លោក ឡុង ឌីម៉ង់ ច្រានចោលព័ត៌មានមន្រ្តីសាលាក្រុងបើករថយន្តបុកមន្រ្តី PM ខណ្ឌមានជ័យ
រាជធានីភ្នំពេញ ៖ អ្នកនំាពាក្យសាលារាជធានីភ្នំពេញ លោក ឡុង ឌីម៉ង់ បានបដិសេធថា ឈ្មោះ សុខ រ័ត្ន មិនមែនជាមន្រ្តីរាជធានីភ្នំពេញនោះទេ ។
រាជធានីភ្នំពេញ ៖ អ្នកនំាពាក្យសាលារាជធានីភ្នំពេញ លោក ឡុង ឌីម៉ង់ បានបដិសេធថា ឈ្មោះ សុខ រ័ត្ន មិនមែនជាមន្រ្តីរាជធានីភ្នំពេញនោះទេ ។ ការច្រានចោលនៅរសៀលថ្ងៃអាទិត្យនេះ បានធ្វើឡើងបន្ទាប់ពីលោក សុខ រ័ត្ន អាយុ៣១ឆ្នាំ បានអះអាងបា្រប់ប៉ូលិសចរាចរណ៍ក្រោយបង្កគ្រោះថ្នាក់ចរាចរណ៍នៅខណ្ឌមានជ័យកាលពីរសៀលថ្ងៃម្សិលមិញថា លោកគឺជាមន្រ្តីសាលាក្រុងភ្នំពេញនោះរួចមក ។
គួររំលឹកថា មន្ត្រីប៉េអឹមខណ្ឌមានជ័យម្នាក់បានរងរបួសធ្ងន់ និងម្នាក់ទៀតរបួសស្រាល ដោយសាររថយន្តបុកនៅចំណុចផ្លូវលេខបេតេ កែងផ្លូវបេតុង ភូមិទួលរកា សង្កាត់ចាក់អង្រែក្រោម ខណ្ឌមានជ័យ កាលពីម៉ោង៣ និង៣០នាទីរសៀល ថ្ងៃទី៣១ មករា ២០១៥។
ប្រភពបានឲ្យដឹងថា មុនពេលកើតហេតុរថយន្តតូយ៉ូតាព្រូស ពណ៌ស ពាក់ស្លាកលេខ ភ្នំពេញ 2AA 8513 បើកបរដោយឈ្មោះ សុខ រ័ត្ន ភេទប្រុស អាយុ៣១ឆ្នាំ បានអះអាងប្រាប់ប៉ូលិសចរាចរណ៍ថា ជាមន្ត្រីសាលាក្រុងភ្នំពេញ ស្នាក់នៅសង្កាត់ ទន្លេបាសាក់ ខណ្ឌចំការមន បើកបរតាមផ្លូវលេខ៤បេតេ ពីលិចទៅកើត ។ចំណែកម៉ូតូណៃហ៊ត ពណ៌ទឹកប៊ិច ពាក់ស្លាកលេខ ខេមរភូមិន្ទ ០៩.១.១៨៨៨ ជិះគ្នា២នាក់ បើកបរដោយឈ្មោះ ធៀង ប៊ុនឈឿន ភេទប្រុស អាយុ៣០ឆ្នាំ ជាមន្ត្រីប៉េអឹមខណ្ឌមានជ័យ និងអ្នករួមដំណើរជាមួយឈ្មោះកែន ពន្លឺ ភេទប្រុស អាយុ២៦ឆ្នាំ ជាមន្ត្រីប៉េអឹមខណ្ឌមានជ័យដូចគ្នា ធ្វើដំណើរតាមផ្លូវបេតុង ពីជើងទៅត្បូង ពេលមកដល់ចំណុចផ្លូវបែកជាបួន រថយន្តបានបើកទៅបុកចំអ្នកអង្គុយ ខាងក្រោយបណ្តាលឲ្យដួលបាក់ជើង ចំណែកអ្នកបើកម៉ូតូរយះប្រអប់ជើង ។
ក្រោយពេលកើតហេតុអ្នករងរបួសធ្ងន់ និងស្រាលត្រូវគេបញ្ជូនទៅព្យាបាលនៅគ្លីនិក១១៥រួចបញ្ជូនបន្តទៅ ព្យាបាលនៅមន្ទីរពេទ្យកាល់ម៉ែត។ ចំណែករថយន្ត និងម៉ូតូត្រូវសមត្ថកិច្ចយកទៅរក្សាទុកនៅអធិការដ្ឋានខណ្ឌមានជ័យ រង់ចាំធ្វើការដោះស្រាយតាមច្បាប់ ៕
ចែករំលែកព័តមាននេះ