តាមការស្រាវជ្រាវរបស់អាមេរិកបានឲ្យដឹងថា សម្រាប់ប្រជាជនកម្ពុជា មានស្រី្ត២២នាក់ក្នុងចំណោម១លាននាក់ ដែលអាចមានជំងឺមហារីសុដន់ ។ នេះបើតាមការឲ្យដឹងពីលោកវេជ្ជបណ្ឌិត Kraipop Jarupaiboon គ្រូពេទ្យឯកទេសផ្នែកជំងឺមហារីសុដន់ នៃមន្ទីរពេទ្យវេជ្ជថានី នៃប្រទេសថៃ ក្នុងកម្មវិធីបើកពិនិត្យ អ្នកជំងឺ ផ្នែកមហារីកសុដន់ រោគស្ត្រី និងជំងឺសន្លាក់ដោយឥតគិតថ្លៃ នៅផាកកាហ្វេ ដែលមានអ្នកចូលរួមប្រមាណជាង៦០នាក់ កាលពីថ្ងៃ១៣ ខែធ្នូ ឆ្នាំ២០១៤ កន្លងមក ។
ក្នុងឪកាសនោះលោកវេជ្ជបណ្ឌិត Kraipop Jarupaiboon បានប្រាប់កោះសន្តិភាពថា បច្ចុប្បន្ន ជំងឺមហារីកសុដន់ គឺជាបញ្ហាដែលត្រូវយកចិត្តទុកដាក់ និងគួរព្រួយបារម្ភយ៉ាងខ្លាំង ព្រោះជំងឺនេះកំពុងតែមានការកើនឡើងយ៉ាងខ្លាំងពីមួយឆ្នាំទៅមួយឆ្នាំ ហើយការព្យាបាលគឺមានពី២៥ទៅ៤០ភាគរយគឺអ្នកជំងឺអាចបាត់បង់ជីវិតដោយសារមេរោគដ៏កាចសាហាវរបស់ជំងឺនេះ ។
លោកវេជ្ជបណ្ឌិតបានឲ្យដឹងទៀតថា ជំងឺមហារីកសុដន់អាចបណ្តាលមកពីកត្តាជាច្រើនដែលទាក់ទងទៅនឹងការរស់នៅ ការទទួលទានអាហារ ការជក់បារី ការទទួលទានគ្រឿងស្រវឹង និងការកង្វះលំហាត់ប្រាណជាដើម ។ ជាងនេះទៅទៀតជំងឺនេះក៏អាចទាក់ទងទៅនឹងជំងឺថ្នាំពន្យារកំណើតផងដែរ ដូច្នេះមុននឹងជ្រើសរើសថ្នាំពន្យារកំណើតមកប្រើ គួរតែមានការពិភាក្សា ជាមួយអ្នកឯកទេសជាមុនសិន ។
លោកវេជ្ជបណ្ឌិតបានឲ្យដឹងទៀតថា បើសិនស្ត្រីមានផ្ទុកជំងឺមហារីកហើយ មិនបានទទួលការព្យាបាលទេ ជំងឺនេះអាចនឹងប៉ះពាល់ទៅដល់ថ្លើម សួត ប៉ះពាល់ឆ្អឹង និងខួរក្បាលផងដែរ ។
ចំពោះរោគសញ្ញានៃជំងឺនេះមានដូចជា៖
-ការឈឺចាប់នៅក្នុងសុដន់
-នៅពេលដែលប៉ះឬច្របាច់សុដន់នោះនឹងឃើញថាមានដុំរឹង ជួនកាលអាចមានសភាពផតឬក៏ខួងផងដែរ ។
-ក្បាលដោះមានការប្រែពណ៌
-ពេលខ្លះជំងឺនេះមិនមានរោគសញ្ញានោះទេ មានតែការពិនិត្យប៉ុណ្ណោះទើបដឹងច្បាស់ ។
លោកវេជ្ជបណ្ឌិតបានប្រាប់អំពីវិធីព្យាបាលជំងឺមហារីកសុដន់នេះថា កាលពីមុននៅពេលដែលអ្នកជំងឺកើតមហារីសុដន់ គ្រូពេទ្យតែងធ្វើការវះកាត់សុដន់នោះចោលតែម្តង ធ្វើឲ្យស្ត្រីភាគច្រើនមានដើមទ្រូងរាបស្មើដូចមនុស្សប្រុស ជាហេតុធ្វើឲ្យស្ត្រីប៉ះពាល់ផ្លូវចិត្តធ្ងន់ធ្ងរ ។
ប៉ុន្តែបច្ចុប្បន្ននេះជាសម័យជឿលឿន លោកវេជ្ជបណ្ឌិតបានស្រាវជ្រាវអស់រយៈពេលជាច្រើនឆ្នាំ លើការព្យាបាលជំងឺនេះ ដើម្បីទទួលបានភាពជោគជ័យជាបន្តបន្ទាប់នៅក្នុងការវះកាត់ជំងឺមហារីសុដន់ ដោយមិនចាំបាច់វះកាត់សុដន់ចោលទាំងស្រុងនោះទេ គឺវះកាត់យកតែដុំកោសិកាមហារីកចេញទៅបានហើយ ។ ជាពិសេសដើម្បីបំពេញតាមតម្រូវការរបស់ស្ត្រីជាច្រើនលោកវេជ្ជបណ្ឌិត ក៏អាចវះកាត់កែសុដន់ឲ្យត្រលប់មករកភាពស្រស់ស្អាតវិញថែមទៀតផងដែរ ដើម្បីឲ្យស្ត្រីមានភាពជឿរជាក់លើខ្លួនឯង។ ចំពោះការវះកាត់នោះ គឺមិនមានស្នាមរបួសអ្វីដែលធ្វើឲ្យពិបាកមើលនោះទេ គឺមានរូបរាងដូចធម្មជាតិ មិនធ្វើឱ្យដៃគូចាប់អារម្មណ៍លើស្នាមវះកាត់នោះឡើយ ។ ហើយបន្ទាប់ពីធ្វើការវះកាត់ ស្ត្រីក៏ត្រូវតែមកពិនិត្យតាមដានជាមួយគ្រូពេទ្យជាប្រចាំផងដែរ ចៀសវាងការកើតឡើងវិញនៃមហារីកនេះម្តងទៀត ៕
ចែករំលែកព័តមាននេះ