ប្រទេសកូរ៉េខាងជើង កាលពីថ្ងៃទី២០ វិច្ឆិកា បានថ្កោលទោស ការបោះឆ្នោតមួយនៅអង្គការសហប្រជាជាតិ លើដំណោះស្រាយមួយដែលតំណាងឱ្យជំហានដំបូងឆ្ពោះទៅធ្វើការកាត់ទោសបណ្តាមេដឹកនាំខ្លួន នៅមុខតុលាការព្រហ្មទណ្ឌអន្តរជាតិ CPI ពីបទឧក្រិដ្ឋប្រឆាំងមនុស្សជាតិ ។
កាលពីយប់ថ្ងៃទី១៨ វិច្ឆិកា នៅក្រុងញូវយ៉ក គណៈកម្មាធិការសិទ្ធិមនុស្សនៃមហាសន្និបាតអង្គការសហប្រជាជាតិ បានអនុម័តដំណោះស្រាយមួយដែលស្នើដល់ក្រុមប្រឹក្សាសន្តិសុខអង្គការសហប្រជាជាតិ ធ្វើការប្តឹងទៅតុលាការព្រហ្មទណ្ឌអន្តរជាតិ CPI ឱ្យកាត់ទោសរបបក្រុងព្យុងយ៉ាងពីបទឧក្រិដ្ឋប្រឆាំងមនុស្សជាតិ ។
ក្រសួងការបរទេសកូរ៉េខាងជើងបានបញ្ចេញប្រតិកម្មថា ដំណោះស្រាយនោះគឺជាការបោកប្រាស់មួយ ហើយចោទប្រកាន់សហរដ្ឋអាមេរិកថា ជាអ្នកនៅពីក្រោយដើម្បីធ្វើឱ្យក្រុងព្យុងយ៉ាងទទួលការអាម៉ាស់នៅមុខសហគមន៍អន្តរជាតិ ។ ប្រឈមមុខចំពោះការសម្រេចចិត្តនេះ កូរ៉េខាងជើងបានបញ្ចេញការគំរាមកំហែងនុយក្លេអ៊ែរ ។
ក្រសួងការបរទេសកូរ៉េខាងជើងនិយាយថា ការវាយប្រហារបែបនេះពីសំណាក់សហរដ្ឋអាមេរិក មិនអាចធ្វើឱ្យយើងអត់ទ្រាំយូរបានទៀតឡើយ ក្នុងការសាកល្បងនុយក្លេអ៊ែរថ្មី ។
ដំណោះស្រាយដែលគ្មានការចាប់បង្ខំនោះ គឺផ្អែកលើរបាយការណ៍មួយរបស់អង្គការសហប្រជាជាតិ ដែលមាន៤០០ទំព័រ ចេញផ្សាយកាលពីខែកុម្ភៈ ក្រោយធ្វើការសុើបអង្កេតយ៉ាងយូរ ពីការរំលោភបំពានសិទ្ធិមនុស្សពីសំណាក់កូរ៉េខាងជើង ។ ដំណោះស្រាយនោះត្រូវសិក្សានាខែធ្នូ ដោយមហាសន្និបាតអង្គការសហប្រជាជាតិ ។
ទន្ទឹមនឹងនេះ ពួកអ្នកស្រាវជ្រាវអាមេរិកនៃវិទ្យាស្ថាន «US-Corea» នៃសាកលវិទ្យាល័យ John Hopkins ក្រុងវ៉ាសុីនតោន កាលពីថ្ងៃទី២០ វិច្ឆិកា បានលើកឡើងពីលទ្ធភាពដែលកូរ៉េខាងជើងកំពុងធ្វើអាជីវកម្មរោងចក្រចម្រាញ់ផ្លុយតូនីញ៉ូម (Plutonium) មានគុណភាពយោធា នៅឯទីតាំងនុយក្លេអ៊ែរ Yongbyon ។ បណ្តារូបភាពផ្កាយរណបបង្ហាញពីចំហាយកំពុងហុយចេញពីរោងចក្រនោះ ដែលមានន័យថា កូរ៉េខាងជើងកំពុងតែធ្វើប្រតិបត្តិការនានា សម្រាប់ការសាកល្បង មុនពេលចាប់ផ្តើមសកម្មភាព ៕
ចែករំលែកព័តមាននេះ