តាមប្រភពព័ត៌មានថា សមាជិកនៃក្រុមមួយឈ្មោះ «តាមិល» នៅប្រទេសស្រីលង្កា កាលពីប៉ុន្មានថ្ងៃកន្លងមកនេះ បានដាក់ពាក្យបណ្តឹងទៅសហរដ្ឋអាមេរិក ប្តឹងប្រធានាធិបតីស្រីលង្កា ទារប្រាក់សំណង៣០លានដុល្លារអាមេរិក ពីបទចោទប្រកាន់សំលាប់មនុស្សក្រៅតុលាការ ។ ប្រភពព័ត៌មានដដែលឱ្យដឹងទៀតថា សកម្មជននៃក្រុមនោះបានដឹកនាំការដាក់ពាក្យប្តឹងប្រឆាំងលោកប្រធានាធិបតីម៉ាហ៊ីដ រ៉ាចាប៉ាកសេ ដែលធ្វើដំណើរទៅកាន់សហរដ្ឋអាមេរិកយ៉ាងស្ងៀមស្ងាត់ ។
លោក Bruce Fein ជាមេធាវីល្បីឈ្មោះមួយរូបនៅក្រុងវ៉ាស៊ីនតោន និយាយថា រូបលោកបានដាក់ពាក្យបណ្តឹងនោះជំនួសមុខឱ្យ ដើមបណ្តឹង៣នាក់ ក្រោមច្បាប់ឆ្នាំ១៩៩១ ដែលអនុញ្ញាតឱ្យមានការដាក់ពាក្យបណ្តឹងទៅសហរដ្ឋអាមេរិក ប្រឆាំងមន្ត្រីបរទេសដែលរងការចោទប្រកាន់ពីបទធ្វើទារុណកម្ម និងការសំលាប់ក្រៅតុលាការ ។ លោក Fein បាននិយាយក្រោយពីដាក់ពាក្យបណ្តឹងនៅតុលាការក្រុងវ៉ាស៊ីនតោនថា លោកប្រធានាធិបតី រ៉ាចាប៉ាកសេ នឹងមិនអាចគេចខ្លួនពីសំណាញ់ច្បាប់បានឡើយ ។ លោកបានបន្តទៀតថា ពេលនេះ រូបលោកកំពុងរង់ចាំទទួលការឆ្លើយតបពីលោក រ៉ាចាប៉ាកសេ ហើយថា ប្រសិនបើលោក រ៉ាចាប៉ាកសេ នៅតែមិនព្រមឆ្លើយតប លោក (Fein) នឹងស្វះស្វែងរកការសំរេចដោយមិនចាំបាច់មានលោក ។ ពាក្យបណ្តឹងនោះទាមទារឱ្យលោករ៉ាចាប៉ាកសេ បង់ប្រាក់សំណង៣០លានដុល្លារ ដល់ដើមចោទ៣នាក់ដែលអះអាងថា សាច់ញាតិរបស់ពួកគេត្រូវបានសំលាប់នៅក្នុងឧប្បត្តិហេតុចំនួន៣ ក្នុងនោះមានដូចជាការវាយប្រហាររបស់កងទ័ពនៅឆ្នាំ២០០៩ លើកន្លែងលាក់ខ្លួនរបស់ពួកឧទ្ទាមខ្លាតាមិលជាដើម ។
លោកប្រធានាធិបតីរ៉ាចាប៉ាកសេ បានអញ្ជើញទៅកាន់សហរដ្ឋអាមេរិក កាលពីសប្តាហ៍មុនសំរាប់អ្វីដែលមន្ត្រីស្រីលង្កាចាត់ទុកថាជាដំណើរទស្សនកិច្ចលក្ខណៈឯកជនមួយ ៕
ចែករំលែកព័តមាននេះ