ខេត្តកំពង់ឆ្នាំង ៖ បុរសចំណាស់ម្នាក់ស្លាប់ពេលកំពុងដឹកមកសង្គ្រោះនៅមន្ទីរពេទ្យខេត្ត បន្ទាប់ពីជួបហេតុការណ៍គ្រោះថ្នាក់ចរាចរណ៍មួយ ខណៈដែលបុរសរងគ្រោះជិះម៉ូតូឆ្លងថ្នល់ជាតិ ត្រូវរថយន្តឡិចស៊ីសបើកបរដោយជនជាតិថៃបុកពេញទំហឹង កាលពីវេលាម៉ោង០៩ និង១០នាទីព្រឹកថ្ងៃទី២៤ ធ្នូ ២០១៤ ស្ថិតនៅលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ១០៧ និង១០៨ ក្នុងភូមិស្រងាំទេ ឃុំប្រស្នឹប ស្រុករលាប្អៀរ ខេត្តកំពង់ឆ្នាំង ។
ប្រភពបានឱ្យដឹងថា បុរសរងគ្រោះឈ្មោះជឹម ប៉ុន អាយុ៦១ឆ្នាំ រស់នៅក្នុងភូមិស្រះកែវ ឃុំមេលុំ ស្រុកបរិបូណ៌ ។ ចំណែករថយន្តបង្កម៉ាកឡិចស៊ីស RX300 ពណ៌ស្លែ ពាក់ស្លាកលេខភ្នំពេញ 2H.9739 បើកបរដោយបុរសជនជាតិថៃមិនស្គាល់ឈ្មោះ ក្នុងរថយន្តមានគ្នា៦នាក់ ។
ប្រភពបានបន្តថា មុនពេលកើតហេតុ បុរសរងគ្រោះជិះម៉ូតូម៉ាកយ៉ាម៉ាហា ស៊ីរូស បើកតាមបណ្តោយផ្លូវលំពីកើត មកលិច លុះមកដល់ថ្នល់ជាតិមិនបានប្រយ័ត្ន បានបើកឆ្លងផ្លូវ ស្របពេលជាមួយគ្នានោះ ក៏មានរថយន្តឡិចស៊ីសដែលបើកបរដោយបុរសជនជាតិថៃកំពុងមានល្បឿនលឿន ក្នុងដំណើរពីជើងទៅត្បូង បានបុកយ៉ាងពេញទំហឹង បណ្តាលឱ្យម៉ូតូអូសចូលក្នុងព្រៃចម្ងាយជាង១០ម៉ែត្រ
ធ្វើឱ្យបុរសរងគ្រោះមានរបួសធ្ងន់ធ្ងរ ហើយបានស្លាប់តាមផ្លូវពេលដឹកទៅសង្គ្រោះនៅមន្ទីរពេទ្យ ។
ចំណែកអ្នកបើកបរបង្ករ មិនបានរត់ទៅណាទេ គឺនៅរង់ចាំការដោះស្រាយជាមួយជនរងគ្រោះ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