ខេត្តត្បូងឃ្មុំ ៖ ជុំវិញមរណភាពរបស់ស្ត្រីខ្មែរឈ្មោះ អ៊ី ស៊ីឡែន អាយុ២៥ឆ្នាំ មានស្រុកកំណើតនៅភូមិក្តុលលើ ឃុំទ្រា ស្រុកក្រូចឆ្មា ខេត្តត្បូងឃ្មុំ ដែលមានប្តីជនជាតិកូរ៉េឈ្មោះ អ៊ី យ៉ុងឆុល អាយុ៤៥ឆ្នាំ នៅក្នុងហេតុការណ៍គ្រោះថ្នាក់ចរាចរមួយនៅក្នុងសាធារណរដ្ឋកូរ៉េខាងត្បូង កាលពីថ្ងៃទី២៣ វិច្ឆិកា កន្លងទៅ រួមទាំងកូននៅក្នុងផ្ទៃ៧ខែផងដែរនោះ ក្រោយពីការស្រាវជ្រាវដ៏សកម្មរបស់សមត្ថកិច្ចទើបដឹងថា ហេតុការណ៏នេះបង្កឡើងដោយសារបុរសជាប្តីបានរៀបចំផែនការឲ្យប្រពន្ធផឹកថ្នាំងងុយដេក ហើយបើករថយន្តទៅបុករថយន្តមួយគ្រឿងព្រោះតែចង់បានប្រាក់ធានារ៉ាប់រងពីក្រុមហ៊ុនប្រមាណជិត៩លានដុល្លារនោះ និងបានល្បីរន្ទឺមកដល់ប្រទេសកម្ពុជាផងដែរ ។
លោកឧត្តមសេនីយ៏ត្រី ម៉ៅ ពៅ ស្នងការនគរបាលខេត្តមានប្រសាសន៏ឲ្យដឹងថា នៅព្រឹកថ្ងៃទី២៨ វិច្ឆិកា រូបលោកបានចាត់ឲ្យកម្លាំងសមត្ថកិច្ចចុះទៅកាន់លំនៅឋានរបស់សព ស្ថិតនៅភូមិក្តុលលើ ឃុំទ្រា ស្រុកក្រូចឆ្មា ដោយបានសួរនាំរកប្រភពព័ត៌មានពីក្រុមសាច់ញាតិនៃសពគ្រានោះត្រូវបានស្ត្រីឈ្មោះ អោក សាវ៉េង អាយុ៥៤ឆ្នាំ និងឪពុកឈ្មោះ អ៊ីម អ៊ី អាយុ៥៦ឆ្នាំ មានក្តីរន្ធត់ក្នុងចិត្ត និងបង្ហូរទឹកភ្នែកក្រោយពីបានដឹងថាកូនស្រីរបស់ខ្លួនឈ្មោះ អ៊ី ស៊ីឡែន អាយុ២៥ឆ្នាំ បានស្លាប់ក្នុងឧប្បត្តិហេតុគ្រោះថ្នាក់ចរាចរណ៍នៅប្រទេសកូរ៉េនោះ ។
លោកឧត្តមសេនីយ៍ត្រី ម៉ៅ ពៅ ស្នងការនគរបាលខេត្តបានរំលឹកថា នៅក្នុងឆ្នាំ២០០៨ នាងបានរៀបការតាមប្រពៃណីជាមួយបុរសកូរ៉េខាងលើ បន្ទាប់មកបានចាកចេញពីមាតុភូមិកំណើតទៅរស់នៅប្រទេសកូរ៉េខាងត្បូង ថែមទាំងមានកូនពីរនាក់ ក្នុងនោះកូនបងអាយុ៥ឆ្នាំ និងកូនទី២នៅក្នុងផ្ទៃទើបតែបាន៧ខែប៉ុណ្ណោះ ។ ក្រោយពីបានដឹងនូវដំណឹងដ៏ក្រៀមក្រំនេះ ជីដូនក៏បានស្នើសុំយកចៅបងគេមកចិញ្ចឹមនៅប្រទេសកម្ពុជាវិញ ចំពោះសំណើនេះប្រហែលជារដ្ឋាភិបាលកូរ៉េមិនជំទាស់នោះទេ ។
បើតាមប្រភពពីលោកអនុសេនីយ៍ឯក អ៊ុក ពៅ អធិការរងនគរបាលស្រុកក្រូចឆ្មារឲ្យដឹងដែរថា តាមដំណឹងពីគ្រួសារអ្នករងគ្រោះវិញ សពអាចគេនឹងដឹកតាមយន្តហោះមកកាន់កម្ពុជានៅយប់ថ្ងៃទី២៨ វិច្ឆិកា
ដើម្បីយកទៅធ្វើបុណ្យតាមប្រពៃណីនៅស្រុកកំណើតរបស់អ្នករងគ្រោះនៅភូមិក្តុលលើ ឃុំទ្រា ស្រុកក្រូចឆ្មា ។ ហើយនៅថ្ងៃទី២៩ វិច្ឆិកា មន្ត្រីស្ថានទូតកូរ៉េខាងត្បូងនឹងអញ្ជើញទៅសួរសុខទុក្ខដល់គ្រួសារសព ដោយឡែកលោកវរសេនីយ៍ត្រី សាំ ហេង អធិការនគរបាលស្រុកក្រូចឆ្មាបានដឹកនាំកម្លាំងចុះទៅការពារផ្ទះបុណ្យសពនោះផងដែរ ៕
ចែករំលែកព័តមាននេះ