រាជធានីភ្នំពេញ ៖ ជនសង្ស័យជាចោរលួចម៉ូតូម្នាក់ត្រូវម្ចាស់ និងនគរបាលខណ្ឌទួលគោកដេញចាប់បានកាលពីវេលាម៉ោង៦ព្រឹក ថ្ងៃទី២៩ មីនា ២០១៥ នៅចំណុចតាមផ្លូវលេខ២៦១ សង្កាត់ទឹកល្អក់ទី៣ ខណ្ឌទួល
រាជធានីភ្នំពេញ ៖ ជនសង្ស័យជាចោរលួចម៉ូតូម្នាក់ត្រូវម្ចាស់ និងនគរបាលខណ្ឌទួលគោកដេញចាប់បានកាលពីវេលាម៉ោង៦ព្រឹក ថ្ងៃទី២៩ មីនា ២០១៥ នៅចំណុចតាមផ្លូវលេខ២៦១ សង្កាត់ទឹកល្អក់ទី៣ ខណ្ឌទួលគោក បន្ទាប់ពីជនសង្ស័យធ្វើសកម្មភាពលួចម៉ូតូគេមួយគ្រឿងម៉ាកនិច ពណ៌ស ពាក់ស្លាកលេខភ្នំពេញ១CR៥៥៧៧ ពីផ្សារសែនជូរី សង្កាត់កាកាប ខណ្ឌពោធិ៍សែនជ័យ ហើយព្យាយាមជិះម៉ូតូគេចខ្លួន។
ជនសង្ស័យឈ្មោះសុខ សុវណ្ណារិទ្ធ ភេទប្រុស អាយុ២៨ឆ្នាំ មានទីលំនៅផ្ទះជួលក្នុងសង្កាត់ទឹកថ្លា ខណ្ឌសែនសុខ ចំណែកម្ចាស់ម៉ូតូឈ្មោះអ៊ូង ចាន់ណារ៉ូ ភេទប្រុស អាយុ២៣ឆ្នាំ ជាអ្នកលក់បន្លែនៅផ្សារសែនជូរីផ្លាហ្សា មានទីលំនៅក្បែរផ្សារនោះដែរ។
ប្រភពបានឱ្យដឹងថា មុនពេលកើតហេតុជនរងគ្រោះបានជិះម៉ូតូដឹកបន្លែមកលក់នៅផ្សារសែនជូរីផ្លាហ្សា ហើយចតម៉ូតូទុកចោលនៅក្បែរកន្លែងលក់ ស្រាប់តែមានជនសង្ស័យម្នាក់មកដល់ធ្វើសកម្មភាពលួចម៉ូតូជនរងគ្រោះជិះគេចខ្លួនបាត់។
ប្រភពបន្តថា បន្ទាប់ពីបាត់ម៉ូតូ ម្ចាស់បានតាមស្វែងរកនៅម្តុំឃ្លាំងរំសេវ លុះដើររករហូតដល់វេលាម៉ោងកើតហេតុខាងលើស្រាប់តែប្រទះឃើញជនសង្ស័យកំពុងឈប់ម៉ូតូនៅផ្លូវឌឿងហែមលេខ១៩២ ធ្វើសកម្មភាពដោះស្លាកលេខម៉ូតូចេញ ពេលនោះម្ចាស់ម៉ូតូបានស្រែកឆោឡោធ្វើឱ្យផ្អើលដល់សមត្ថកិច្ចខណ្ឌទួលគោកដែលនៅក្បែរនោះនាំគ្នាដេញចាប់។ ខណៈនោះជនសង្ស័យភ័យស្លន់ស្លោបានរត់គេចខ្លួនចូលទៅក្នុងហាងអ៊ុតសក់មួយកន្លែងនៅតាមផ្លូវ២៦១ ក៏ត្រូវសមត្ថកិច្ចចាប់ខ្លួនបានតែម្តង និងដកហូតម៉ូតូប្រគល់ឱ្យម្ចាស់វិញ។
បច្ចុប្បន្នជនសង្ស័យត្រូវសមត្ថកិច្ចខណ្ឌទួលគោកបញ្ជូនមកឱ្យសមត្ថកិច្ចខណ្ឌពោធិ៍សែនជ័យដើម្បីចាត់ការបន្តតាមនីតិវិធី៕
ចែករំលែកព័តមាននេះ