ខេត្តសៀមរាប ៖ បន្ទាប់ពីមានលេចចេញរូបភាពអាក្រាតកាយនៅតាមតំបន់ប្រាសាទបុរាណខ្មែរជាបន្ដបន្ទាប់មក អាជ្ញាធរជាតិអប្សរាបានបន្ថែមកម្លាំងសន្ដិសុខបន្ថែមទៀត ដើម្បីឃ្លាំមើលពីសកម្មភាពទាំងនោះ។
ខេត្តសៀមរាប ៖ បន្ទាប់ពីមានលេចចេញរូបភាពអាក្រាតកាយនៅតាមតំបន់ប្រាសាទបុរាណខ្មែរជាបន្ដបន្ទាប់មក អាជ្ញាធរជាតិអប្សរាបានបន្ថែមកម្លាំងសន្ដិសុខបន្ថែមទៀត ដើម្បីឃ្លាំមើលពីសកម្មភាពទាំងនោះ។សង្គមស៊ីវិលបានសាទរនឹងការបន្ថែមកម្លាំងនេះ ប៉ុន្ដែអាជ្ញាធរត្រូវមានវិធានការតឹងតែងជាមុន ដោយដាក់បំរាមហាមឃាត់ពីការថតរូបភាពជាដើម។
មន្ដ្រីអាជ្ញាធរជាតិអប្សរាឲ្យដឹងថា ខ្លួនបានពង្រឹងកងកម្លាំងសន្ដិសុខ(ឆ្មាំ)បន្ថែមទៀត ដោយមានចំនួនជិត១ពាន់នាក់ ដាក់នៅតាមប្រាសាទបុរាណខ្មែរ ដើម្បីការពារជនខិលខូច លួចចូលថតរូបអាសអាភាស ដែលធ្វើឲ្យប៉ះពាល់ដល់វប្បធម៌ និងអរិយធម៌ខ្មែរនៅតំបន់អង្គរ។
ការពង្រឹងនេះ ក្រោយពេលដែលស្ថាប័ននេះចាប់បានជនរទេសសចំនួន៥នាក់ មកលួចថតរូបអាសអាភាសនៅតាមប្រាសាទព្រះខ័ន និងប្រាសាទបន្ទាយក្ដី ជាបន្ដបន្ទាប់។ លោកស្រី ចៅស៊ុន កិរិយា អ្នកនាំពាក្យអាជ្ញាធរជាតិអប្សរាបានប្រាប់កោះសន្តិភាពនៅរសៀលថ្ងៃទី១០ កុម្ភៈ នេះថា ឆ្មាំ១.០០០នាក់នោះដាក់តាមប្រាសាទបុរាណគ្រប់ទីកន្លែងដោយគ្រាន់តែកន្លែងសំខាន់ខ្លះៗមានកម្លាំងច្រើនជាងគេ និងកន្លែងខ្លះតិច ដើម្បីយាមកាមតាមឃ្លាំមើលពីសកម្មភាពមិនប្រក្រតីរបស់ភ្ញៀវទេសចរមួយចំនួន និងការពារមិនឲ្យពួកគាត់ប៉ះពាល់ដល់វត្ថុបុរាណ និងចូលតំបន់ហាមឃាត់ដែលនាំឲ្យគ្រោះថ្នាក់ដល់ពួកគាត់។
លោកស្រីបន្តថា នៅតាមប្រាសាទនីមួយៗមានកម្លាំងយាមកាមចាប់ពេលពីម៉ោង៥ និង៣០នាទីព្រឹក ដល់ម៉ោង៥ និង៣០ល្ងាច ប៉ុន្ដែលោកស្រីថា មិនមានឆ្មាំដាក់នៅតាមប្រាសាទបុរាណក្នុងព្រៃនោះទេ ដោយមានកម្លាំងព្រៃឈើជាអ្នកការពារ។ លោកស្រីបន្ថែមថា ដីឧទ្យានបេតិកភណ្ឌពិភពលោកនេះដែលគ្រប់គ្រងដោយអាជ្ញាធរជាតិអប្សរា មានប្រមាណ៤ម៉ឺនហិកតាឯណោះ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