ប្រធានគណបក្សពលករឃើតឌីស្ថាន PKK ដែលកំពុងជាប់ឃុំឃាំងលោកអាប់ឌុលឡាហ៍ អូកាឡាន កាលពីថ្ងៃទី២៨ កុម្ភៈ បានបង្កើតភាពភ្ញាក់ផ្អើលដោយអំពាវនាវដល់កងកម្លាំងលោកឱ្យ
ប្រធានគណបក្សពលករឃើតឌីស្ថាន PKK ដែលកំពុងជាប់ឃុំឃាំងលោកអាប់ឌុលឡាហ៍ អូកាឡាន កាលពីថ្ងៃទី២៨ កុម្ភៈ បានបង្កើតភាពភ្ញាក់ផ្អើលដោយអំពាវនាវដល់កងកម្លាំងលោកឱ្យធ្វើការសម្រេចចិត្តជាប្រវត្តិសាស្ត្រ ដាក់អាវុធចុះ ។
បែបនេះនាំឱ្យមានក្តីសង្ឃឹមលើការបញ្ចប់ឧទ្ទាមកម្មបំបែកខ្លួនរបស់ពួកឃើតតួកគី ពោរពេញដោយការបង្ហូរឈាមចាប់តាំងពី៣០ឆ្នាំមកហើយ ។
ប្រធានាធិបតីតួកគី លោករីសេបតៃយីបអ័រ ដូហ្គាន ចាត់ទុកការអំពាវនាវនោះថាសំខាន់បំផុត ក៏ប៉ុន្តែលោកសម្តែងការប្រុងប្រយ័ត្នដោយរំលឹកថាការអំពាវនាវលើកមុនៗឱ្យមានការដាក់អាវុធធ្លាប់ទទួលបរាជ័យរួចទៅហើយ ។
ក្នុងសារលិខិតមួយច្បាប់អាននៅមុខសារព័ត៌មាន ដោយសមាជិកសភាមួយរូបនៃគណបក្សប្រជាធិបតេយ្យប្រជាជន HDP ស្និទ្ធពួកឃើត លោក SIRRI SUREYYA ONDER កាលពីថ្ងៃទី២៨ កុម្ភៈ លោកអូកាឡាន អំពាវនាវដល់បណ្តាមេដឹកនាំរបស់គណបក្សលោករៀបចំធ្វើនារដូវផ្ការីកខាងមុខនេះនូវសមាជមួយស្តីពីការរំសាយអាវុធនោះ ។
ក្នុងសារលិខិត ប្រមុខពួកឧទ្ទាមឃើតវាយតម្លៃថា យើងបានខិតចូលជិតគ្នាលើដំណោះស្រាយមួយនៃជម្លោះដែលមានអាយុកាល៣០ឆ្នាំមកហើយ ដែលដំណោះស្រាយនោះស្ថិតក្រោមរូបភាពនៃសន្តិភាពជាស្ថាពរ រួចទិសដៅដំបូងរបស់យើងគឺឱ្យសម្រេចបានដំណោះស្រាយតាមបែបប្រជាធិបតេយ្យមួយ ។ ខ្ញុំអំពាវនាវដល់ PKK ឱ្យរៀបចំបើកធ្វើសមាជវិសាមញ្ញមួយនានិទាឃរដូវដើម្បីធ្វើការសម្រេចចិត្តជាយុទ្ធសាស្ត្រ និងជាប្រវត្សិសាស្ត្រមួយគឺរំសាយអាវុធ។ នេះជាការអំពាវនាវជាប្រវត្តិសាស្ត្រជំនួសការប្រយុទ្ធប្រដាប់អាវុធដោយនយោបាយ ។
២ឆ្នាំកន្លះ ក្រោយចាប់ផ្តើមការពិភាក្សាគ្នារវាងលោកអូកាឡាន និងរដ្ឋាភិបាលតួកគី សេចក្តីថ្លែងការណ៍នេះជាការជំរុញដំណើរការសន្តិភាព ខណៈសល់ពេល៣ខែទៀតដល់ការបោះឆ្នោតសភាតួកគី នាថ្ងៃទី៧ មិថុនា ។
