឹងជំទាស់របស់ជនជាប់ចោទពេញមួយថ្ងៃ ចៅក្រមបានប្រកាសពន្យារពេលប្រកាសសាលក្រមនៅថ្ងៃទី៣០ ខែមេសា ខាងមុខ ។ ក្នុងពេលសវនាការ ចៅក្រមបានលើកឡើងថាជនជាប់ចោទ និងបក្សពួកបីនាក់ទៀតត្រូវបានចោទប្រកាន់ថា ប៉ុនប៉ងមនុស្សឃាត ។ ក្នុងពេលនោះតុលាការបានកាត់ទោសកំបាំងមុខដាក់គុក១៥ឆ្នាំ ។ ដោយមិនសុខចិត្តចំពោះការសម្រេចនេះជនជាប់ចោទបានប្តឹងជំទាស់ប្រឆាំងការសម្រេចរបស់តុលាការ ទើបតុលាការលើកយករឿងនេះមកជម្រះ ។
ក្នុងពេលសវនាការសំណុំរឿងនេះតុលាការបានលើកយកការសុំនៅក្រៅឃុំរបស់ជនជាប់ចោទឬជាឧក្រិដ្ឋជនឈ្មោះ ហង្ស វុទ្ធី ហៅយមរាជ ដែលបានស្នើសុំនៅក្រៅឃុំបណ្តោះអាសន្ន ។ តែក្រោយពេលសវនាការពេញមួយព្រឹក ចៅក្រមបានប្រកាសសាលក្រមច្រានចោលការសុំនៅក្រៅឃុំតែម្តង ។ នៅពេលរសៀលថ្ងៃទី២២ ខែមេសា ដដែលនេះ តុលាការក៏បានលើកយកអង្គសេចក្តីមកជម្រះបញ្ចប់ និងប្រកាសសាលក្រមនៅថ្ងៃទី៣០ មេសា ខាងមុខនេះ ។ ឯការតវ៉ាសុំនៅក្រៅឃុំ អង្គសវនាការទាត់ចោលទាំងស្រុង ។
បានកត់សម្គាល់ថា ឧក្រិដ្ឋជនឈ្មោះ ហង្ស វុទ្ធី ដែលមានរហស្សនាមយមរាជ ដែលអ្នកណាក៏ស្គាល់ដែរថា ជននេះជើងខ្លាំងខាងបាញ់បោះ និងសម្លាប់មនុស្ស ជាសេនាដៃស្តាំរបស់ឧក្រិដ្ឋជន ហេង ពៅ និងជាអតីតមន្ត្រីកងរាជអាវុធហត្ថលើផ្ទៃប្រទេស បន្ទាប់មកត្រូវបានអង្គភាពចាត់តាំងឱ្យទៅបម្រើការងារជាមន្ត្រីកងរាជអាវុធហត្តខេត្តកណ្តាល។ នៅខេត្តកណ្តាល យមរាជ ធ្វើព្យុះធ្វើភ្លៀង និងល្បីឈ្មោះខាងអាក្រក់ ត្រូវបានអង្គភាពដកទៅបញ្ឈរជើងនៅទីបញ្ជាការកងរាជអាវុធហត្ថលើផ្ទៃប្រទេសវិញ អំឡុងក្រោយឆ្នាំ២០០០ ក្រោយពេលឈ្មោះ ហេង ពៅ ឡើងធ្វើជាស្នងការនគរបាលរាជធានីភ្នំពេញ បានយកឧក្រិដ្ឋជនឈ្មោះ ហង្ស វុទ្ធី ហៅយមរាជ មកធ្វើជាមន្ត្រីជំនិត ឬជាសេនាដៃស្តាំ ។
