ប្រធានាធិបតីអាមេរិកលោកបារ៉ាក់ អូបាម៉ា គូសបញ្ជាក់កាលពីថ្ងៃទី៣១ មីនា ប្រាប់ដល់សមភាគីអេហ្ស៊ីប លោកអាប់ដែល ហ្វាតាហ៍អាល់ស៊ីសស៊ីថា លោកនឹងអនុញ្ញាតដល់ការផ្តល់យន្តហោះប្រយុទ្ធធុន F-16 ដល់អេហ្ស៊ីប ព្រមទាំងនឹងស្នើផ្តល់ជំនួយយោធាប្រចាំឆ្នាំឡើងវិញដល់ប្រទេសនេះ ។
ក្នុងការសន្ទនាគ្នាតាមទូរស័ព្ទ លោកអូបាម៉ា បានប្រាប់ដល់លោកអាល់ស៊ីសស៊ីថា លោកនឹងលុបចោលបណ្តាឧបសគ្គដែលមានចាប់តាំងពីខែតុលា ឆ្នាំ២០១៣មក ទាក់ទិននឹងការផ្តល់យន្តហោះធុន F-16 មីស៊ីលធុន HARPOON ព្រមទាំងរថក្រោះធុន M1 A1 ។
ការផ្អាកជំនួយទាំងនេះរបស់សហរដ្ឋអាមេរិកកើតមានក្រោយពីលោកអាល់ស៊ីសស៊ី ពេលនៅជាប្រមុខកងទ័ពអេហ្ស៊ីប បានធ្វើរដ្ឋប្រហារទម្លាប់ប្រធានាធិបតីអ៊ិស្លាមនិយម លោកម៉ូហាម៉េដម័រស៊ី ហើយបង្កើតរដ្ឋាភិបាលបណ្តោះអាសន្នមួយ បន្ទាប់មកធ្វើការបង្ក្រាបយ៉ាងសាហាវប្រឆាំងពួកអ្នកគាំទ្រលោកម័រស៊ី ដោយទឹកប្រាក់ជិត៧០០លានដុល្លារក្នុងចំណោមជំនួយយោធាប្រចាំឆ្នាំឱ្យអេហ្ស៊ីប១,៣ពាន់លានដុល្លារត្រូវបានផ្អាក ។
យោងតាមសេចក្តីប្រកាសរបស់សេតវិមានថា លោកអូបាម៉ា ក៏គូសបញ្ជាក់ផងដែរប្រាប់លោកអាល់ស៊ីសស៊ីថា លោកនឹងបន្តស្នើជំនួយយោធាប្រចាំឆ្នាំ១,៣ពាន់លានដុល្លារសម្រាប់អេហ្ស៊ីបវិញ ។
ប្រទេសអេហ្ស៊ីបចូលរួមក្នុងការវាយប្រហារតាមអាកាសនាំមុខដោយអារ៉ាប៊ី សាអ៊ូឌីត ប្រឆាំងពួកហ៊ូធីនៅយេម៉ែនបន្ថែមលើការខិតខំប្រឹងប្រែងរបស់ប្រទេសនេះក្នុងការតស៊ូប្រឆាំងពួករដ្ឋអ៊ិស្លាមនៅភាគខាងជើងតំបន់ស៊ីណៃអីុ និងនៅលីប៊ី ៕
ចែករំលែកព័តមាននេះ