នៅមុខសារព័ត៌មានលោក ONDER ធ្វើអត្តាធិប្បាយថា ភាគីទាំង២បានខិតចូលជិតគ្នាយ៉ាងខ្លាំងទៅរកសន្តិភាពពុំធ្លាប់មានពីមុនមក។ យើងឆ្លងកាត់ដំណាក់កាលសំខាន់ និងជាប្រវត្តិសាស្ត្រមួយក្នុងដំណើរការសន្តិភាព ។
ការប្រកាសកាលពីថ្ងៃទី២៨ កុម្ភៈ ធ្វើឡើងបន្ទាប់ពីគណៈប្រតិភូមួយរបស់បណ្តាសមាជិកសភានៃគណបក្ស HDP បានទៅជួបជាមួយបណ្តាប្រមុខយោធារបស់ក្រុមPKK ក្នុងមូលដ្ឋានពួកគេនៅតំបន់ជួរភ្នំ KANDIL ភាគខាងជើងប្រទេសអុីរ៉ាក់ ហើយបន្ទាប់មកទៅជួបជាមួយលោកអូកាឡាននៅឯកោះពន្ធនាគារ IMRALI ក្នុងសមុទ្រ MARMARA មិនឆ្ងាយប៉ុន្មានពីទីក្រុងអុីស្តង់ប៊ុល ។
ក្រៅពីអំពាវនាវឱ្យPKK ដាក់អាវុធចុះ លោកអូកាឡាន រៀបរាប់ក្នុងសារលិខិតរបស់លោកពីវិធានការចំនួន១០ដែលលោកថាចាំបាច់សម្រាប់សន្តិភាពដ៏ស្ថិតស្ថេរនៅតួកគី ក្នុងនោះរួមមានការតាក់តែងរដ្ឋធម្មនុញ្ញថ្មីមួយ ។
នាយករដ្ឋមន្ត្រីតួកគី លោក AHMET DAVUTOGLU ក៏សម្តែងការអបអរសាទរចំពោះសេចក្តីថ្លែងការណ៍នេះរបស់លោកអូកាឡាន មេដឹកនាំចលនាត្រូវហាមឃាត់ ហើយចាត់ទុកជាក្រុមភេរវកម្ម ដោយលោកអះអាងថាភាសា នៃអំពើហិង្សានឹងលែងមានទៀតហើយ។
ក្រោយបរាជ័យលើកដំបូងកាលពីឆ្នាំ២០១០ រដ្ឋាភិបាលតួកគី កាលពីឆ្នាំ២០១២ បានជំរុញការពិភាក្សាជាមួយក្រុម PKK ប៉ុនប៉ងបញ្ចប់ជម្លោះមួយដែលរយៈពេល៣០ឆ្នាំកន្លងមកនេះបណ្តាលឱ្យមនុស្សស្លាប់ប្រមាណជា៤០.០០០នាក់ ។ លើកនេះរដ្ឋាភិបាលបានធ្វើការចរចាដោយផ្ទាល់ជាមួយលោកអូកាឡាន ដែលទទួលទោសជាប់គុកអស់១ជីវិត ។ ចាប់តាំងពីខែមីនា ឆ្នាំ២០១៣ មកប្រមុខពួកឧទ្ទាមឃើត បានប្រកាសពីបទឈប់បាញ់គ្នាដែលត្រូវគោរពទាំងស្រុងហើយ២ខែក្រោយមកប្រកាសពីការចាប់ផ្តើមដកកងកម្លាំងលោកទៅកាន់ភាគខាងជើងអុីរ៉ាក់ ។ ក៏ប៉ុន្តែពួក PKK បានផ្អាកចលនានេះបន្ទាប់ពីចោទប្រកាន់ក្រុងអង់ការ៉ាថា ពុំគោរពតាមកិច្ចសន្យាមក ៕
ចែករំលែកព័តមាននេះ