ទីភ្នាក់ងារព័ត៌មាន AFP ផ្សាយថា ជនមូស្ល៊ីមមួយចំនួននៅអឺរ៉ុបកំពុងលះបង់សាសនារបស់ខ្លួន ហើយមកកាន់សាសនាគ្រិស្តវិញ ឬមិនកាន់សាសនាណាទាំងអស់ ទោះបីជាទង្វើនេះគឺជាបម្រាមរបស់ពួកគេក៏ដោយ ។
ខ្សែភាពយន្តមួយរបស់បារាំងរឿង «The Apostle» បានអប់រំឱ្យមនុស្សស្គាល់ពីការ «គ្មានសទ្ធា» ដោយរៀបរាប់ពីជីវប្រវត្តិរបស់យុវវ័យមូស្ល៊ីមដែលប្តូរទៅកាន់សាសនាគ្រិស្តនិកាយរ៉ូម៉ាំងកាតូលិក ។ លោកប៉ាស្ទ័រ សាអុីដ អ៊ូស៊ីប៊ូ អាយុ៤៦ឆ្នាំ ដែលលះបង់ពីមូស្ល៊ីមទៅកាន់សាសនាគ្រិស្តនិកាយប្រូតេស្តង់ និងជាមនុស្សម្នាក់ក្នុងចំណោមអ្នកប្តូរសាសនា២ទៅ៣នាក់នៅប្រទេសបារាំង បានបញ្ជាក់ជាសាធារណៈពីការសម្រេចចិត្តនេះថា «ដល់ពេលវេលាដែលពួកយើងឈប់រស់នៅដោយការភិតភ័យ ឬលាក់ខ្លួនហើយ» ។
លោករ៉ាតវ៉ាន អាត់ទីយ៉ា អតីតជាអ្នកបួស និងបច្ចុប្បន្នមានឯកទេសផ្នែកអ៊ិស្លាមនៅឯមហាវិទ្យាល័យ Leuven ប្រទេសបែលហ្ស៊ិកថ្លែងថា «ការឈប់មានសទ្ធា គឺជាបម្រាមនៅក្នុងវប្បធម៌មូស្ល៊ីម និងទោះបីជាខ្លឹមសារនេះនៅក្នុងព្រះគម្ពីអាល់កូរអាន មិនបានបញ្ជាក់ពីការមានទោសក៏ដោយ បុ៉ន្តែតាមទំនៀមទម្លាប់នៃជំនឿនឹងដាក់បណ្តាសាដល់អ្នកគ្មានសទ្ធា ឬលះបង់សាសនា» ។
អ្នកឯកទេសរូបនេះបានបញ្ជាក់ថា នៅអឺរ៉ុបមានជនមូស្ល៊ីមជាច្រើននាក់បានប្តូរទៅកាន់សាសនាគ្រិស្ត ពិសេសក្នុងនិកាយប្រូតេស្តង់ដូចជាលោកប៉ាស្ទ័រ សាអីុដ អ៊ូស៊ីប៊ូ កំពុងមានកំណើនខ្ពស់ ។ គ្រិស្តសាសនិកនិកាយខាងលើបានរិះរកវិធីសាស្ត្រទាក់ទាញនៅតាមទីកន្លែងដែលប្រមូលផ្តុំដោយកម្មករ និងជនភៀសខ្លួនដែលមានជនមូស្ល៊ីមភាគច្រើន ៕
ចែករំលែកព័តមាននេះ