រាជធានីភ្នំពេញ ៖ ស្ត្រីម្នាក់អាយុប្រហែល៣០ឆ្នាំ ត្រូវបានក្រុមចោរតាមផ្សារលូកកាបូបលួចយកលុយអស់សរុបជាង៤ពាន់ដុល្លារ ខណៈទើបតែមកពីទទួលប្រាក់តាមវីងមួយកន្លែង ហើយដើរចូលទៅលេងតូបប្អូននៅក្នុងផ្សារអូរឡាំពិក បង្កឱ្យមានការភ្ញាក់ផ្អើល
រាជធានីភ្នំពេញ ៖ ស្ត្រីម្នាក់អាយុប្រហែល៣០ឆ្នាំ ត្រូវបានក្រុមចោរតាមផ្សារលូកកាបូបលួចយកលុយអស់សរុបជាង៤ពាន់ដុល្លារ ខណៈទើបតែមកពីទទួលប្រាក់តាមវីងមួយកន្លែង ហើយដើរចូលទៅលេងតូបប្អូននៅក្នុងផ្សារអូរឡាំពិក បង្កឱ្យមានការភ្ញាក់ផ្អើលកាលពីវេលាម៉ោង៩ និង៤៥នាទីព្រឹកថ្ងៃទី០៨ មេសា ២០១៥ ស្ថិតនៅផ្សារអូឡាំពិក ក្នុងសង្កាត់អូឡាំពិក ខណ្ឌចំការមន ។
តាមប្រភពឱ្យដឹងថា មុនពេលកើតហេតុ ស្ត្រីរងគ្រោះជាមួយនិងកូនតូចម្នាក់ មានអាយុជាង២ខួប បានមកបើកប្រាក់ដែលគេវេរពីខេត្តតាមប្រព័ន្ធផ្ទេរប្រាក់វីងមួយកន្លែងនៅក្បែរផ្សារអូឡាំពិក ។ ពេលដែលបើកប្រាក់បានរួចហើយ ស្ត្រីរងគ្រោះនិងកូនក៏បានឆ្លងផ្លូវទៅលេងតូបរបស់ប្អូនស្រីរបស់ខ្លួនម្នាក់ ដែលលក់ដូរនៅក្នុងផ្សារអូឡាំពិកនោះ ។ ក្រោយពេលដែលចូលទៅលេងប្អូនស្រីរបស់ខ្លួនបានមួយសន្ទុះ ស្ត្រីរងគ្រោះក៏បានដើរចេញមកក្រៅ ដើម្បីឡើងជិះម៉ូតូរ៉ឺម៉កម៉ូតូកង់បីត្រឡប់ទៅផ្ទះវិញ។
ពេលដែលស្ត្រីរងគ្រោះកំពុងតែបីកូនរៀបឡើងលើម៉ូតូរ៉ឺម៉កម៉ូតូកង់បីជិះនោះ ក៏ឮសំឡេងរបើកកាបូប ភា្លមនោះក៏បានឆែកមើលក្នុងកាបូបទើបដឹងថា លុយរបស់ខ្លួននិងទូរស័ទ្ទមួយគ្រឿងបានបាត់អស់ ។ ភ្លាមនោះស្ត្រីរងគ្រោះ ក៏បានធ្វើការឃាត់ខ្លួនស្ត្រីសង្ស័យអាយុជាង២០ឆ្នាំម្នាក់ ក្នុងចំណោម៣នាក់ ដែលនៅជិតខ្លួនក្នុងពេលកើតហេតុ ដោយមានអ្នកជិតខាងបានអះអាងផងដែរថា ស្ត្រីរូបនេះ ពិតជាបានធ្វើសកម្មភាពលូកកាបូបយកលុយ និងទូរស័ព្ទបានហើយហុចទៅឱ្យបក្សពួករបស់ខ្លួនមែន ។
ក្រោយពីធ្វើការឃាត់ខ្លួនស្ត្រីជាជនសង្ស័យរូបនេះបានហើយ ក៏បាននាំខ្លួនទៅធ្វើការសាកសួរនៅក្នុងទីស្នាក់ការផ្សារ ក៏បានបញ្ជូនខ្លួនទៅកាន់នគរបាលប៉ុស្តិ៍អូរឡាំពិកជាបន្តទៀត ដោយមិនបានរកឃើញអ្វីដែលជាវត្ថុតាងនៅក្នុងខ្លួនរបស់គេឡើយ ។
ករណីលូកកាបូបនេះដែរ ស្ត្រីរងគ្រោះបានអះអាងថា បានបាត់លុយដុល្លារអស់ចំនួន៣.៦០០ដុល្លារ លុយខ្មែរជាង១លានរៀល ប្រាក់យាន់ចិនមួយចំនួនទៀត សរុបជាង៤ពាន់ដុល្លារ និងទូរស័ព្ទម៉ាក Iphone6 មួយគ្រឿងផងដែរ ។
គួរបញ្ជាក់ថា ផ្សារអូឡាពិកនេះ តែងតែកើតមានអំពើចោរលូកហោប៉ៅ លូកកាបូបជារៀងរាល់ថ្ងៃ ដោយមិនដែលឃាត់ខ្លួនបានជនដៃដល់ម្នាក់ណាម្តងឡើយ ហេតុនេះហើយសូមប្រជាពលរដ្ឋទាំងអស់គ្នា ដែលមកកាន់ផ្សារអូឡាំពិកនេះ គួរតែមានការប្រុងប្រយ័ត្នដោយខ្លួនឯង ។
ចែករំលែកព័តមាននេះ