អ្នកទទួលខុសត្រូវមួយរូបនៃមន្ទីរប៉ង់តាហ្គោន គូសបញ្ជាក់ថា ជនជាតិអាមេរិក៣នាក់ ត្រូវបានសម្លាប់កាលពីថ្ងៃទី២៩ មករា នៅព្រលានយន្តហោះក្រុងកាប៊ុល រដ្ឋធានីប្រទេសអាហ្វហ្គានីស្ថាន ប្រហែលដោយសារទាហានអាហ្វហ្គានីស្ថានម្នាក់ ។
អ្នកទទួលខុសត្រូវដែលមិនបញ្ចេញឈ្មោះរូបនេះ និយាយថា ជនជាតិអាមេរិកទាំង៣នាក់នេះជាជនស៊ីវិល ធ្វើការឱ្យក្រសួងការពារប្រទេសអាមេរិក ហើយទៅចូលរួមក្នុងកម្មវិធីហ្វឹកហ្វឺនមួយរបស់កងទ័ពអាកាសអាហ្វហ្គានីស្ថាន បានត្រូវស្លាប់ដោយសារការបាញ់ប្រហារផ្ទៃក្នុងមួយ ។
គួរកត់សម្គាល់ថា កងទ័ពសម្ព័ន្ធមិត្តនៅអាហ្វហ្គានីស្ថាន និងបណ្តាជនស៊ីវិលលោកខាងលិច ដែលធ្វើការនៅប្រទេសនេះជារឿយៗរងការបាញ់ប្រហាររបស់ពួកទាហានអាហ្វហ្គានីស្ថាន ។ កងកម្លាំងអូតង់ បានចាត់វិធានការសន្តិសុខពិសេសនានា ប៉ុនប៉ងបង្ការការវាយប្រហារទាំងនេះ ។
កងទាហានអូតង់ភាគច្រើន បានចាកចេញពីអាហ្វហ្គានីស្ថានកាលពីឆ្នាំមុន ក៏ប៉ុន្តែនៅសល់ប្រមាណជា១២.០០០នាក់ ក្នុងនោះមានទាហានអាមេរិក១០.៦០០នាក់ ដែលដើរតួរជាអ្នកជួយទ្រទ្រង់ និងបណ្តុះបណ្តាល ។
ពួកបះបោរតាលីបង់ ចាប់តាំងពីច្រើនសប្តាហ៍មកហើយបានបង្កើនការវាយប្រហាររបស់ពួកគេ ។ នាថ្ងៃទី២៩ មករា ដែរ មនុស្សយ៉ាងតិច៨នាក់ បានត្រូវស្លាប់ក្នុងការវាយប្រហារអត្តឃាតមួយនាឱកាសនៃពិធីបុណ្យសពមួយ នៅភាគខាងកើតអាហ្វហ្គានីស្ថាន ។
ព្រលានយន្តហោះក្រុងកាប៊ុល ត្រូវបានការពារជាពិសេសដោយមួយផ្នែកសម្រាប់ការហោះហើរពាណិជ្ជកម្ម ហើយមួយផ្នែកទៀតសម្រាប់កងទ័ពអូតង់ ៕
ចែករំលែកព័តមាននេះ