លទ្ធផលនៃការសិក្សាថ្មីមួយរបស់អាមេរិកចុះផ្សាយក្នុងព្រឹត្តបត្រ American Heart Associationបង្ហាញថា ការទទួលទានចេកទុំអាចជួយកាត់បន្ថយហានិភ័យពីជំងឺដាច់សរសៃឈាមខួរក្បាលចំពោះបណ្តាស្ត្រីអស់រដូវ ។ លទ្ធផលបានបង្ហាញទៀតថា រាល់អាហារដែលសម្បូរទៅដោយប៉ូតាស្យូមគឺអាចជួយកាត់បន្ថយឱកាសកើតជំងឺខាងដើមបាន១/៤ ។
ការពិសោធរយៈពេល១១ឆ្នាំលើស្ត្រីវ័យពី៥០ទៅ៧៩ឆ្នាំចំនួន៩ម៉ឺន១៣៧នាក់ រកឃើញថា ក្រុមដែលទទួលបានប៉ូតាស្យូមច្រើន ប្រឈមនឹងអត្រាកើតជំងឺដាច់សរសៃខួរក្បាល១២ឬ១៦ភាគរយធៀបនឹងក្រុមដែលទទួលបានតិចបំផុត។ ចំពោះស្ត្រីមិនមានជំងឺលើសឈាម ប៉ុន្តែទទួលទានអាហារផ្ទុកប៉ូតាស្យូមច្រើនបំផុត គឺអាចកាត់បន្ថយហានិភ័យពីជំងឺដាច់សរសៃឈាមគ្រប់ប្រភេទបាន២១ភាគរយ ។ យ៉ាងណាក៏ដោយ ការប្រើថ្នាំជាតិប៉ូតាស្យូម មិនអាចបញ្ចុះហានិភ័យជំងឺដាច់សរសៃឈាមបានទេ ។
ក្រុមអ្នកស្រាវជ្រាវបានលើកឡើងថា ការទទួលទានអាហារផ្ទុកប៉ូតាស្យូមច្រើននៅមុនកើតជំងឺលើសឈាមគឺផ្តល់អត្ថប្រយោជន៍ចំពោះសុខភាពកាន់តែខ្លាំងឡើង ។
ទោះជាយ៉ាងនេះក្តី លោកស្រី Sylvia Wassertheil-Smollerសមាជិកក្រុមស្រាវជ្រាវបានព្រមានថា បរិមាណប៉ូតាស្យូមច្រើនពេកគឺអាចបណ្តាលឱ្យគ្រោះថ្នាក់ដល់បេះដូង ហើយថា បុគ្គលម្នាក់ៗគួរពិនិត្យឱ្យបានច្បាស់ពីបរិមាណប្រើប្រាស់សារធាតុរ៉ែមួយនេះ ។ លោកស្រីបានបន្ថែមថា ៖«ការរកឃើញរបស់យើងបង្ហាញថា ស្ត្រីគួរតែទទួលទានអាហារណាដែលផ្ទុកប៉ូតាស្យូមច្រើន ។ ប៉ុន្តែ គេមិនត្រូវស្វែងរកប៉ូតាស្យូមក្នុងអាហារគ្មានគុណតម្លៃសុខភាពនោះឡើយ។ អាហារមួយចំនួនដែលផ្ទុកប៉ូតាស្យូមច្រើនមានដូចជា ចេក បណ្តាសណ្តែកពណ៌ស ដំឡូងជ្វានិងដំឡូងបារាំងជាដើម »៕
ចែករំលែកព័តមាននេះ