រាជធានីភ្នំពេញ ៖ រថយន្តស្ព័រមួយគ្រឿងបើកបរដោយបុរសម្នាក់ត្រូវបានគេដឹងថាជាកូនមន្ត្រីមានសមត្ថកិច្ចបើកបរទាំងស្រវឹងជោគបួងចង្កូតឡើងសួនច្បារតាមវិថីព្រះសុធារស
រាជធានីភ្នំពេញ ៖ រថយន្តស្ព័រមួយគ្រឿងបើកបរដោយបុរសម្នាក់ត្រូវបានគេដឹងថាជាកូនមន្ត្រីមានសមត្ថកិច្ចបើកបរទាំងស្រវឹងជោគបួងចង្កូតឡើងសួនច្បារតាមវិថីព្រះសុធារស ត្រង់ចំណុចផ្លូវព្រះសីហនុកែងនឹងផ្លូវព្រះសុធារស ស្ថិតក្នុងសង្កាត់ទន្លេបាសាក់ ខណ្ឌចំការមន កាលពីវេលាម៉ោង២ និង២០នាទីរំលងអាធ្រាត្រឈានចូលថ្ងៃទី២ ខែមេសា ឆ្នាំ២០១៥ ។
បើតាមសំដីរបស់បងប្រុសម្នាក់ឈ្មោះ វិជ័យ ដែលបានឃើញហេតុការណ៍ផ្ទាល់បានឱ្យដឹងថា មុនពេលកើតហេតុគេបានឃើញរថយន្តបង្កម៉ាក Mazda ពណ៌ស ពាក់ស្លាកលេខ ភ្នំពេញ 2R-6119 ជាប្រភេទរថយន្តស្ព័រ ជិះគ្នា៣នាក់ មានប្រុសម្នាក់សក់វែងអាយុប្រមាណ៣០ឆ្នាំ និងមានស្រី២នាក់ផងដែរ បើកបរក្នុងស្ថានភាពស្រវឹង បានបើករថយន្តយ៉ាងលឿនតាមបណ្តោយផ្លូវព្រះសីហនុ ក្នុងទិសដៅពីលិចទៅកើត លុះមកដល់ចំណុចផ្លូវបំបែកព្រះសុធារស រថយន្តមានបំណងបត់ឆ្វេង តែដោយសារម្ចាស់ស្រវឹងស្រាទើបបួងចង្កូតមិនផុតគួបផ្សំនឹងល្បឿនលឿនផងនោះ បានធ្វើឱ្យរថយន្តជ្រុលចង្កូតឡើងលើខឿនសួនច្បារព្រះសុធារស បណ្តាលឱ្យរថយន្តបែកកង់មុខទាំង២ បាក់កាងខាងមុខ និងខូចខាតស្ទើរទាំងស្រុង ធ្វើឱ្យរថយន្តមិនអាចបន្តដំណើរទៅមុខបានទេ ។
ភ្លាមៗនោះម្ចាស់រថយន្តចុះពីលើរថយន្តទាំងសភាពស្រវឹងស្រាទ្រេតទ្រោតបានទូរសព្ទ័ហៅបក្សពួកមកជួយរុញរថយន្តចុះពីលើសួនច្បារមកដាក់ចោលលើចញ្ចើមផ្លូវវិញ ដោយមានទាំងកម្លាំងល្បាតព្រហ្មទណ្ឌរាជធានីភ្នំពេញដែលល្បាតប្រទះឃើញបានជួយរុញចុះពីលើសួនច្បារ ហើយឲ្យអ្នកជិះក្នុងរថយន្តជិះលើម៉ូតូរបស់មិត្តភក្តិគេចខ្លួនបាត់ស្រមោល ។ លុះពេលប្រជាពលរដ្ឋដែលឃើញហេតុការណ៍សួរថា ហេតុអីបានជាសមត្ថកិច្ចមិនព្រមឃាត់អ្នកបើករថយន្តបង្ក ហើយបែរជារុញរថយន្តចុះពីលើសួនទៀត ក៏ត្រូវកម្លាំងល្បាតប្រាប់ថា អ្នកបើករថយន្តជាកូនមេ រួចហើយកម្លាំងល្បាតបានជិះម៉ូតូចេញទៅបាត់ដែរ ។
ក្រោយពេលកើតហេតុ កំលាំងជំនាញបានធ្វើការវាស់វែង និងបានស្ទួចរថយន្តយកទៅរក្សារទុកនៅចរាចរណ៍រាជធានីដើម្បីរង់ចាំម្ចាស់ចូលខ្លួនមកដោះស្រាយពេលក្រោយ ៕
ចែករំលែកព័តមាននេះ