ពួកខ្មាន់កាំភ្លើងរបស់ក្រុមប្រដាប់អាវុធ Al-shabaab បានសម្លា.ប់អ្នកដំណើរតាមរថយន្តក្រុងនៅភាគខាងជើងប្រទេសកេនយ៉ា អស់ចំនួន២៨នាក់ កាលពីព្រឹកថ្ងៃទី២២ វិច្ឆិកា ។
ពួកខ្មាន់កាំភ្លើងរបស់ក្រុមប្រដាប់អាវុធ Al-shabaab បានសម្លាប់អ្នកដំណើរតាមរថយន្តក្រុងនៅភាគខាងជើងប្រទេសកេនយ៉ា អស់ចំនួន២៨នាក់ កាលពីព្រឹកថ្ងៃទី២២ វិច្ឆិកា ។
ប្រភពព័ត៌មានពីបរទេសផ្សាយថ្ងៃទី២៣ វិច្ឆិកា ថា រថយន្តក្រុងមួយគ្រឿងដែលចេញដំណើរឆ្ពោះទៅក្រុងណៃរ៉ូប៊ី ប្រទេសកេនយ៉ា ត្រូវបានខ្មាន់កាំភ្លើងមួយក្រុមស្ទាក់ឱ្យឈប់នៅតំបន់ម៉ានដេរ៉ា ក្បែរព្រំដែនប្រទេសសូម៉ាលី ហើយបានបំបែកពួកមូស្លីមចេញពីក្រុមអ្នកដំណើរដោយឱ្យអានគម្ពីរ «អាល់គូរ-អាន» ហើយចំពោះអ្នកណាដែលអានមិនបាន ត្រូវបាញ់ប្រហារនៅត្រង់ក្បាល ។
លោកអាមេ៉ដ ម៉ាហាត់ មនុស្សម្នាក់ក្នុងចំណោមអ្នកដំណើរនៅលើរថយន្តក្រុងខាងលើ ដែលនៅរស់រានមានជីវិតបានបញ្ជាក់ប្រាប់ BBC ថា រថយន្តខាងលើដែលមានផ្ទុកអ្នកដំណើរជាង៦០នាក់ បានត្រូវក្រុមប្រដាប់អាវុធប្រហែល១០នាក់ ស្ទាក់វាយប្រហារកាលពីព្រឹកថ្ងៃទី២២ វិច្ឆិកា ហើយអ្នកបើកបរព្យាយាមបើកគេច ប៉ុន្តែរថយន្តបែរជាជាប់ផុងទៅមុខមិនរួច ។ មុនពេលមានការសម្លាប់រង្គាលខាងលើ ខ្មាន់កាំភ្លើងបានបញ្ជាអ្នកដំណើរឱ្យចេញពីរថយន្តក្រុង និងឱ្យជនសូម៉ាលីចេញពីក្រុមអ្នកដំណើរទាំងនោះ និងឱ្យអានព្រះគម្ពីរ «អាល់គូរ-អាន» ឯចំពោះអ្នកដែលមិនអាចអានបានត្រូវបាញ់ចំក្បាលស្លាប់នៅនឹងកន្លែង ។
លើសពីនេះក៏មានជនសូម៉ាលីមួយចំនួនត្រូវបាញ់ប្រហារ ព្រោះព្យាយាមបញ្ចុះបញ្ចូលខ្មាន់កាំភ្លើងឱ្យទុកជីវិតអ្នកដំណើរដែលមិនមែនជាជនជាតិសូម៉ាលី ។
ស្របពេលជាមួយគ្នានេះ ខាងកាកបាទក្រហមរបស់កេនយ៉ា បានបញ្ជាក់ថា ក្រុមជួយសង្គ្រោះបានព្យាយាមប្រមូលសពចេញពីចំណុចខាងលើ ខណៈពេលក្រសួងមហាផ្ទៃបានគូសបញ្ជាក់ថា កងសន្តិសុខបានបញ្ជូនកម្លាំងតាមចាប់ក្រុមខ្មាន់កាំភ្លើងដែលបង្កហេតុខាងលើដែរ ។
ក្រោយពេលកើតហេតុ ក្រុម Al-shabaab បានថ្លែងការណ៍តាមប្រព័ន្ធវេបសាយរបស់ខ្លួនថា ពួកគេវាយប្រហារលើរថយន្តក្រុងលើកនេះ ដើម្បីជាការសងសឹក ដែលកងកម្លាំងសន្តិសុខចូលកាន់កាប់វិហារនៅក្រុងមុមបាសា កាលពីសប្តាហ៍មុន ៕
ចែករំលែកព័តមាននេះ