ដោយសារការប្រព្រឹត្តអំពើអាក្រក់ច្រើនពេក តាមបញ្ជាមេខ្លោង ហេង ពៅ យមរាជ ត្រូវសមត្ថកិច្ចចាប់ខ្លួនក្នុងឆ្នាំ២០០៦ លើបទចោទឧក្រិដ្ឋកម្មធំៗមាន៤ករណី ។ ត្រូវបានសាលាដំបូងរាជធានីភ្នំពេញផ្តន្ទាទោសសរុបដាក់ពន្ធនាគាររយៈពេល៥១ឆ្នាំ ។ ចុងក្រោយ ទោសហែកគុករត់ដែលមានសាលក្រមកំបាំងមុខ យមរាជបានប្តឹងសារទុក្ខជំទាស់សាលក្រមនេះ និងសុំនៅក្រៅឃុំវិញ ។ បណ្តឹងជំទាស់សុំនៅក្រៅឃុំរឿងហែកគុករត់នេះ ត្រូវបានសាលាដំបូងរាជធានីភ្នំពេញលើកយកមកបើកសវនាការនៅព្រឹកថ្ងៃទី២២ មេសា ២០១៥ នេះ ។
គួរំឭកថា ក្នុងឆ្នាំ២០០៦ទណ្ឌិត ហង្ស វុទ្ធី ហៅយមរាជ ត្រូវបានសមត្ថកិច្ចចាប់ខ្លួនជាមួយបក្សពួកពាក់ព័ន្ធពីបទឧក្រិដ្ឋធំៗ៤ ដែលបទល្មើសនោះត្រូវបានសាលាដំបូងរាជធានីភ្នំពេញ ចេញសាលក្រមផ្តន្ទាទោសជាស្ថាពររួចអស់ហើយ ។
សាលក្រមទី១-លេខ១៥១ដ(១៨.០៩ ២០០៦) របស់លោកចៅក្រម គឹម រ៉ាវី ប្រធានក្រុមប្រឹក្សាជំនុំជម្រះបានផ្តន្ទាទោសឈ្មោះ ហង្ស វុទ្ធី ហៅយមរាជ ដាក់ពន្ធនាគាររយៈពេល១៦ឆ្នាំ គិតពីថ្ងៃចាប់ខ្លួនបាន ពីបទមនុស្សឃាតគិតទុកជាមុនក្នុងការធ្វើឃាតលើលោក សុខ សេដ្ឋាមុនី ចៅក្រមសាលាដំបូងរាជធានីភ្នំពេញ កាលពីថ្ងៃទី២៣ មេសា ២០០៣ នៅរាជធានីភ្នំពេញ ។
សាលក្រមទី២-លេខ២៨ ក្រ២ (២៨.០៣.២០០៨)របស់ លោកចៅក្រម ឆាយ គង់ ប្រធានក្រុមប្រឹក្សាជំនុំជម្រះ បានផ្តន្ទាទោសឈ្មោះ ហង្ស វុទ្ធី ហៅយមរាជ ដាក់ពន្ធនាគាររយៈពេល១៨ឆ្នាំ គិតពីថ្ងៃចាប់ខ្លួនបាន ពីបទធ្វើមនុស្សឃាតគិតទុកជាមុន លើលោក គឹម ដារ៉ាវុធ ប្រធានសាខាអគ្គិសនីចាក់អង្រែក្រោម ប្រព្រឹត្តកាលពីថ្ងៃទី២៣វិច្ឆិកា ឆ្នាំ២០០៥ នៅជិតរបងវិទ្យាល័យចតុមុខ ខណ្ឌដូនពេញ រាជធានីភ្នំពេញ ។
សាលក្រមទី៣-លេខ០៧កប IV (១២.០៣.២០០៩)របស់លោកចៅក្រម អ៊ីវ គឹមស្រីុ ប្រធានក្រុមប្រឹក្សាជំនុំជម្រះ បានផ្តន្ទាទោសឈ្មោះ ហង្ស វុទ្ធី ហៅយមរាជ ដាក់ពន្ធនាគាររយៈពេល១៥ឆ្នាំ គិតពីថ្ងៃចាប់ខ្លួនបាន ដែលសាលក្រមនេះពាក់ព័ន្ធពីបទប៉ុនប៉ងធ្វើមនុស្សឃាតដោយគិតទុកជាមុនទៅលើលោកនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ប្រព្រឹត្តកាលពីថ្ងៃទី១៨.១៩ ធ្នូ ២០០៣ ។
