សារព័ត៌មាន «ដេលីម៉េល» របស់អង់គ្លេស កាលពីពេល ថ្មីៗកន្លងទៅផ្សាយថា អ្នកស្រី Carol E.Levy អ្នកជំនួញផ្នែកអចលនទ្រព្យ កំពុងប្រកាសលក់ភូមិគ្រឹះនៅភាគខាងលិចខណ្ឌស៊ីទីផាក ក្រុងញូវយ៉ក សហរដ្ឋអាមេរិកជាបន្ទាន់ បន្ទាប់ពីមានបញ្ហា ដោយតុលាការសម្រេចឱ្យអ្នកស្រី និងប្តីស្នាក់នៅក្នុងភូមិគ្រឹះនោះ រួមជាមួយលោក Chris Lipman អតីតប្តីដែលលែងលះគ្នាកាលពីឆ្នាំ២០១២ ។
ចៅក្រមបញ្ជាក់ថា លោក Chris Lipman គួរបានទទួលប្រាក់សំណងពីការលែងលះនេះ ក្រោយពីលោកត្រូវចេញពីក្រុមហ៊ុនដែលអ្នកស្រី Carol E-Levy ជាម្ចាស់ ព្រោះអ្នកទាំង២បានលែងលះគ្នា ។ មិនតែប៉ុណ្ណោះលោក Chris Lipman មានសិទ្ធិស្នាក់នៅក្នុងផ្ទះតែមួយជាមួយអតីតប្រពន្ធដែលមានប្តីថ្មីទៅហើយនោះ ។
អ្នកស្រី Carol E.Levy បញ្ជាក់ថា គាត់មិនចង់ឱ្យលោក Chris Lipman នៅក្នុងផ្ទះជាមួយទេ ដើម្បីកុំឱ្យមានបញ្ហា ។ គេប្រៀបដូចជាភ្ញៀវ ដូច្នេះហើយដរាបណាគាត់អាចលក់ភូមិគ្រឹះបាន រឿងគ្រប់យា៉ងត្រូវបញ្ចប់ ។
លោក Chris Lipman បានស្នាក់នៅក្នុងបន្ទប់គេងរបស់ភ្ញៀវនៅជាន់ទី១៧ ដោយមានបន្ទប់គេងសរុបចំនួន៦ ។ ចំណែកអ្នកស្រី Carol E.Levy ស្នាក់នៅជាមួយប្តីក្រោយ ដែលទើបរៀបការកាលពីខែសីហាកន្លងមកនៅជាន់ទី១៨ រួមជាមួយកូនស្រីជាមួយលោក Chris Lipman ចំនួន២នាក់ ។ លើសពីនេះអ្នកស្រី Carol E.Levy កំពុងមានផ្ទៃពោះជាមួយប្តីក្រោយគឺ លោក Joel Goron ផងដែរ ។
លោក Chris Lipman បញ្ជាក់ថា លោកស្នាក់នៅជាមួយអ្នកស្រី Carol E.Levy ជាឱកាសបានឃើញកូនស្រីទាំង២នាក់ ។ ប្រសិនបើអតីតភរិយារបស់លោក គឺអ្នកស្រី Carol E.Levy លក់ភូមិគ្រឹះនោះ គឺលោកនឹងបានចំណែកប្រហែល៤៥% សម្រាប់ចាប់ផ្តើមជីវិតជាថ្មី ៕
ចែករំលែកព័តមាននេះ