ប្រធានាធិបតីសហរដ្ឋអាមេរិក លោកបារ៉ាក់ អូបាម៉ា កាលពីថ្ងៃទី១ កក្កដា បានចុះហត្ថលេខាលើច្បាប់ថ្មីមួយដាក់ទណ្ឌកម្មប្រឆាំងអ៊ីរ៉ង់ ដោយលោកប្រធានាធិបតីបានហៅច្បាប់ថ្មីនេះថា ជាវិធានការថ្មីមួយទៀត ដែលអាមេរិក និងសហគមន៍អន្ដរជាតិប្ដេជ្ញាចិត្ដរារាំងអ៊ីរ៉ង់កុំឱ្យសំរេចបានអាវុធនុយក្លេអ៊ែរ ។ នៅក្នុងពីធីចុះហត្ថលេខាលើច្បាប់នេះ ដែលរៀបចំឡើងនៅសេតវិមានក្នុងទីក្រុងវ៉ាស៊ីនតោន លោកប្រធានាធិបតីអូបាម៉ា គូសបញ្ជាក់ថា ក្រុមប្រឹក្សាសន្ដិសុខ អ.ស.ប បានសំរេចអនុម័តដាក់ទណ្ឌកម្មយ៉ាងធ្ងន់ធ្ងរប្រឆាំងអ៊ីរ៉ង់ ហើយអូស្ដ្រាលី និងសហគមន៍អឺរ៉ុបបាននិងកំពុងពិចារណាមើលពីការចាត់វិធានការធ្ងន់ធ្ងរជាងមុនគឺដាក់ឱ្យនៅឯកោនូវកម្មវិធីនុយក្លេអ៊ែរអ៊ីរ៉ង់ ។
លោកប្រធានាធិបតីអូបាម៉ាថ្លែងថា ច្បាប់ថ្មីនេះនឹងធ្វើឱ្យអ៊ីីរ៉ង់មានការលំបាកក្នុងការទិញវត្ថុធាតុដើមសំរាប់ការផលិតអាវុធនុយក្លេអ៊ែររបស់ខ្លួន ព្រោះច្បាប់ថ្មីនេះមិនត្រឹមតែសំដៅដាក់ទណ្ឌកម្មប្រឆាំងអ៊ីរ៉ង់ប៉ុណ្ណោះទេ តែវាក៏ជះឥទ្ធិពលចំពោះប្រទេសដទៃទៀត ដែលពាក់ព័ន្ធជាមួយការផលិតនុយក្លេអ៊ែររបស់អ៊ីរ៉ង់ផងដែរ ។ លោកអូបាម៉ា ថ្លែងទៀតថា យើងកំពុងបង្ហាញដល់រដ្ឋាភិបាលអ៊ីរ៉ង់ថា សកម្មភាពផលិតនុយក្លេអ៊ែររបស់ខ្លួនមានផលវិបាកធ្ងន់ធ្ងរ ហើយប្រសិនបើវានៅតែមាននេះសំពាធលើខ្លួន (អ៊ីរ៉ង់) នឹងកើនឡើង ៕
ចែករំលែកព័តមាននេះ