សាលក្រមទី៤-លេខ០៦ឈ(១១.០១.២០០៧) របស់ចៅក្រមលោកគង់ សែត ប្រធានក្រុមប្រឹក្សាជំនុំជម្រះបានផ្តន្ទាទោសឈ្មោះ ហង្ស វុទ្ធី ហៅយមរាជ ដាក់ពន្ធនាគាររយៈពេល២ឆ្នាំ គិតពីថ្ងៃចាប់ខ្លួនបាន ពីបទធ្វើឱ្យខូចខាតដោយចេតនា គឺហែករបងគុកព្រៃសរត់ និងបានគេចខ្លួនកាលពីថ្ងៃទី១១ មិថុនា ២០០៦ ។
នៅមានសាលក្រមមួយទៀតពីបទប៉ុនប៉ងធ្វើឃាដលោក អ៊ុក សាវុធ អគ្គព្រះរាជអាជ្ញាអមសាលាឧទ្ធរណ៍ផងដែរ ។
គួរបញ្ជាក់ទៀតថា ទណ្ឌិតថ្នាក់ឧក្រិដ្ឋ ហង្ស វុទ្ធី ហៅយមរាជ ពេលត្រូវសមត្ថកិច្ចចាប់ខ្លួនពេលនោះមានទណ្ឌិត ហេង ពៅ អតីតស្នងការនគរបាលរាជធានីភ្នំពេញ ជាមេខ្លោង ទណ្ឌិត លី រ៉ាស៊ី ហៅទិវា ០៣ អតីតអនុប្រធានការិយាល័យនគរបាលព្រហ្មទណ្ឌកម្រិតស្រាល។ ទណ្ឌិត ព្រំ សោភារិទ្ធ អតីតប្រធានផ្នែកមជ្ឍឹម១ ការិយាល័យនគរបាលព្រហ្មទណ្ឌកម្រិតស្រាល ទណ្ឌិត ហង្ស វុត្ថា ប្អូនប្រុស ហង្ស វុទ្ធី ហៅយមរាជ អតីតមន្ត្រីនគរបាលព្រហ្មទណ្ឌកម្រិតស្រាល ទណ្ឌិត អំ សំខេង (ស្លាប់ក្នុងពន្ធនាគារបាត់ហើយ) ជាមន្ត្រីនគរបាលព្រហ្មទណ្ឌក្រសួងមហាផ្ទៃ និងបក្សពួកមួយចំនួនទៀត ត្រូវបានចាប់ខ្លួនដាក់ពន្ធនាគារព្រៃសរាងយឺតពេលបន្តិច ព្រោះសម្លាប់មនុស្សបានច្រើនណាស់ ។
ក្នុងចន្លោះពេលនៃការឃុំខ្លួនបណ្តោះអាសន្ន កាលពីថ្ងៃទី១១ មិថុនា ២០០៦ ទណ្ឌិតឈ្មោះ ហង្ស វុទ្ធី ហៅយមរាជ និងបក្សពួក១ក្រុមដែលជាប់ក្នុងបន្ទប់តែមួយ បានប្រើប្រាស់រណារអារដែក អារចម្រឹងទ្វារបង្អួចបន្ទប់ឃុំខ្លួនពន្ធនាគារព្រៃសរត់គេចខ្លួននៅពេលយប់ខណៈមេឃកំពុងធ្លាក់ភ្លៀងខ្លាំង ។ យមរាជ និងបក្សពួកជាង១០នាក់ ហែកគុកព្រៃសរត់ចេញទៅពេលយប់នោះ មានគេឃើញរថយន្ត១គ្រឿងទៅចាំទទួលយកដែលខ្លះជិះរថយន្តនោះ ខ្លះមិនបានឡើងរថយន្តនោះទេ ។
