បណ្តាអ្នកវិទ្យាសាស្ត្រអង់គ្លេសបានព្រមានថា ធាត់ដុះពោះលើសទម្ងន់ក្នុងអាយុពី១៨ទៅ១៩ឆ្នាំ អាចបង្កើនអត្រាស្លាប់ពីជំងឺមហារីកទៅថ្ងៃខាងមុខក្នុងកម្រិតមួយខ្ពស់ បើទោះណាទម្ងន់នេះថយចុះមកវិញនៅវ័យកណ្តាលក្តី ។
ការសិក្សាដែលបានធ្វើលើបុរសប្រមាណជិត២ម៉ឺននាក់បានរកឃើញថា អ្នកដែលលើសទម្ងន់ខ្លាំងឬក៏ធាត់ដុះពោះស្ថិតក្នុងវ័យពី១៨-១៩ឆ្នាំប្រឈមនឹងការស្លាប់ដោយជំងឺមហារីកមួយចំនួនក្នុងនោះ មានមហារីកសួត មហារីកតម្រងនោម និងក្រពេញប្រូស្តាតប្រហែលជា៣៥% ។ អត្រាប្រឈមនេះនឹងនៅតែមានជាដដែល បើទោះជាពួកគេព្យាយាមបញ្ចុះទម្ងន់ខ្លួនឱ្យមកនៅក្នុងកម្រិតធម្មតាវិញអំឡុងវ័យកណ្តាលក្តី ។ សូមបញ្ជាក់ថា ការសិក្សាលើកនេះត្រូវបានពិសោធតែលើបុរសប៉ុណ្ណោះ ប៉ុន្តែចំពោះស្ត្រីវិញការប្រឈមប្រហែលជាមានដូចគ្នា ។
វេជ្ជបណ្ឌិតលីនសេ ហ្គ្រេអ្នកស្រាវជ្រាវមកពីក្រុមប្រឹក្សាស្រាវជ្រាវវេជ្ជសាស្ត្រ(MRC)បាននិយាយថា នេះជាលើកទី១ហើយដែលផលប៉ះពាល់ពីការធាត់លើសទម្ងន់ក្នុងវ័យក្មេងអាចបង្កើនហានិភ័យកើតជំងឺមហារីកពេលក្រោយក្នុងជីវិត ហើយត្រូវបានគេយកមកធ្វើការវិភាគយ៉ាងល្អិតល្អន់ ។
លោកស្រីវេជ្ជបណ្ឌិតបានបន្តថា៖«វាបានធ្វើឱ្យមានការចាប់អារម្មណ៍ជាខ្លាំងដែលBMI(សមាមាត្ររវាងកំពស់និងទម្ងន់ខ្លួន)ខ្ពស់នៅអាយុ១៨ឆ្នាំ នាំទៅរកអត្រាប្រឈមខ្ពស់ពីជំងឺមហារីកជាងអ្នកដែលមានBMIខ្ពស់ក្នុងវ័យកណ្តាល ។ នេះជាសារមួយដែលច្បាស់លាស់និងពិតប្រាកដ។ រក្សាទម្ងន់ខ្លួនរបស់អ្នកឱ្យនៅធម្មតា ពិតជាអាចកាត់បន្ថយឱកាសកើតជំងឺមហារីកក្នុងថ្ងៃខាងមុខ» ៕
ចែករំលែកព័តមាននេះ