អ្នកទទួលខុសត្រូវម្នាក់នៃក្រសួងបង្រួបបង្រួមកូរ៉េខាងត្បូងរាយការណ៍កាលពីថ្ងៃទី២១ ធ្នូ ថា លោក PARK JIE-WON សមាជិកសភានៃគណបក្សសម្ព័ន្ធភាពនយោបាយថ្មី ដើម្បីលទ្ធិប្រជាធិបតេយ្យ ANPD និងជាមនុស្សជំនិតម្នាក់របស់អតីតប្រធានាធិបតីលោកគីម ដេយុង និងលោកស្រី HYUN-JEONG-EUN ប្រធានអគ្គនាយកក្រុមហ៊ុន HYUNDAI បានស្នើដល់រដ្ឋាភិបាលនូវការអនុញ្ញាតទៅបំពេញទស្សនកិច្ចនៅកូរ៉េខាងជើង នាថ្ងៃទី២៤ ធ្នូ ។
អ្នកទទួលខុសត្រូវរូបនេះបន្តថា ក្រោយសំណើមួយរបស់កូរ៉េខាងជើង មជ្ឈមណ្ឌលសន្តិភាព គីម ដេយុង និងក្រុមហ៊ុន HYUNDAI ASAN CO. (សាខាក្រុមហ៊ុន HYUNDAI ទទួលបន្ទុកសកម្មភាពនៅកូរ៉េខាងជើង) បានស្នើឱ្យមានការបំពេញទស្សនកិច្ចមួយនៅកូរ៉េខាងជើងនាថ្ងៃទី២៤ ធ្នូ ។ ការយល់ព្រម ឬអត់ត្រូវសម្រេចនាថ្ងៃទី២៣ ធ្នូ ។
លេខាធិការគណបក្សពលករកូរ៉េខាងជើង ទទួលបន្ទុកទំនាក់ទំនងអន្តរកូរ៉េបានស្នើកាលពីថ្ងៃទី១៩ ធ្នូ ឱ្យមានទស្សនកិច្ចនេះ ជាសញ្ញានៃការសម្តែងការអរគុណបន្ទាប់ពីលោក PARK JIE-WON បានបញ្ជូនកម្រងផ្កាមួយនាឱកាសខួបលើកទី៣ នៃមរណភាពរបស់អតីតមេដឹកនាំកូរ៉េខាងជើង លោកគីម ជុងអុីល ឪពុកលោកគីម ជុងអ៊ុន ។
លោក PARK JIE-WON កាលពីថ្ងៃទី១៦ ធ្នូ បានទៅកាន់តំបន់កាអឺសុងកូរ៉េខាងជើង ដើម្បីនាំយកកន្ត្រកផ្កាមួយទៅទីនោះក្នុងនាមលោកស្រី LEE HEE-HO ភរិយាមេម៉ាយរបស់អតីតប្រធានាធិបតី លោកគីម ដេយុង ។ ចំណែកប្រធានក្រុមហ៊ុន HYUNDAI ASAN CORP លោក CHO KUN-SHIK នាថ្ងៃនោះ ក៏បានបញ្ជូនកន្ត្រកផ្កាមួយក្នុងនាមប្រមុខក្រុមហ៊ុននេះទៅកាអឺសុងដែរ ។
នាថ្ងៃនោះឯង លោក WON DONG YON អនុប្រធានគណៈកម្មាធិការដើម្បីសន្តិភាព នៅអាស៊ីប៉ាស៊ីហ្វិក APPC បានទទួលគណៈប្រតិភូកូរ៉េខាងត្បូង ហើយសម្តែងការអរគុណ ៕
ចែករំលែកព័តមាននេះ