ដោយឡែក ទណ្ឌិតយមរាជ ហាក់ដូចជាដឹងខ្លួនថា បើទៅជិះរថយន្តនោះប្រាកដជាមិនសល់ជីវិត ។ ដូច្នោះបានបង្ខំចិត្តដើរកាត់វាលស្រែ និងប្រឡាយទឹកស្ទឹងព្រែកត្នោត សំដៅឡើងកាន់ផ្លូវជាតិលេខ២ ដែលតាមចម្លើយក្រោយពីចាប់ខ្លួន ហង្ស វុទ្ធី ហៅយមរាជ បានសារភាពថាមានបងប្អូនទៅទទួលនៅវេលាទៀបភ្លឺ ។ ក្រោយពីការគេចខ្លួនចេញពីពន្ធនាគារ ហង្ស វុទ្ធី ហៅយមរាជ បានទៅសុំផ្ទះគេស្នាក់នៅលាក់ខ្លួនក្នុងខេត្តកំពតមួយរយៈ ។ បន្ទាប់មកបានចុះទូកធ្វើជាកម្មករស៊ីឈ្នួលអូសបង្គារលើផ្ទៃសមុទ្រដែលកម្រឡើងគោកណាស់ ព្រោះខ្លាចសមត្ថកិច្ចចាប់ខ្លួន ។ ដោយសារមុខរបរធ្វើកម្មករនេសាទអូសបង្គារលើផ្ទៃសមុទ្រលំបាកទ្រាំទ្រពេក ឈ្មោះ ហង្ស វុទ្ធី បានរកឱកាសគេចខ្លួនទៅធ្វើជាកម្មករដាំដំឡូងក្នុងទឹកដីថៃជាប់ព្រំប្រទល់កម្ពុជាយើងដែរ ក្នុងតំបន់ប៉ែកជាំក្សាន្ត ខេត្តបន្ទាយមានជ័យ ។
ចាត់ទុកថា បាបកម្មតាមផ្តន្ទា និងឈាមស្រែកស្បែកហៅ ហង្ស វុទ្ធី ហៅយមរាជ ដេកមិនសុខធ្វើការមិនកើតបានសម្រេចចិត្តចូលសារភាព ដែលជាការទាល់ច្រក ។ ពេលចូលសារភាពនៅថ្ងៃទី១២ មេសា ២០១២ បាននិយាយជាមួយម្តាយបង្កើតរបស់គេឱ្យទាក់ទងទៅអង្គការលីកាដូ.អង្គការការពារសិទ្ធិមនុស្ស ដើម្បីចូលខ្លួន ព្រោះមិនហ៊ានចូលតាមរយៈសមត្ថកិច្ចត្រង់ៗទេ ខ្លាចគ្រោះដល់ជីវិត។ ពេលចូលសារភាព អង្គការលីកាដូបានទៅទទួលយកឈ្មោះយមរាជនៅទីកន្លែងមួយតាមបណ្តោយផ្លូវជាតិលេខ៣ ក្នុងទឹកដីខេត្តកំពត។ លុះពេលនាំមកដល់ទីស្នាក់ការ អង្គការលីកាដូមិនហ៊ានទុកយូរទេ ព្រោះជាឧក្រិដ្ឋជន ដូច្នោះអង្គការលីកាដូបានទាក់ទងទៅលោកឧត្តមសេនីយ៍ឯក ម៉ក់ ជីតូ កាលនៅជាប្រធាននាយកដ្នាននគរបាលព្រហ្មទណ្ឌក្រសួងមហាផ្ទៃទៅទទួលយកឈ្មោះ យមរាជ ដើម្បីចាត់ការតាមនីតិវិធី ហើយឧក្រិដ្ឋជនឈ្មោះ ហង្ស វុទ្ធី ត្រូវបានចាប់ខ្លួនបញ្ជួនទៅកាន់ពន្ធនាគារព្រៃសវិញ ។ ក្រោយមកត្រូវបានបញ្ជូនទៅកាន់ពន្ធនាគារត្រពាំងផ្លុងរហូតសព្វថ្ងៃនេះ ។ នៅពេលសវនាការសុំនៅក្រៅឃុំរបស់ទណ្ឌិត ហង្ស វុទ្ធី ហៅយមរាជ ត្រូវបានអនុរក្សពន្ធនាគារត្រពាំងផ្លុងដឹកមក និងនៅពេលចប់ត្រូវដឹកទៅឃុំខ្លួនកន្លែងដើមវិញ ៕
ចែករំលែកព័តមាននេះ